Sam 148 - Nobonob Baibel

Laa nug keeke oh Yawe heum Nug binag mekkulagnu aum

¹ Ag Yawe binag meig! Ao, keeke oh hab attan daatteb amu, ag Yawe binag meig! Ge, keeke oh habppa daatteb amu, ag Nug binag meig!

² Nuhikkud engel, ag Nug binag meig! Ao, hab daup oh, ag Nug binag meig!

³ Aam, kalam ele, aa ⌊danab ah Nug binag metteb bia, aa⌋ Nug binag meiɗ! Hoɗoppai amahaltteb ele amu, ag ele ⌊danab ah Nug binag metteb bia, ag⌋ Nug binag meig!

⁴ Hab attan ukke ukke, adekku batatte, hab amu ⌊na danab ah Nug binag metteb bia, na⌋ Nug binag mee! Le attan daatte ele amu, ⌊danab ah Nug binag metteb bia, na⌋ ele Nug binag me!

⁵ Aɗi keeke daatte amu, Yawe Nug a beppig amunu, keeke oh Yawe heum ele, keeke amu oh Nug binag meig!

⁶ Yawe Nug keeke oh ag abenlagppa, appa hanhan daaglagnu maattom. Ao, Nug ɗo ag amuppa daaglagnu aum amu, nai amuam ii eɗuma.

⁷ Keeke oh wanppa daatte amu, ag oh ⌊danab ah Nug binag metteb bia, ag⌋ Yawe binag meig! Keeke amuam inam: yuppanu doɗ okkai okkai, yuppan doɗ laala yu unuqagnab daatteb,

⁸ amemɗi, ais doɗo, sno, lombig, gu, amu ulah naɗi, Nug aɗi haknu a hette ele,

⁹ qauko, qauko nakok oh, ad meu otteb, ad sida,

¹⁰ doɗ dakkuɗ, doɗ manan, doɗ naunau, ai hagagaɗtteb ele,

¹¹ wanppan king, wanppan danab ah laa, danab king tiigppan doak, wanppan danab okkai laala,

¹² danab bau, ah makkun, danab kaino, nid naunau ele.

¹³ Amu oh ag Yawe binag meig. Aɗinu? Nug keeke oh eɗadtte; Nug onig okkai ele attannab daatte. Nuhig ɠagattag okkai naɗi ele am ɠagattag okkai naɗi ele wanppanu, habppanu ele eɗidtte.

¹⁴ Yawe he, laa nug nuhikkud danab ah dilag king daatte. Laa aun aɗi ag nuhikkud danab ah daatteb, ag nuhignu oo metta ii uuak kobol dim lamidtteb ele, ag king amu binag mekkulagnu elele. Ao, Israel danab ah ag Yawe guguittak daatteb, ag king amu, ag Nug binag mekkulagnu elele. Ag Yawe binag meig!