Sam 25 - Nobonob Baibel

Atognoa dabmettaknu ele unuqittak

Imuam Dawitnu sam.

¹ O Yawe, da gemu na unuqidttem.

² Da na Kayak, da nahipnu aakkuib tutukku oolppa genab doottem. Na heppe, laa ag da eɗilppeg, uɗal ii nemanu unuqidttem. Ge, na kekeɗ dahil uuadppe, ag da eɗilon, oolag gamag ahamanu oɗ medattem.

³ Danab ag nahipnu oolagppa genab dootteb amu, kekeɗ ag ii eɗadtteb, amge danab ag doonna, laa naunab hambuppuidtteb amu, ag uɗa nak aotteb.

⁴ O Yawe, na nahip ib ippuniɗkkutnu oɗ medattem. Ao, O Yawe, na nahip ib attem attem gotte appe dookkulnu unuqidttem.

⁵ Na heppe, da nahip doyak diig genabib doyen, dim lamittei! Aɗinu? Na am dahil Kayak, na am dahil padal mepanu ehanittak daattem. Da deɗ oh amun tuqan ele nahipnu oolppa genab doottem.

⁶ O Yawe, anukkanu na oo mauhaknab kobol nahip, oo gai-iitta doya oo metta ehanittak kobol nahip ele hee uɗiom amunu, gemu ele na dabmenana, tuɗidna anam hekkutnu oɗ medattem.

⁷ Da nid bau dayeye hipunin qein, nai tappe nak kobol ele dim lamidmi amu, na amu oh uhuqna meɗan, dab-ii-mekkutnu oɗ medattem. O Yawe, na enaib daanna, enaib hettem, amunu, na oo mauhaknab kobol nahip dim lamidna, dahilnu ena hekkutnu unuqidttem.

⁸ Yawe Nug diig ena, diig tutukku ele amunu, Nug hipunin danab ib ena dim lamidkkulagnu oo daye, Nug ib amu ag ippunadtte.

⁹ Nug danab ag akka ag onilag qeeg ne oitteb ele, am ib tutukku ippunadtte. Ao, Nug danab ah amu, nuhig kobol ena tutukkunab ele ippunadtte.

¹⁰ Am danab ah aun aɗi ag Yawenu nug tituana nai qakkak dim lamidtteb, ag nuhig nai ele oh waappa daan, dim lamidtteb ele amu, Yawe Nug oo mauhaknab kobolppa, oo metta ii uuak kobolppa ele ag ehanadtte.

¹¹ Da hipunin kuɗumnab hemi amunu, O Yawe, na oninnu dabmak anuqak awaknu amu, na hipunin dahil uhuqadna meɗakkutnu oɗ medattem.

¹² Am danab ah ag Yawenu ebehilag oh bodoetta le mette ele, Nug geha ag ib attenppa oiglagoitte amu, Nug ib amu ippunadkku.

¹³ Agnab amu, ag keeke kuɗum ele daappeg, ahilkad nid ag geha ahilag wanppa daaglag.

¹⁴ Laa ag Yawenu ebehilag oh bodoetta le mette amu, Yawe Nug ag ele layam batatte. Nug ag ehanatte, ag nuhignu nug tituana nai qakkak nainu meu dootteb.

¹⁵ Yawe Nug geha da, dahil kekeɗ ag pelem meppigppa nopanu atognoiɗkku amunu, da hanhan Nugib ehaniɗkkunu neekkitten daakkul.

¹⁶ O Yawe, da bael laippu dayeye, uug okkai doottem amunu, na neekkiɗna, dahilnu oot bodoetteb enanag maɗoɗ ele hekkutnu oɗ medattem.

¹⁷ Ao, na keeke oh uug meɗatteb ele heppe iitta meeb, da oolppa maɗoɗ dookkulnu unuqidttem.

¹⁸ Keeke oh da uug digdig meɗatteb amu, na keeke amu oh dabmena, heppe iitta mekkunu, na hipunin dahil oh ele uhuqadna meɗakkutnu oɗ medattem.

¹⁹ Ao, kekeɗ dahilad kuɗumnab bena, ag dahilnu nau ninig ele naunab dootteb amunu, da na amunu dabmekkutnu unuqidttem!

²⁰ Kekeɗ ag da iumnanu, na ehaniɗppe, da qagaiettak amuppa ii daapanu oɗ medattem. Da uɗa nak ii doopanu unuqidttem. Aɗinu? Na am padal mak eɗitteb ena dayaknu ehanittak dahil daattem.

²¹ Am da na amen mein daattem amunu, dabmak oiyak ele tutukkuib dim lamittak kobol, am genab tutukku hak kobol ele, aa hepeɗ, da ena daakkulnu oɗ medattem.

²² O Kayak, na Israel danab ah uugnu qagaiettakppanu eɗua uhuqak hekkutnu oɗ medattem.