Sam 141 - Nobonob Baibel

Tueb meebnu unuqittak

Imuam Dawitnu sam.

¹ Yawe, da na oninppa ettem. Na pahanab uɗikkutnu oɗ medattem. Ao, haen da na ehaniɗkkutnu oninppa ettem amu, na amu dookkutnu unuqidttem.

² Na dahil unuqittak imunu amu, na kalu danab ile, muttuɗig enanag otte bia dookkutnu oɗ medattem. Ao, na da eppel bahii, attan tette ele, na amunu tuebnu doɗ manan mettaglag bia anidkkutnu unuqidttem.

³ O Yawe, na da ehaniɗppe, na oot daatte biaib nai madikkulnu oɗ medattem. Am da bakkum daakkulnu daatte haenppa da nai madipanu ehaniɗppe, da ii madipanu unuqidttem.

⁴ Na da ehaniɗppe, kobol nau haknu oo hak dahilppa ii daamanu oɗ medattem. Ao, na da ehaniɗppe, laa kobol nau hetteb ele amu, ag oolagppa dayaknu oo hak dahilppa ii daamanu unuqidttem. Danab eheɗ hetteb ele ag eheɗ henana, keeke aon, gamalag ahatte, amge da ag hetteb bia hepanu na ehaniɗna, na dahil ib amu oo nekkutnu oɗ medattem.

⁵ ⌊Amu da digmein, eheɗ hekkul hettem dayeb amu, na heppe,⌋ genab tutukku hak danab nug da bu iukku, o nug da daul batakku, am ena; Da bu qak, o daug batak amu ii uupa. Da eheɗ hak danab ag hanhan tuɗidna, eheɗ hemananu unuqidttem.

⁶ Anam amunu, ⌊laa ag⌋ nau hak danab dilag ikki danab buɗialadppeg, baippa noppeg amu, nau hak danab ag dahil nai dooglag. Aɗinu? Dahil nai am nai ena.

⁷ Am dad hak danab laa wan buuawa, men ele buue bette, anambia nau hak danab ebehilag am boumattak iitta, tamtam niiglag.

⁸ O Naɗi Yawe, na da ehaniɗkkutnu nahip-ppa neegttem. Da na, na am padal mak eɗitta ena dayaknu ehanittak dahil daattem amu, da na gumitten gottem. Na uuiɗppe, da mauhpanu oɗ medattem.

⁹ Nau hak danab ag da uhui laa, da amuppa nokkulnu meppig amu, na heppe, da awaitten daakkulnu oɗ medattem. Ao, laa ag nau hetteb ele, da ahilag pelemppanu awaidkkulnu unuqidttem.

¹⁰ Na heppe, nau hak danab ag akka ahilag uhuippa nokkulagnu ool daatte, amge na heppe, da am amuppa ii nopanu oɗ medattem.