Sam 16 - Nobonob Baibel

Dawit Nug Yawe Nug nug atognokkunu unuqittom

Imuam Dawitnu sam.

¹ O Kayak, na da padal mak eɗitten ena daakkulnu ehanittak daattem. Da nahip-ppa ehanittak amu aottem amunu, da na atognoiɗppe ena daakkulnu oɗ medattem.

² Da Yawe amegppa inam ami. “Na aakkuib, na dahil Naɗi daattem. Keeke ena oh da eppelppa daatteb amu, na eppenppanu uɗiom.” Da anam amegppa ami.

³ Amu Yawenu danab ah ag nuhignu oo metta ii uuak kobol dim lamidna ihinig wanppa daatteb, ag am danabnab, ahnab ele daatteb. Da ahilagnu enanagnab doottem.

⁴ Danab ah ag kayak laa noolagppa dup nona binalag metteb, amuam kayak hambuppuak, danab ah amu ag akka ahilagppa uug qagmetteb. Ao, haen ag doɗ laa main, kayak ahilag madatteb amu, da ag oolagppa ii daapa. Da ahilag kayak noolagppa dup noin binalag ii mepa.

⁵ O Yawe, keeke ena oh da eppelppa daakkunu elele amu, na nakka keeke amu oh abenlag aon dayeye, na da ele daattep amunu, da ena, elele daattem. Na hee, da ɠagattag daattem.

⁶ O Yawe, Israel ag Kanan wan aon, ag haen amuppa aben aben enanag panin aoppig amu, amubia na dahilnu hena autna aome. Yo, danab laa nug kainonab ma, nug nuhig keeke enanagnab pania, ag aulag daakkunu nuhikkud nid madatte bia, na da keeke enanagnab kuɗum meɗame.

⁷ Da Yawe, Nug ulum ena da meɗatte amu, da Nug binag mettem. Nug amunppaib ii hette. Iitta. Nug tuqanppa ele dabmak dahil, ool unuqagnab daatte amu, amuppa Nug da doyak ena aokkulnu da daul batatte

⁸ Da haen oh bau dayeye, Yawe neekkidttem. Yawe Nug hanhan ouiwa daatte anidttem. Nug da ele ouqeɗa, ɠagattag meɗatte amunu, keeke laa da ii uɗaliɗma.

⁹ Diig amunu da ool gamag ahehe, da oo gamag ahak ahi edattem. Ao, da dimppa ena daakkulnu doottem.

¹⁰ Aɗinu? Na geha da ii uuiɗmana amunu, da mauhak daatteb abenppa ii daapa. Ao, geha na nahip Laa Oppiaawak Ele, na nug ii uuidmana amunu, Nug beɗu ii nauhma.

¹¹ Na bau dayaknu ib da ippuniɗme. Ao, na da ele daattep amunu, da maɗoɗppan gamag ahak okkainab doottem, Ge, haen da na eppen naɗiap-ppa dayeye, da enanag doottem, hanhan anam dookkul.