Sam 147 - Nobonob Baibel

Yawe, Nug ɠagattag oh ele, Nug binag maknu sam

¹ Ag Yawe binag meig! Aɗinu? Ig Kayak ihinignu binag maknu ahi ettaladkkunig amu, amuam ena! Ge! Ig nuhignu binag maknu ahi ettaladkkunig amu, amuam enanagnab, tutukku ele.

² Yawe Nug Jerusalem qabatte. Nug diia ukka laih me dayak danab ah eɗua diia, Israel uɗitte.

³ Nug danab ah ag oo doyak okkai, naɗi dootteb ele ehanatte, ag eɗun, ena daatteb. Ao, Nug danab layag baegppa ihi keeke ele itatte bia, Nug ag atognoadtte.

⁴ Nug hoɗoppai ebaqa, Nug onilag anen anen ele diitte.

⁵ Ihinig Naɗi am onig, ɠagattag ele! Nug ebehi okkai ele! Diignu doyak tutukku nuhig am okkainab; am batak iitta ele!

⁶ Yawe Nug danab ah ag akka ag onilag qeeg nette ele ehanadtte, amge Nug nau hak danab diia he, gappudppa notteb.

⁷ Ag Yawenu ena heumnu doon, ag nuhignu ahi ettalatteg! Ao, ag harp-ppa ahi Kayak binag mette ele qatteg!

⁸ Yawe Nug he, bud huanak habppa daatteb. Ao, Nug he, gu neene, wan le aotte. Nug hette, amuppa Nug he, gikkiɗah qauko nakokppa betteb.

⁹ Nugib doɗ ee madatte. Ao, haen alɗal nalkad ele ag eenu enug aqe gaaeg amu, Nug ee madatte.

¹⁰ Hos ag ɠagattag ele, amge Yawe Nug amunu gamag ahak ii dootte. Danab ag ele ɠagattag ele, amge Yawe Nug danab dilagnu enanagnab ii dootte.

¹¹ Yawe Nug hosnu ɠagattag, o danabnu ɠagattag, Nug amunu gamag ahak ii dootte. Iitta. Nug laa ag nuhignu ebehilag oh bodoetta le mette ele, Nug amu dilagnu enanagnab dootte. Ao, laa ag Nug ahilagnu oo mauhaknab dootteb, ag nuhig kobol dabmenan daanna, ag amuppa ehanittak aon, gogppa tekkulagnu ameg metteb ele amu, Nug amu dilagnu enanagnab dootte.

¹² Danab ah ag Jerusalem daatteb, ag Yawe onig humeg! Yo, danab ah ag Sion aab okkaippa daatteb, ag ahilag Kayak binag meig!

¹³ Aɗinu? Nug Jerusalemnu aɗnu od oɗeppanu od manak qaknu keeke ɠagattag aqe, kekeɗ ag aab okkaippa nokkulagnu elele iitta. Ao, Nug danab ah Jerusalem daatteb itatte daatteb.

¹⁴ Amu ele, Nug he, ag Israel wanppa daatteb, ag maɗoɗ ele daaegeg, Nug ag bret kunum ena ena witppa heppig amu matte latteb.

¹⁵ Yawe Nug ɗo nai nuhig wanppa me neum. Ao, nuhig ɗo amu, amuam danab okkai laa, nug nuhig maɗi nid uɗat laa hekkunu me, qaietta uɗat hekkunu gotte, amubianab Yawe Nug nuhig ɗo nai uɗat ɠagattag wan atu ohppa he bette.

¹⁶ Yawe Nug sno he na, lamen bia wan tona daatte. Yo, Nug he, ais doɗo naunau na, wan qaɗeppa uhuɗ bia daatte.

¹⁷ Yawe Nug ais doɗo, men bia wanppa akke nette. Anam amu aun nug oug naunab, Yawe Nug wanppa me nette amu eɗidkkunu elele?

¹⁸ Nug nai a, ais doɗo eɗua le mette. Yo, Nug he, ulah uɗie, ais le ma gotte.

¹⁹ Yawe Nug nuhig nai Jakop buɗub mattom. Ao, Nug nuhig ɗo iɗu iɗu Israel danab ah mattom.

²⁰ Nug nuhig nai wan laa anam ii mattom. Ag nuhig ɗo ii dootteb. Ag Yawe binag meig!