Sam 24 - Nobonob Baibel

King laa oh eɗattaknu nai

Imuam Dawitnu sam.

¹ Wan, amu keeke oh wanppa daatteb ele am Yawenuib. Yo wan, amu wanppan danab ah oh amu nuhigib.

² Aɗinu? ⌊Digmak haenppa leib dayom, amge⌋ Yawe Nug he, wan ba, le eɗitta dayom. Ao, Nug he, wan le eɗitta ba, ɠagattag dayom.

³ Aun am Yawenu qaukoppa ta, Yawe noobppa daakkunu elele? Aun nug Yawenu aben, aben amuam Yawenu tituanak daatte amu, aun nug aben amuppa daakkunu elele?

⁴ Amuam laa ag oolagppa oppiak ele, agib appa daaglag. Yo, amuam laa ag dottolag eppelagppa hoyadppig dilagnu dup noa binag mak kobol ii hetteb, agib appa daaglag. Ge, amuam laa ag hambuppuak nai laanu ag ahilag nai ɠagattag qena ana, ag nai amunu, “Am nai genab,” ii maditteb ele, agib appa daaglag.

⁵ Aun aɗi ag anam hetteb ele amu, ag geha Yawenu itittak ena aoglag. Ao, Kayak, Nug ag padal memananu ehanittak ahilag daatte amu, Nug ahilagnu, “Ag am genab tutukku hak danab,” dookku.

⁶ Danab ah ag anam daan oitteb amu, ag Kayak anidna dim lamidkkulagnu Nug maditteb. Yo, danab ah ag na, Kayak, na Jakopnu Kayak, ag na anidna dim lamidkkulagnu na mattidtteb amu, ag anam daan oitteb. Sila.

⁷ Ag od anukkanu matulateg! Yo, ag od anukkanabnu matulateg! Ag King binag amahlak oppiaawak ele, ag Nug ooppa uɗikkunu ag od anam matulna, ib metteg!

⁸ King Nug binag amahlak oppiaawak ele amu, Nug am aun? Nug am Yawe. Nug ebehi naɗi ele. Nug am Yawe, Nug nuhig kekeɗ oh, ban hak haenppa eɗadtte.

⁹ Ag od anukkanu matulateg! Yo, ag od anukkanunab matulateg! Ag King binag amahlak oppiaawak ele, ag Nug ooppa uɗikkunu ag od anam matulna, ib metteg!

¹⁰ King Nug binag amahlak oppiaawak ele amu, Nug am aun? Nug am Yawe Nukka Ɠagattag Oh Ele. Yawe Nukka Ɠagattag Oh Ele Nug am King binag amahlak oppiaawak ele. Sila.