Sam 145 - Nobonob Baibel

Yawe binag maknu sam

Imuam Dawitnu sam; sam imuppa Dawit nug Yawe binag meum.

¹ O Yawe, na am dahil Kayak, na king. Da geha na binan okkai, attannab humakkul. Yo, da geha hanhan na onin attan humakkul.

² Deɗ oh da geha na onin humeme, da geha na binan okkai hanhan attan humakkul.

³ Yawe Nug am onig, ɠagattag okkai ele. Nug danab ah ag Nug binag mekkulagnu elelenab daatte. Auntai laa nug Nug onig, ɠagattag okkai ele tutukku dookkunu elele iitta.

⁴ ⌊O Yawe,⌋ haen oh nid anilkad mamelkad ag nahip uɗat enanu nid ahilkad amelagppa mattiglag. Yo, ag geha na uɗat okkai, ɠagattag heme, ag amunu amelagppa mattiglag.

⁵ Na am king dagom onig ɠagattag okkai naɗi ele, amu da amunu dabmak unuqag awewe daakkul. Ao, da na uɗat okkai oh ena ena hemenu dabmak unuqag awewe daakkul.

⁶ Danab ah ag geha nahip ɠagattag, na ɠagattag amuppa uɗat okkai okkai, danab ah ag uɗat amu anidna, ag ebehilag oh bodoetta le mette amu, ag ɠagattag amunu madippeppeg, da geha na uɗat okkai okkai hemenu madikkul.

⁷ Ag geha nahip ena hak okkainabnu oolag gamag ahak okkainab dooglag. Ao, ag nahip genab tutukku hak kobolnu ahi ettaladkkulag.

⁸ Yawe Nug haen oh aɗi hette amu, Nug oo bodoette enanag maɗoɗ ele hette. Nug danab ah dilagnu oo gai-iitta doya oo matta ehanadtte. Nuhig oo nauhak paha ii bette, Nug danab ah dilagnu oo mauhaknab dootte.

⁹ Yawe Nug danab ah oh dilagppa ena hette. Nug aɗi keeke Nug eppegppa heum ele amu, Nug amu ohnu oo bodoetta le mette.

¹⁰ O Yawe, keeke oh na hattame amu, ag geha na binan mekkulag. Ao, danab ah nahipad ag nahipnu oo metta ii uuak kobol dim lamidtteb ele, ag geha na onin attannab humaglag.

¹¹ Nahipad danab ah ele ag nahip ɗo maɗoɗ am binag amahlak oppiaawak ele mattiglag. Ao, ag nahip ɠagattagnu ele mattiglag.

¹² Ag danab ah oh ag nahip uɗat ɠagattag okkai ele, ag amunu dooglagnu anam mattiglag. Ao, ag nahip ɗo maɗoɗ am binag amahlak oppiaawak okkainab ele, ag amunu ele dooglagnu, ag anam mattiglag.

¹³ Nahip ɗo maɗoɗ am hanhan daatte; am geha iitta ii mema. Ge! Na king hanhan daattem. Aɗi keeke Yawe Nug hekkunu atte amu, Nug aakku hette. Laa amu, Nug aɗi keeke hette ele, Nug oo bodoettak, enanag, maɗoɗ ele hette.

¹⁴ Yawe Nug danab ah ag nena qeppig ele, Nug ehanatte, ag eɗun hippaidtteb. Yo, Nug danab ah ag uug dootteb ele, Nug ag ehanadtte.

¹⁵ Keeke oh ag bauklel daatteb, ag na ee madakkutnu neegna daatteb. Ag na neekittegeg, na ee mattak haenppa amu, na ag ee madattem.

¹⁶ Na eppen haqan, ag bauklel daaglagnu keeke madattem; amu keeke oh ag elele daatteb.

¹⁷ Yawe Nug keeke oh hette amu, Nug genab tutukkuib hette. Ao, Nug aɗi keeke hette ele amu, Nug oo bodoette enanag maɗoɗ ele kobolppa hette.

¹⁸ Yawe Nug danab ah oh ag Nug onigppa etteb ele, Nug ag guguattak daatte. Ao, Yawe Nug danab ah ag kobol doyak diig genabibppanu betteb, ag amu dim lamidnana, ag Nug onigppa etteb ele amu, Nug ag guguattak daatte.

¹⁹ Danab ag Yawenu dabmenana, nuhignu ebehilag oh bodoetta le mette ele amu, Yawe Nug danab amu aɗi keekenu oolag hette am madatte. Ao, Yawe Nug danab amunu unuqittak doya, nug ehanatte, padal ii metteb.

²⁰ Yawe Nug aun aɗi ag nuhignu oolag mauhehe daatteb ele amu, Nug ag dabmadatte, amge aun aɗi ag nau hak danab daatteb ele amu, Nug ag hatte nauhtteb.

²¹ Da geha Yawe binag medakkul. Keeke oh bauklel daatteb, ag ele Yawe hanhan binag metteg! Yawe Nug oppiaawak daatte.