Sam 17 - Nobonob Baibel

Danab laa eheɗ laa ii heum elenu unuqittak

Dawitnu Unuqittak.

¹ O Yawe, da keeke laanu oɗmak hettem imu amu, oɗmak amuam genab tutukku elenu, amu na doon ehaniɗkkutnu unuqidttem. Ao, na da ehaniɗkkutnu gaattem imu dookkutnu oɗ medattem. Da hambubuitten, na ii unuqidttem amunu, na dahil unuqittak imu daut human dookkutnu oɗ medattem.

² Danab ah ag da eheɗ ii hemi anidkkulagnu amu, na heppe, amu miag atiak daakkunu oɗ medattem. Ao, na aɗi hak am tutukku, na amu doon anidttem amunu, na anam hekkutnu unuqidttem.

³ Na dahil dabmak attemu amu anidna malame. Ao, na da ool attemu daatte amu, tuqanppa na anidna malame. Na da pehettananab aniɗna doottem, da eheɗ laa ii hein oimi. Da nai mattiak dahilppa eheɗ laa ii hein oimi.

⁴ Da nahip ɗo dim lamitti, ɗo amu heeg, layag guittak mettaknu tiilagppa daatte dilag kobol, da kobol amu ii hemi.

⁵ Da na ippunppa oimi. Ao, da na dim lamittaknu ii uumi.

⁶ O Kayak, na da oɗelppa aon ehaniɗttem amunu, da na unuqidttem. Anam amu, da unuqidppippi, na daut human dookkutnu oɗ medattem.

⁷ Nahip oo mauhaknab kobolnu amu, na amuppa da ehaniɗppe, da padal mepanu oɗ medattem. Laa ag ahilag kekeɗ ag guittak ii mattamnanu, na waatppa padal mak eɗitteb ena dayaknu ehanittak aon daaglagnu nahip-ppa uɗitteb ele amu, na nahip ɠagattag okkaippa ag ehanatte, ag ena daatteb.

^8-9 Na keeke laanu na oot huana hette ele dabmedattem, amubianab na kekeɗ, ag da taliliɗna iuglagnu hetteb amu, na ag amu ii hemananu na dabmeɗakkutnu unuqidttem. Yo, matuk anig nug nag haug waappa lokkumadtte bia, na nau hak danab ag da banel uɗin, heiɗppeg nauhkkulnu hetteb amu, na ag amu hemananu da atognoiɗkkutnu oɗ medattem.

¹⁰ Kekeɗ dahilad ag oo gai-iitta doya oo metta ehanittak kobol iinab hetteb. Ag akka ag oɗelagppa ag beɗuppa tak nau nai madittem.

¹¹ Ag da bael mattan uɗin, gemu ag taliliɗna daatteb. Ao, ag da buɗilppeg wanppa nokkulnu dabmenan daatteb.

¹² Ag am laion laa enug qak doya, doɗ laa qa lakkunu daatte amu, ag amubia daatteb. Yo, ag am laion bau laa lokkuma dayaya, doɗ laa qa lakkunu ameg ma daatte bia daatteb.

¹³ O Yawe, na ahan, na ag banelag daan eɗadppe, ag nena qekkulagnu oɗ medattem! Ao, nahip qep elab amuppa da ehaniɗppe, da nau hak danab eppelagppa ii daapanu unuqidttem!

¹⁴ O Yawe, na da nau hak danab, ag da kekeɗal nau, da danab anam waalagppa daapanu ehaniɗkkutnu oɗ medattem. Ao, na danab ag wan imuppan keeke aakkuib aoglagnu hik aqadtte amu, da ag waalagppa daapanu ehaniɗkkutnu unuqidttem. ⌊Me, O Yawe,⌋ na laa na ahilagnu oo mauhak huanak doottem ele, na amu dilag ee ele madattem. Ao, ag bekkalkad ele am keekenu tutu mak ii daatteb, ag keeke kuɗum ele. Ag alalkad ele keeke elele aotteb.

¹⁵ Amu da, da genab tutukku hak kobolppa na anidkkul. Haen da niiak abenppanu ahen, na anitten amu, da elelenab dookkul.