Sam 140 - Nobonob Baibel

Yawe Nug danab guittak aomanu unuqittak

Imuam Dawitnu sam; Dawit nug danab kwaia gumattenu yom.

¹ O Yawe, na ehaniɗppe, da eheɗ hak danab eppelagppa ii dayen, qagaiettakppa ii daapanu oɗ medattem. Ao, na da ehaniɗppe, da danab ag laa guittak nau mauhnoak madatteb ele, da ag eppelagppa ii daapanu unuqidttem.

² Danab ag laa guittak nau mauhnoak madatteb ele, ag oolagppa nau hekkulagnu maittak aotteb. Deɗ ohppa ag uug heeg bette.

³ Nai ag atteb am mat nau danab emalatte guadtte bia, nai amuam he, danab ah ag guittak dootteb. Ao, ag mat nau, danab emalatteg mauhtteb ele, amubia ag oɗelagppa nai maditteb. Sila.

⁴ O Yawe, na heppe, da nau hak danab, eppelagppa daapan oɗ medattem. Ao, na danab ag laa guittak nau mauhnoak madatteb ele, ag heppeg, da nein qekkulnu hetteb amu, ag da eɗilmananu ib oo nekkutnu unuqidttem.

⁵ ⌊O Yawe, na da ehaniɗkkutnu oɗ medattem.⌋ Dada hak danab ag da aɗailkkulagnu pelem meppig daatte. Ao, ag da uhui laappa nokkulnu meppig daatte. Ag da ippulppa pelem maadppig daatteb. Sila.

⁶ O Yawe, da na amenppa attem. “Na am dahil Kayak!” Na dahil unuqittak doon, dahilnu oot gai-iitta doon oot meɗan ehaniɗkkutnu unuqidttem!

⁷ O Naɗi Yawe, na qagaiettakppa daapanu ehanittak ɠagattag dahil daattem. Banppa amu, na dahil guppiɗ daye, da ii mauhmi.

⁸ O Yawe, na nau hak danab uuadppe, ag aɗi hekkulagnu oolag hette, ag amu hemananu oɗ medattem. Na ag uuadppe, ag aɗi hekkulagnu maidppig amu, ag ii hemananu unuqidttem. Ag hekkulagnu oolag daatte hekkulag dayeb amu, ag aakku enaen mena, dada danab ah bekkulag. Sila.

⁹ Kekeɗ ag dahilppa nau hekkulagnu maidppig ele amu, na heppe, ag maittak amuppanab nauhkkulagnu oɗ medattem.

¹⁰ Na heppe, aab aɗuppanu aab ottag ewawa, na qa, danab amu qaɗelagppa gokkunu oɗ medattem. Na danab amu buɗiadppe, ag moɗ umanab awe noak, baknu elele iitta amuppa nokkulagnu unuqidttem.

¹¹ Na heppe, danab ag laa onig nauhkkunu nai nau maditteb amu, ag ihinig wanppa ii daamnanu oɗ medattem. Na heppe, uug naunab, danab ag laa guittak nau mauhnoak madatteb ele, am ag qaɗelagppa nekkunu unuqidttem.

¹² Amge imunu amu da doottem. Yawe Nug daɗek danab ah ehanatteb, hettoɗiak abenppa epeɗiak danab ag nai doya mala hettoɗia epeɗia elele mettak kobol dim lamidnana, ahilag nai bappaidkkulag. Ao, Nug laa ag keekenu tutu mak ele, ag hettoɗiakppa daappeg, Nug ag ehanadkku.

¹³ O Yawe, genab tutukku hak danab ah ag na amenppa, “Ena heme,” akkulag. Ge! Genab tutukku hak danab ah ag na noomppa daaglag.