Sam 28 - Nobonob Baibel

Laa Yawe nug ehanidkkunu unuqittom

Imuam Dawitnu sam.

¹ O Yawe, na am kekeɗ niɗamnanu ehanittak dahil daattem. Na da ehaniɗkkutnu oɗ medattem. Na da ii ehaniɗkkut dayeb, da geha laa mauhppig, da amubia daakkul. Anam amu, da anam daapanu na dahil unuqittak dookkutnu oɗ medattem.

² Da na dahilnu oot gai-iitta doon oot meɗan ehaniɗkkutnu unuqidttem imu amu, na dahil unuqittak imu dookkutnu oɗ medattem. Yo, da eppel bahien, nahip lag nahipnu tituanaknab daatte, da eppel amuppa ukke, na unuqidttem imu amu, na unuqittak dahil imu dookkutnu unuqidttem.

³ Na da am nau hak danab ele oh bu mekkamnanu oɗ medattem. Ao, na da danab ah eheɗ hetteb ele laippu bu mekkamnanu unuqidttem. Ag am lailkad mudippan laippu ele nai ena maditteb, amge ag, ag ele nai mattinna amu, ag aɗi eheɗ ahilagppa hekkulagnu oo maittak aotteb.

⁴ Am ag kobol ena iitta, am kobol nau, ag amu hetteb amunu, da na ag ahilag hak ena iitta, am hak nau amu, na amu oh eleleppa bu madakkutnu oɗ medattem. Ao, ag eppelagppa aɗi kobol ena iitta heppig amu, na ag ahilag hak ena iitta amu eleleppa nob madakkutnu unuqidttem.

⁵ Ag Yawe Nug aɗi heumnu dab-ii-metteb. Yo, ag Yawe Nug eppegppa aɗi heum amu, ag dab-ii-metteb. Ag amunu ii dabmetteb amunu, Nug geha lag alag laa bia loppaɗatteb nekkulag. Nug eɗua ii buuma, ag nauhakib nauhkkulag.

⁶ Da Yawe unuqitti, Nug da ehaniɗom amunu, ig Nug binag humatu.

⁷ Yawe Nug am dahil ɠagattagnu diig daatte. Nug am dahil guppiɗ. Da nuhignu oolppa genab doyeye, Nug da ehaniɗe, da gamag ahak doyen, ahi edette, “Ena heme,” attem.

⁸ Yawe Nug danab ah nuhikkud ɠagattag madatte. Yo, Yawe danab king daakkunu goɗen gokkaɗakppa tituanom daatte amu, Nug nug ehanitteb padal ii memanu, Nug nuhig aab aɗ ɠagattagnab elenu ehanittak daatte.

⁹ O Yawe, da na nahipadnab danab ah ehanadppe, ag ii padal memananu, na Israel danab ah, na tituanatte, ag nahipadnab daatteb amu, na ag ele itadkkutnu oɗ medattem! Ao, na sipsip gumak danab laa nug hanhan sipsip dabmadatta, eppegppa aɗualatta ehanatta oitte bia nahipad danab ah dilagppa anam hekkutnu unuqidttem.