Sam 2 - Nobonob Baibel

King, Yawe Nug tituanom

¹ Aɗinu wanppan wan anen anennu danab ah ag dabmak eheɗ aon ahatteb? Ao, aɗinu wanppan huu ag maittak meu ena ii oma ele dim lamidna, ahilag haen aakku kakidtteb?

² Wanppan king, amu wanppan okkai ele ag qagmena, maittak nau aon, ban hekkulagnu bappaidtteb. Ao, ag oh ag Yawe, amu laa Yawe king daakkunu goɗen gokkaɗakppa tituanom ele ban hekkulagnu dabmetteb.

³ Ag atteb. “Ig hepput, aa ihinig okkai iinab daamya. Ao, ig heta, ig ahilah ɗo waappa baula iinab daamta” aon atteb.

⁴ Ag anam hetteb amge Naɗi, Nug hab attan daatteppa appa sia kingppa dayaya, Nug ahilag dabmak amu antta, Nug ag imadtte. Ao, Nug ag dabmettebnu huan imatte.

⁵ ⌊Yawe Nug ahilag dabmak amunu, am keeke hamu doyaya,⌋ Nug oo nauhehe, ag nau hettebnu daulag batatte. Nug ahilag haknu ele oppoɗi huan beebe, Nug ag amelagppa ag eheɗ hettebnu mattieye, ag huan baɗatteb.

⁶ Nug amelagppa mattiaya, Nug atte. “Da hei, laa da tituanmi ele, nug Sion appa, king daatte. Ao, qauko Sionnu amu, qauko amu dahilnu tituanak daatte.” Yawe Nug anam awa atte.

⁷ Amu king amu, Yawe tituana, Sion appa meum ele, nug atte. “Da ɗo laa Yawe meum daatte amu, da amunu appi dooglag. Nug da amelppa inam aum. ‘Na am da Bekkal; gemu amu, da na Mamen bemi daattem.

^8-9 Na da oɗ meɗappe, da wanppan wan oh tituanatte, na aut daaglagnu na medakkul. Ge, wan atu oh am nahip daakku. Na kingnu qakun aenppa hak aɗan, wan oh dilag danab ah elelenab ɠagattag gumadkkut. Ao, na danab ah nau hetteb amu, na heppe nauhkkulag; danab nug waa makkuɗe aoɗtte, amubia.’ ” Yawe Nug da amelppa anam awa aum.

^10-11 Amunu ag king daatteb amu, ag doyak dabmak ena ele awaknu nai imu doyeg! Ao, ag wanppan danab okkai, ag nau aomnanu dabmettak nai imu tutukku aweg! Ag Yawenu ebehilag oh bodoetta le meeb, ag Nug waappa daan Nug oɗe dim lamitteg! Ag Yawenu oolag gamag ahaɗ! Amge ag Nug noobppa nau hemananu ele baɗeg!

¹² Yawe Nug ahilagnu oo nauheb, ag nauhmananu amu, ag Yawe bekka waappa daan, Nug oɗe dim lamitteg! Aɗinu? Yawe, nuhig oppoɗi bak kobol nau haknu am paha ahatte. Amge danab ah ag Nug waappa padal mak eɗitteb ena dayaknu ehanittak aon daatteb amu, ag itittak ena aoppig daatteb.