Sam 29 - Nobonob Baibel

Yawe Nug ɠagattag okkai ele

Imuam Dawitnu sam.

¹ Ag Kayak bekkod amu, ag Yawe Nug binag amahlak oppiaawak ele, ɠagattag ⌊laa oh eɗattak⌋ ele, ag amu doyeg! Ge, ag amu doyeg!

² Yawe onig am binag amahlak oppiaawak ele; ag amu doyeg! Ag Yawenu oppiaawak ele daan, ag Nug noobppa dup nona Nug binag meig!

³ Haen Yawe Nug nai maditte amu, Nug baag oqotti am okkainab, yu oqotti eɗittak. Ao, Kayak, Nug binag amahlak oppiaawak ele. Haen Nug nai maditte amu, Nug baag oqotti am hakkaɗ qette bia. Amu genab, haen Yawe Nug nai maditte amu, Nug baag oqotti am hakkaɗ qak bia, amu yu oqotti okkai ele eɗittak.

⁴ Yawe baag oqotti am ɠagattag. Yo, Yawe baag oqotti am laa nug dagom onig ɠagattag ele baag bia, amge amu eɗidtte.

⁵ ⌊Yawe Nug ɠagattag okkai okkai ele,⌋ Nug baag oqotti ɠagattagppa ad sida qiialadtte. Yo, Yawe Nug Lebanonnu ad sida oppatatte, maha naunau netteb.

⁶ Yawe Nug nuhig ɠagattagppa he, Lebanonnu qauko ag makau gaiɗ laa bia oolna tena, oolna netteb. Nug nuhig ɠagattagppa he, qauko onig Sirion am makau okkai ebehi ele dakkuɗ bau ena mak ele bia oola ta, oola nette.

⁷ Haen Yawe Nug nai maditte amu, nuhig nai am amemɗi awa nette bia maditte.

⁸ Yawe Nug baag oqottinu ɠagattagppa he, atu taɗak uɗaltte. Yo, Yawe Nug he, atu taɗak onig Kades uɗaltte.

⁹ Yawe Nug baag oqotti ɠagattagppa he, ad ɠagattag onig ok uɗaltte. Ao, Nug he, ad atuppanu uɗulkad iitta metteb. Ge, Nug anam he, danab ag nuhig mettid lakka daatteb, ag inam etteb, “Yawe Nug binag amahlak oppiaawak ele!” aon etteb.

¹⁰ Yawe Nug yu okkai gumatte. Ao, Nug king okkai hanhannu daatte.

¹¹ Yawe Nug danab ah nuhikkud ɠagattag madatte. Yawe Nug danab ah nuhikkud itatta, maɗoɗ madatte.