Sam 149 - Nobonob Baibel

Yawe binag maknu ahi laa

¹ Ag Yawe binag meig! Ao ag ahi bau Yawenu etteg! Ge, ag danab ah ag nuhignu oo metta ii uuak kobol dim lamidtteb ele, ag Nug binag meig!

² O Israel danab ah, laa Nug ag hattomnu gamalag ahaɗ! Ao, Sion danab ah, ag Yawe, ahilag king, ag nuhignu gamag ahak naɗinab doyeg!

³ Ag ahi goɗanna, Nug binag meig! Ao, ag tambarin, harp ele henana, binag meig!

⁴ Ag amu hekkulagnu diig am Yawe Nug nuhikkud danab ah dilagnu enanagnab dootte. Ao, Nug danab ah ag akka ag onilag qeeg nette amu, Nug ag padal memananu ehanadtte.

⁵ Nug anam aakku hette amunu, danab ah ag Yawenu oo metta ii uuak kobol dim lamidtteb ele, ag Yawe ag binalag okkai mattomnu gamag ahak okkai doyeg! Ao, ag niiak abenppa niinna, ag gamag ahak okkainab doon, ahi etteg!

⁶ Yawenu danab ah amu ag oɗelagppa Kayak binag menana, ag eppelagppa qep elab aeg laih laih oh ele aɗeg!

⁷ Ag wan atu laih laih danab ah eɗadna autna aoglagnu ag wan atu laih laih danab ah bu mattaglagnu

⁸ ag wan laala dilag king baelkad eppelkad senppa hippaladkkulagnu ag wan laala dilag ikki danab eppelkad, baelkad qakkalattaknu keeke aenppa hakppa hippaladkkulagnu amu,

⁹ ag Yawe Nug hekkulagnu aum bia, ag wan laappan danab ah bu anam mattaglagnu, ⌊ag anam heig⌋! Ag anam hena, amuppa ag, ag am danab ah ag Kayaknu oo metta ii uuak kobol dim lamidtteb ele, ag binag amahlak oppiaawak ele aoglag. Ag Yawe binag meig!