Sam 19 - Nobonob Baibel

Keeke oh Kayak Nug hattom, keeke amuam Nug binag amahlak oppiaawak ele ippunigtte

Imuam Dawitnu sam; Dawit nug danab kwaia gumattenu yom.

¹ Kayak binag amahlak oppiaawak ele attemu daatte amu, hab attannu keeke amu ippunigtteb. Ao, Nug keeke okkai okkai hette amu, hab waappan keeke ag amu ippunigtte.

² Deɗ anen anenppa habppan keeke ag amu ippunigtteb. Ge, tuqan oh habppan keeke ag Kayaknu doyak ippunigtteb.

³ Danab ah nai ohppan ag hab attannu, hab waappan keeke ele anadnana, ag amuam Kayak heum anam dootteb.

⁴ Keeke amu oh baalag am wan atu ohppa ukka malom daatte. Yo, ahilag nai amu wan oh tualom daatte. Yawe Nug he, aam dayaknu aben am hab waappa daatte.

⁵ Buttua aam nug baaba, nug danab ah aokkunu hette bia daatte. Yo, aam nug laa nug qaiedatta, danab laa oh eɗadtte, nug gemu qaiettak amubia laa hekkunu gamag ahak dootte amu, aam am amubia daatte.

⁶ Aam nug hab waappa laihnu ba, ippu dim lamitta ukka, laih notte. Keeke laa am aamnu gakkaɗak qe-eɗidkkunu elele iitta.

⁷ Yawenu ɗo am ena eleleib; am danab ah ehanatte, ag bauklel daatteb. Yo, danab ah ag Yawenu ɗonu genab elele dooglagnu elele; ɗo amu ag heeg, danab ah ag doyak ii awak daatteb, ag doyak dabmak ena ele aon daatteb.

⁸ Yawenu oo yaak nai ɗo bia oh am tutukkunab; amuppa danab ah ag oo gamag ahak aotteb. Ao, Yawenu ɗo oh am amahlak ele; amuppa danab ah ag aɗi kobol, aɗi keeke am tutukku amu, ag anidtteb.

⁹ Amu Yawenu ebehi oh bodoetta le mekkunu kobol amu, kobol amuam ena eleleib; am oppiak ele. Am hanhan daakku. Laa nug tuqa ii aoma. Yawenu ɗo oh am doyak diig genabib, amuppanu betteb. Ag oh am genab tutukkuib daatteb.

¹⁰ Gol am nakok ena. Ge, gol ena dubuttid iitta ele kuɗum am nakok ena. Amge Yawenu ɗo oh am enanagnab. Uppuh leppu amu ubuhi ele. Ge, uppuh leppu teɗuppanu am ubuhi enanag. Amge Yawenu ɗo oh amu, am amu eɗidtte.

¹¹ Am da, nahip maɗi nid, da nahip ɗo aɗe dabmedakkul dayeb amu, da eheɗ hein, nau aopanu dabmak meɗakku. Danab ah ag aɗan dabmettaglag dayeb amu, ag geha nob ena okkainab aoglag.

¹² Auntai laa nug nuhig eheɗ hak doyaya ii hette oh ele, nug amunu oo maittak aokkunu elelete? Laa iitta. O Kayak, na oot da meɗan, hipunin da doyeye heinne, ii hettem ele amu, na uhuqna meɗakkutnu oɗ medattem.

¹³ Keeke laa amu, na oot da, nahip maɗi nid, na da meɗan ehaniɗna heppe, da doyeye hipunin ii hepanu unuqidttem. Ao, na oot da meɗan ehaniɗna heppe, hipunin amu da ii gumiɗmanu oɗ medattem. Na anam hekkut amu, da oolppa nahip neekkakppa kaliak laa ii daama. Yo, da hipunin laa, okkai naɗi daatte amu, da amu ii hein, beɗulppa aab ii daama.

¹⁴ Na oot da meɗan ehaniɗna heppe, da na oot daatte amuib akkulnu, amu da aɗi keekenu dabmak unuqag awewe daakkul amu, da na oot hette biaib amu hekkulnu oɗ medattem. O Yawe, na am kekeɗ niɗamnanu ehanittak dahil, qagaiettakppanu eɗua uhuqaknu ehanittak dahil ele daattem.