Sam 143 - Nobonob Baibel

Ehanittak awaknu unuqittak laa

Imuam Dawitnu sam.

¹ O Yawe, na da oot meɗan, dahil unuqittak imu dookkutnu oɗ medattem. Ao, da na unuqitte, dahilnu oot gai-iitta doon oot meɗan ehaniɗkkutnu oɗmak imu hettem amu, na oɗmak amu dookkutnu ool daatte. Na oo metta ii uuak kobol, amu genab tutukku hak kobol ele hettem amunu, na da oot meɗan, nai nob meɗakkutnu unuqidttem.

² Auntai laa na noomppa hibaitta, “Da genab tutukku hak danab daattem,” akkunu elele? Iitta amunu, na da, nahip maɗi nid, na da nahip hettoɗiakppa ii meiɗmananu oɗ medattem.

³ Dahil kekeɗ ag da lamiɗna, ag da oiɗeg, wanppa noin qei, ag da laa ag mauhak moɗ gatatu eleppa daatteb, ag da amubia daakkulnu hetteb.

⁴ Ag anam hetteb amunu, da eɗuen, ena bekkulnu dabmak aɗe oikkulnu ii doottem bia oittem. Ao, da ool uug qak nau doottem.

⁵ Da haen matunu amu daulppa dotte. Ao, da nahip uɗat okkai okkai na heme ele amu, da amunu dabmak unuqag awewe daattem. Ge, da na aɗi heme ele amu, da amunu dabmak awe autenab aottem.

⁶ Da na guguittaknab daakkulnu ool ahak ele daattem. Ao, atu qaɗaiettakppanab danab laa le baag diie, nug le aokkunu oo okkai daatte, amubia da na guguitten daakkulnu ool okkai daatte. Sila.

⁷ Yawe, da ool gai-iitta ma auta awa dayeye daattem, na oot meɗan, pahanab gumiɗna uɗin, unuqittak dahil nob ena mekkutnu oɗ medattem. Na oot da meɗan, da dimeɗamnanu unuqidttem. Na dimeɗappe amu, da mauhkkul.

⁸ Da nahipnu oolppa genab doottem amunu, na buttua oh nahip oo mauhaknab kobolnu dabmenana, ehaniɗkkutnu oɗ medattem. Da na unuqidttem amunu, na oot meɗan, nahip ib tutukku ippuniɗkkutnu unuqidttem.

⁹ O Yawe, na da dahil kekeɗ dilagppan ehaniɗppe, qagaiettak amuppa daapanu oɗ medattem. Na da lokkumiɗkkutnu da oole, nagattoppa uɗittem.

¹⁰ Na am dahil Kayak amunu, na da nahip dabmak awak dim lamitten hekkulnu ippuniɗkkutnu oɗ medattem. Nahip Ouɗi, Nug am Ouɗi enaib amu, Nug anuqa ugakka, Nug da ib ena, tutukkuppa omaiɗkkunu unuqidttem.

¹¹ O Yawe, danab ah ag na oninnu dabmak anuqak aoglagnu amu, na da mauhpanu ehaniɗkkutnu oɗ medattem. Keeke oh na hettem amu, amuam genab tutukkuib, amu na ehaniɗppe, da uug imuppa ii daapanu unuqidttem.

¹² Na nahip oo mauhaknab kobol dabmena dim lamidnana, na dahil kekeɗ eɗadppe nauhkkulagnu oɗ medattem. Ao, da am nahip maɗi nid amunu, na heppe, dahilad kekeɗ ag nauhkkulagnu unuqidttem.