Sam 26 - Nobonob Baibel

Genab tutukku danabnu unuqittak

Imuam Dawitnu sam.

¹ O Yawe, da nahipnu oolppa genabnab doye, nahip neekkakppa da oolppa kaliak laa ii dayeye oimi amunu, na heppe, tutukku hak dahil am miag atiak daakkunu oɗ medattem.

² O Yawe, na da hettoɗilna, ma anttak ele meɗakkutnu oɗ medattem. Ao, na da ool unuqagppa, dahil dabmakppa ele aɗi aɗi daatte, amuam elelete o iittate anidkkutnu unuqidttem.

³ Aɗinu ⌊na anam hekkutnu ool daatte⌋? Da oo mauhaknab kobol nahip hanhan doyeye oittem. Ao, da hanhan nahip nai genab dim lamitten oittem.

⁴ Da hambuppuak danab ele oh ii oittem. Ao, da danab ag laa buppualadtteb, da ag ele ii daattem.

⁵ Da nau hak danab ele oh tamanit daagnignu ool iinab ii hette. Yo, da nau hak aɗi dilagnu awaidttem.

⁶ O Yawe, da kobol laa dubuttid ele hepanu, da dakka da awaitten oiyeye, da na noomppa dup noin binan mekkulnu da nahip qaɗab gukkuitten gottem.

⁷ Appa amu, da na ena hena meɗamenu ahi edettem. Ao, da nahip kobol danab hekkunu elele iitta laa kuɗum, da amunu danab ah amelagppa attem.

⁸ O Yawe, da na laut, na appa daattem ele amu, da nahip lag amunu ool huananab hette. Ao, da nahip lag, binag amahlak oppiaawak ele nahip appa ana daatte amu, da lag amunu ool huana hette.

⁹ Na hipunin danab eheɗ hadappe nauhppeppeg, na ag da ele oh hegappe, da ag ele oh nauhkkunignu ii hemananu oɗ medattem. Ao, na danab ag lailkad aqaeg mauhtteb ele eheɗ hadappe mauhppeppeg, na da ag ele oh hegappe, da ag ele oh mauhkkunignu ii hemananu unuqidttem.

¹⁰ Danab amu ag eheɗ laa hekkulagnu lokkumakppa doonna, maittak eheɗ haen oh aotteb. Ao, ag danab laa eppelagppanu lokkumakppa eheɗ haknu ehanittak aoglagnu eppelag bahin daatteb.

¹¹ Amge da amu, da oolppa nahip neekkakppa kobol kaliak laa iitta ele dayeye oittem amunu, na dahilnu oot gai-iitta doon oot meɗan ehaniɗna, da qagaiettakppanu eɗua uhuqak hekkutnu oɗ medattem.

¹² Da aben enanagppa daattem amunu, da Israel dilag tamaniak oolagppa, da Yawe binag mekkul.