Sam 3 - Nobonob Baibel

Buttua ehanittak awaknu unuqittak

Imuam Dawitnu sam; Apsalom nug mameg heeb nauhkkunu heehe, Dawit nug yom.

¹ O Yawe, kekeɗ dahil am kuɗumnab. Ao, kuɗumnab ag da niɗaglagnu hetteb.

² Kuɗumnab ag dahilnu, “Kayak Nug ii ehanidma!” aon atteb. Sila.

³ Amge na, O Yawe, na am dahil guppiɗ daattem. Na binag amahlak oppiaawak ele meɗana, ɠagattag ele da meɗattem.

⁴ Da Yawenu huana gaai, Nug nuhig qaukoppanu, qauko amuam nuhignu tituanak daatte amu, appanu Nug da oɗelppa awom. Sila.

⁵ Yawe Nug da dabmeɗatte amunu, da ukken qein niieye, da eɗuen ahattem.

⁶ Kekeɗ 10,000 eɗitta auta autanab awak ag da heqol laih laih ohppa taliliɗna daatteb amu, da amu dilagnu ii baɗattem.

⁷ O Yawe, na ahan ⌊ehaniɗkkutnu⌋ oɗ medattem. Ao, O Kayak dahil, da nauhpanu awiɗkkutnu unuqidttem! ⌊O Yawe,⌋ na kekeɗ dahilad oh iɗulag mataɗadkkutnu oɗ medattem. Ao, na nau hak danab aelkad maduduadkkutnu unuqidttem!

⁸ O Yawe, na ig ehanikke, ig kekeɗ ihinkad eɗadttem. Na nahipad danab ah itadkkutnu oɗ medattem. Sila.