Sam 27 - Nobonob Baibel

Unuqittak laa Kayak binag mette

Imuam Dawitnu sam.

¹ Yawe Nug dahil amahlak, dahil Padal ii maknu ehanittak ele daatte amunu, da aun laa baɗidkkul? Ao, Yawe Nug ban haknu aben ɠagattag dahil bia daatte, da amuppa ukken daakkul amunu, da auntai laanu ii baɗapa.

² Haen eheɗ hak danab ag eheɗ heiɗkkulagnu uɗin, da iuglagnu hekkulag amu, ag nena qekkulag. Yo, haen dahil kekeɗ ag banel uɗiglag amu, ag nena qekkulag.

³ Ban hak danab laihnu ag da ele ban hekkunignu uɗin taliliɗkkulag dayeb amu, da ii baɗapa. Genab, dahil kekeɗ ag uɗin iuglagnu hekkulag dayeb amu, da Kayaknu oolppa genab doyeye, Nug ehaniɗkkunu oolppa genab dookkul.

⁴ Keeke laippu laa aakkuib da Yawe, da Nug meɗakkunu oɗ medakkulnu heinne daattem. Yo, keeke laippu aakkuib, da aokkulnunab ool daatte. Keeke amuam, da bau daattem haenppa, da Nug laugppa dayeye, da haen oh, anttak enanag nuhig andette daakkul. Ao, da Nug laugppa da Yawe antten dim lamidkkulnu Nug madikkul.

⁵ Aɗinu? Da Yawenu mettid lag, amuppa ena anam daakkul dayeb amu, uug haenppa Nug da atognoiɗebeb, da eheɗ laa ii anidpa. Yo, Nug da nuhig mettid haknu peh lagppa lokkumiɗeb daappi, uug laa da ii aniɗma. Ge, Nug heeb, da danab laa men okkai attan ena daatte, da amubia ena daakkul.

⁶ Amunu da kekeɗ ag da taliliɗppig daatteb, da ag eɗatten, ool gamag huana ahebeb, mettid haknu peh lagppa mana mettak hekkul. Da ahi edette, musik heinne, Yawe binag humakkul.

⁷ O Yawe, da na dahil unuqittak imu dookkutnu unuqidttem. Ao, na dahilnu oot gai-iitta doon oot meɗan ehaniɗna, ewa unuqittak dahil imu nob mekkutnu oɗ medattem.

⁸ O Yawe, da ool unuqagppanab, na amuppa na dahilnu, “Na da aniɗna dim lamiɗkkutnu, da mattiɗe!” ame amunu, O Yawe, da na anitten dim lamidkkulnu mattidkkul.

⁹ O Yawe, na nakka na lokkumidmananu unuqidttem. Ao, na da, nahip maɗi nid, na dahilnu oot nauheb, di-ii-meɗamnanu oɗ medattem. Na am dahil ehanittak daattem. O Yawe, na da di-ii-meɗan, da ii uuiɗmananu na oɗ medattem. Na amu dahil Kayak, na aakkuib da padal mepanu ehanittak daattem.

¹⁰ Da mamel, anil ele aa uuiɗkkulahtai, aa dahilnu daulah atikkutai, amge na, Yawe, na geha da ehaniɗkkut.

¹¹ O Yawe, kekeɗ dahilad ag da heiɗppeg nauhkkulnu hetteb amunu, na da ib nahip ena ippuniɗna omaiɗppe, ib tutukkuppa gokkulnu oɗ medattem.

¹² Danab laa ag hettoɗiakppa nai hambuppuak dahilnu maditteb amu, ag da guittak nau mauhnoak meɗaglagnu hetteb amunu, kekeɗ dahilad amu ag dabmak ahilag dim lamidna, ag da eɗilna, iuppeg mauhpanu, na da ii uuiɗmananu oɗ medattem.

¹³ Da imunu oolppa genab doottem. Da geha bau daappi ukkeb, Yawe Nug keeke ena dahilppa hekku. Ao, Nug anam heeb amu, da amu anidkkul.

¹⁴ ⌊O danab ah,⌋ ag Yawe Nug ehanadkkunu ameg meig! Ao, ag oolag ɠagattag qena daanna, ag dabmak nau aib aoppig. Ge, ag Yawe ameg meig!