Sam 144 - Nobonob Baibel

King laa kekeɗ eɗattom amu, nug Yawe binag mette

Imuam Dawitnu sam.

¹ Yawe Nug am kekeɗ niɗamnanu ehanittak dahil daatte. Da Nug humidttem. Nugib ban haknu doyak awaknu ippuniɗtte. Ao, Nugib ban haknu doyak da meɗatte.

² Nug am dahil Kayak, Nug dahilnu oo mauhaknab dootte. Nug am aab aɗ ɠagattagnab ele dahil bia daatte. Nug anam dayaya, Nug da uugppa daaiyi ehaniɗe, da ena daattem. Nug am dahil guppiɗ. Uug iukkunu heehe, da padal mak eɗitten ena daakkulnu nuhigppa gottem. Nug he, wan laappan danab ah ag da waalppa daatteb.

³ O Yawe, ig danab ig am keeke okkai iitta. Na ig ii atognoiglom am elele, amge na atognoigttem. Ao, danab ah bekkalkad aɗelkad ig, ig oh am keeke okkai iitta. Na ihinignu dab-ii-mena, ii ehaniglom am elele, amge na ihinignu dabmena ehanigttem.

⁴ Amu danab nug ulah laippu noobppa aotte amu, ulah awak amuam haen tutuib doawa, eɗua dimittim gotte; am danab ah ig amu, ig amubia daattem. Ig haen tutuib daattem. Ihinig haen dayaknu am keeke itotog laa haen tutu dayowa qettoɗtte, am amubia daatte.

⁵ O Yawe, ⌊ig haen tutuib bau daattem. Anam amu,⌋ na hab matulna, nekkutnu oɗ medattem. Ge! Na aab kah qaukoppanu bekkunu nena, na qauko aɗualadkkutnu unuqidttem.

⁶ Na heppe, nahip amemɗi amemɗiag aweb, nahip kekeɗ ag matatun gokkulagnu oɗ medattem! Na nahip lat doɗo eppe, lamatteb gokkulagnu unuqidttem.

⁷ Na hab attannu eppen bahin ehaniɗppe, da kekeɗ eppelagppa ii daapanu oɗ medattem. Am dahil kekeɗ am le ameg naɗi umanab noak ele amubia daatteb. Na da ahilagppan ehaniɗna awiɗkkutnu unuqidttem.

⁸ Dahil kekeɗ ag nai hambuppuak tuɗid ele maditteb. Ao, ag eppelag humana, ag nai tutukku mattiglagnu atteb, amge ag hambubutteb.

⁹ Na binan maknu amu, O Kayak, da ahi bau edakkul! Ao, na binan maknu amu, da laia, nuhig muɗi 10 ele qekkul.

¹⁰ Da amu hekkulnu diig am, na hee, king ag ban eɗidtteb! Da am nahip maɗi nid Dawit, am naib, na da ehaniɗe, kekeɗ ag qep elabppa danab ah aqaeg mauhtteb ele, ag qep amuppa ii iweg mauhmi.

¹¹ Na ehaniɗppe, da padal mepanu oɗ medattem. Ao, na ehaniɗppe, da kekeɗ eppelagppa ii daapanu unuqidttem. Ag tuɗid ele nai hambubutteb. Ao, ag eppelag humana, ag nai tutukku akkulag atteb, amge ag hambubutteb.

¹² ⌊Na da king, da ehaniɗppe kekeɗ eppelagppa ii daakkul dayeb amu,⌋ ig bekkankad ag ad keeke wan enappa ena bette bia ena bekkulag. Ao, ig aɗenkad ag am biidod enanag bia, danab laa nug kingnu lag enanagnab daakkunu hoyatta, bala madatte, amubia daaglag.

¹³ Ihinkad dad ag ee digdig huanak meulkad okkulag. Ao, ihinkad sipsip ag huana abatna, kuɗum, ge, kuɗum huanak daaglag.

¹⁴ Dad ihinkadppa ee eppaladttem ele am meulkad huana oppeg, makau mawadkkulagnu uug ele daakku. Ihinkad kekeɗ ag uɗin aab okkainu aɗ loppaɗppeg neeb, appanigppa nona heppeg, ig gota, wan laalappa ii daamta. Ao, auntai laa nug baekkudppan laa qeppig, o laa aon goppig, nug amu ii anidma, mahiak amu ii hema. ⌊Aɗinu? Eheɗ hak kobol amuam oh ii daamna.⌋

¹⁵ Huu laa ag anam daatteb amu, ag itittak ena aoppig daatteb. Ao, huu laa ag ahilag Kayak am Yawe, huu amu ag ag itittak ena aoppig daatteb.