Sam 14 - Nobonob Baibel

Danab ag Kayaknu oolagppa genab ii doon, nau hetteb

Imuam Dawitnu sam; Dawit nug danab kwaia gumattenu yom.

¹ Am danab ag Kayak dab-ii-menan ii dim lamidtteb ele ag akka ag oolagppa, “Kayak laa ii daatte,” atteb. Danab amu ag diilkad ena iitta, kobol ag hetteb am kobol uɗig wak ele. Auntai laa ena ii hette!

² Yawe Nug hab attan dayaya, danab ah oh neekkadtte. Ao, Nug neekkattatta, laippu laa nug diignu doyak tutukku elete, o iittate anidkkunu neegtte. Ge, Nug laippu laa nug Kayak antta dim lamidkkunu madittatta anidkkunu neegtte.

³ Nug neegtte, amge Nug auntai anam laa heehe ii anidtte. Ag oh am Kayak dimedappig. Ag oh diilkad ena iitta. Laippu laa ena ii hette. Iittanab!

⁴ Amu Yawe Nug oɗ mette. “Danab ag kobol nau hetteb, danab ag laa bret latte, amubia ag danab dahilad hattaeg nauhtteb, danab ah ag da Yawe ii unuqiɗtteb ele amu, danab amu ag da ag bu madakkulnu iite dabmetteb?” awa oɗ mette.

⁵ Ag anam hetteb, amge Kayak Nug laa ag genab tutukku hak kobol dim lamitteb, Nug ag ele daatteb amunu, Nug geha heeb, nau hak danab amu ag eheɗnab baɗaglag.

⁶ Nau hak danab ag, ag daɗek danab ah dilag maittak heppeg nauhkkulagnu hetteb amunu, Yawe Nug daɗek danab ah ⌊nuhikkud, Nug amu⌋ dilag padal mak eɗitteb ena dayaknu ehanittak daatte.

⁷ Da Yawe, Nug Sion Qaukoppa daatte amu, da Nug nuhikkud danab ah, Israel, Nug ag ehanatteb, ag padal ii memananu ool naɗi daatte! Ao, Yawe Nug nuhikkud danab ah, Jakop buɗuppud, Nug ag ehanatteb, ag eɗun ena daanna, ag gamalag ahaɗ! Ge, Israel danab ah ag gamag aheg!