Sam 30 - Nobonob Baibel

Ena heme anaknu unuqittak laa

Imuam Dawitnu sam. Yawenu mettid lag nuhignu Nug tituana mettak haenppa edappig.

¹ O Yawe, na da ehaniɗe, da qagaiettakppa ii daattem amunu, da na humidkkul. Ao, na dahil kekeɗ uuatte da ii eɗilppig.

² O Yawe, dahil Kayak, da na ehaniɗkkutnu unuqitti, na hee, oɗe dahil iitta me, da ena daattem.

³ O Yawe, da mauhkkulnu heiyi, na hee, da ii mauhmi. Ao, da mauhak abenppa gokkulnu heiyi, na hee, da ii mauhmi.

⁴ Danab ah ag Yawenu oo metta ii uuak kobol dim lamidtteb ele, ag Yawenu ahi etteg! Yo, ag Yawe, Nug oppiaawak daatte amu, ag Nug binag meig!

⁵ Aɗinu? Nuhig oo nauhak am haen tutuib daatte, amge ii helo bia me, ehanittak kobol nuhig, kobol amuam danab ah nuhikkud bau daatteb, am haen amu oh anamib daatte! Danab ah ag tueb meeb gaappeg ukkeb, wagkkaɗkkutai, amge buttua amu, Nug ag gamag ahak madakku.

⁶ Haen da ɠagattag dayeye, da ami. “Aɗitai laa heeb, da ii nein qepa!” ⌊Amge da anam ami dimppa amu, uug iwom.⌋

⁷ O Yawe, ⌊am genab⌋ na ii helom bia me, na da ehaniɗme amu, haen amuppa na hee, da qauko ii uɗalttebia ii uɗalmi. Ao, am anam, amge na ehanittak amu ii meɗan, nakka dahilppanu lokkumidme amu, haen amuppa da ool uug nau qeum.

⁸ O Yawe, da na unuqidmi. Ao, da na, Naɗi, da na dahilnu oot gai-iitta doon oot meɗan ehaniɗkkutnu, da ii daye daye unuqidmi.

⁹ Da ami. “⌊O Naɗi,⌋ da mauhkkul dayeb amu, na amuppa ehanittak laa aokkutte? Ao, danab ag da mauhak moɗppa meiɗppeg amu, na amuppa ehanittak laa aokkutte? Da mauhe, moɗppa gappud mekkul dayeb amu, gappud amu na binan mekkute? Ge, da mauhen, gappud mekkul dayeb, da nahip oo metta ii uuak kobolnu danab ah oh amelagppa akkulte? ⌊Amu oh iitta⌋.

¹⁰ O Yawe, na dahil unuqittak doona, na dahilnu oot gai-iitta doon oot meɗan ehaniɗkkutnu oɗ medattem. Ao, O Yawe, na da ehaniɗkkutnu unuqidttem.”

¹¹ O Yawe, na hee, da mahiak okkai hein daami amu, da mahiak amu uuen, da gamag ahak naɗi doyeye, ahi goɗattem. Na lamen heɗiag ele dahil uɗilon, lamen gamag ahaknu ippunigtte ele meɗame.

¹² Na da humittak ahi nahipnu edette, bakkum ii daapanu oot heum amunu, na anam heme. O Yawe, dahil Kayak, da geha na amenppa, “Ena heme,” hanhan akkul!