Sam 22 - Nobonob Baibel

Danab ooppa guittak okkai doya gaya, eɗua dabmak laa awa, Yawe binag meum

Imuam Dawitnu sam; Dawit nug danab kwaia gumattenu yom. Danab ag sam imu ahi ettaglag amu ag ahi baag laa, ahi amu onig “Dia Anig Gait Gigitteppa Aha Oitte” amu, ag ahi baag amuppa ahi imu ettaglag.

¹ O dahil Kayak, O dahil Kayak, na aɗinu da uuiɗmenu diig appe dookkulnu, na dahilppanu uma wana qagaiettakppa daapanu ii ehaniɗttemnu diig appe dookkulnu, amu na dahil gayak ii doottemnu diig ele appe dookkulnu oɗ medattem.

² O dahil Kayak, deɗ oh amunppa da nahipnu ettem, amge na oɗelppa ii aottem. Yo, tuqan oh da unuqidttem, amge da oo mak laa ii anidttem.

³ O Kayak, na sia king nahip-ppa oppiaawak daattem. Na king dayeye, Israel danab ah ag na tuɗid ele binan metteb.

⁴ Ig mamenkad aɗi ag nahipnu oolagppa genab dooppig. Yo, ag nahipnu oolagppa genab doyeg, na ag ehanatte, qagaiettakppa ii daappig.

⁵ Na ag ehanadkkutnu unuqidppig doona, na ag ehanatte, ag padal ii meppig. Yo, ag nahipnu oolagppa genab dooppig, amu na ag ehanatte, ag uɗalag ii neum.

⁶ Amge da amu maɗuai laa bia. Da am danabnab daatte bia ii daattem. Danab ah laa oh ag dahilnu oolagppa ena iinab doonna, ag dahilnu, “Keeke hamunab” dootteb!

⁷ Laa oh ag da aniɗna, ag da aon aon iutteb. Yo, ag da aon aon naunab niɗan, ikkilkad matuɗtteb.

⁸ Ag atteb. “Nug aakkute nug Yawenu ooppa genab dootte? Anam am Yawe Nug ehanitteb, qagaiettakppa aib dayom! Yo, nug Yawenu enanagnab dootte amunu, Yawe Nug ehanitteb, qagaiettakppa aib dayom!” aon atteb.

⁹ Amu ag anam aakku atteb, amge Yawe, na da ehaniɗe, da anil menuiɗom. Ao, da qapik daami amu, na da ehaniɗe, uug okkai laa dahilppa ii be, amuppa na da nahipnu oolppa genab dookkulnu ippuniɗme.

¹⁰ Da domi haenppanu uɗie, gemu ele na da atognoiɗkkutnu aakku daame. Laa amu hekkunu elele iitta. Yo, anai da menuiɗom, haen amu digma uɗiak, na dahil Kayak daattem.

¹¹ Uug am miag daatte, auntai laa ehaniɗkkunu am elele iitta amunu, na awaittak uma daamnanu oɗ medattem.

¹² Dahil kekeɗ ag da makau dawai kuɗum danab talilidna daatteb bia heppig daatteb. Yo, ag wan onig Basannu makau dawai ban paha paha hetteb danab talilidna daatteb bia taliliɗppig daatteb.

¹³ Am laion gaanna, oɗelag aahena, doɗ laa banelag gotteb, amubia kekeɗ dahil ag anam henana, da banel uɗitteb.

¹⁴ Am danab laa nug le gokkaɗe ukkom bia, da mauhkkulnu male daattem. Da ebehilad oh am autak daatteb. Da oolppa ɠagattag iittanab. Ao, uppuh teɗ gakkaɗakppa le mette bia, da ool ɠagattag iitta daatte.

¹⁵ Hinai ooppa le qaɗaietta, le nakok laa iinab daatte bia, da oolppa ɠagattag iittanab. Am danab le iittanu mauhkkunu heehe, lemaɗu oɗe qataqette, amubia da mauhkkulnu male daami. Ge, na hee, da danab beɗu gai-iittanab dayaya, gappudppa niiaya, mauhkkunu hette bia, da mauhkkulnu hettem.

¹⁶ Kekeɗ dahil ag qai ameg laa bia, ag da taliliɗppig daatteb. Yo, nau hak danab ameg laa, ag da taliliɗna daatteb. Laion danab beɗu emale nauhtte, amubia ag da eppel, bael ele heeg nauhppig.

¹⁷ Da am danab ebehinab tak, nug nuhig ɠagattag iitta dootte, da amubia doottem. Dahilad kekeɗ ag amelag behabe, da neekkiɗnana, “Enanagnab anam daatte,” atteb.

¹⁸ Ag lamen dahil otin, akka akka aotteb. Yo, ag om yaan, lamen dahil aotteb.

¹⁹ O Yawe, na dahilnu awaidna, uma daamnanu oɗ medattem. Na am dahil ɠagattag, na paha dona ehaniɗkkutnu unuqidttem!

²⁰ Laa qep-ppa iweb mauhpanu, na da ehaniɗppe qagaiettakppa ii daapanu oɗ medattem. Yo, na da ehaniɗna heppe, dahil kekeɗ ag qai bia amu, ag da ii iumnanu unuqidttem.

²¹ Na da ehaniɗppe, laion laa oɗe aaha emaiɗma, da na oɗ medattem. Yo, na ehaniɗppe, makau okkai ebehi ele dakkuɗ qeqeɗilagppa yaaiɗppeg, da padal mepanu unuqidttem.

²² Na anam heppe amu, da geha da lailad amelagppa nahipnu madikkul. Yo, nahipad danab ah noolagppa, da na binan humakkul.

²³ Ag aun laa ag Yawenu ebehilag oh bodoetta le mette amu, ag Yawe onig humeg! Yo, ag Jakop buɗub oh ag, ag Nug binag meig! Ge, ag Israel buɗub oh, ag beɗulag bodoetteb, le maɗ!

²⁴ Aɗinu? Yawe Nug danab ah ag gai-iitta daatteb dilagnu ooppa uuaknab ii dootte. Nug ag ii geɗadtte. Ao, Nug ag ii uuadtte. Nug ehanittak aoglagnu ewak ahilag dootte.

²⁵ Israel dilag tamaniak oolagppa da na binan mekkul. Ao, da geha genabnab haknu nai ana qakkak dahil dabmein, aun aɗi ag nahipnu ebehilag oh bodoetta le mette ele amu, da ag noolagppa nai amunu meu okkunu hekkul.

²⁶ Daɗek ag ee lappeg, oolag didikku. Amu aun aɗi oh ag Yawe anidna dim lamidkkulagnu Nug maditteb, ag Nug binag mekkulag. Maɗoɗppanu gamag ahak ii tuqa aotte ele amu, Yawe Nug heeb, ag gamag ahak amu aon daan oiglag.

²⁷ Wan oh geha Yawe doona, Nug dim lamidkkulag. Yo, danab ah wan ohppan ag Nug noobppa dup nokkulag.

²⁸ Aɗinu? Yawe, Nug am king. Nug wan imuppan wan anen anen oh gumadtte.

²⁹ Dada hak danab ah ag Nug noobppa dup nokkulag. Yo, aun aɗi ag bau daan mauhtteb, ag Nug noobppa dup nokkulag.

³⁰ Laa butti aɗi dokkulag, ag Nug waappa daan, nuhig maɗi nid maɗi ah ele daaglag. Yo, laa amu ag Naɗi aɗi aɗi heumnu appeg dooglag.

³¹ Geha danab ah ag genab tutukku hak kobol, Naɗi Nug dim lamitta hette ele, ag laa dimppa menuadkkulag amelagppa madippeg dooglag. Aɗinu? Naɗi Nug amu heum.