Sam 20 - Nobonob Baibel

Kekeɗ eɗattaknu unuqittak

Imuam Dawitnu sam; Dawit nug danab kwaia gumattenu yom.

¹ ⌊Danab ah ag unuqidppig.⌋ “Haen uug nau na tonidtte amu, ig Yawe Nug nahip unuqittak doya, ehanidkkunu oonig daatte. Yo, ig guittak ohppanu Jakop buɗub dilag Kayak Nug na dabmedakkunu oonig daatte.

² Yawe Nug nuhig mettid lakkanu na ehanidkkunu oonig daatte. Yo, Nug ɠagattag, nuhig mettid lakka Sion appanu medakkunu oonig daatte.

³ Nug keeke oh na Nug medattem ele amu, Nug dabma, ⌊na ehanidkkunu⌋ oonig daatte. Yo, ig nahip manaknu ofa na hena medakkut amu, Nug ena doya aokkunu oonig daatte. Sila.

⁴ Ig na oot unuqagppa aɗi keekenu oot hette amu, Yawe Nug na medakkunu oonig hette. Ao, Nug na ehanitteb, keeke oh na hekkutnu maittak aottem amu, keeke amu oh ena bekkunu oonig daatte.

⁵ Yawe Nug heeb, na nahip kekeɗ eɗadppe, ig geha gamag ahak naɗi aognignu oonig daatte. Ig pilak laala, yaak amuppa Kayak binag mette ele qappaladpput daaglagnu oonig hette. Yawe Nug nahip unuqittak oh nob mekkunu oonig daatte.”

⁶ ⌊Danab ah ag anam unuqitteg, laa nug aum.⌋ “Gemu amu, da imu doottem. Yawe Nug laa king daakkunu goɗen gokkaɗakppa tituanom ele amu, Nug geha king amu padal memanu ehanidkku. Yawe Nug hab aabppanu, hab aab am nuhignu tituanak daatte, Nug appanu kingnu nai doya, nai nob medatta, Nug nug nuhig ɠagattag okkaippa ehanitteb, qagaiettakppa ii daama.

⁷ Aabaab laa ag ena ɠagattag daaglagnu ag ahilkad ban daup, amu bannu keeke elenu oolagppa genab dootteb, amge ig amu, ig Yawe, ihinig Kayak, ig nuhignu oonigppa genab doottem.

⁸ Aabaab amu ag gatelag qaun ona daan, ag geha nena qena autnanab aoglag, amge ig am ahat, alet anam hippaitta daagnig.” Laa nug anam aum.

⁹ Anam a, danab ah ag appig. “O Yawe, na ihinig king kekeɗ eɗadkkunu ehanittak okkai medakkutnu oonig daatte! Na ihinig unuqittak doon ehanigkkutnu oonig daatte,” aon appig.