Sam 139 - Nobonob Baibel

Yawe Nug keeke oh doya, danab ah atognoadtte

Imuam Dawitnu sam; Dawit nug danab kwaia gumattenu yom.

¹ O Yawe, na da diil neegna anidna malan, dahilppa keeke oh amu doome.

² Da daattem, o hibaitte daattem, haen amuppa na doottem. Na da keeke laanu dab-ii-memi, butti haen adekku dabmekkul amu, na gemu dabmak dahil amu aakku doon malame.

³ Da ib atten awe matte gokkul amu, na ib amu tatam oot maitte, da adeppa niikkul amu, na amu ele matu oot maittom. Ge, ib oh da gottem amu, na doottem.

⁴ Aɗinu am anam daatte? O Yawe, da aɗi akkulnu hettem amu, da ii ami daaiyi, na doon malame.

⁵ Ao, Na da nool aon gonana, dim ele lamiɗttem. Na eppenppa da atognoiɗttem.

⁶ Da amu oh am genab doottem, amge da amu diig tutukku dookkulnu elele iitta. Ao, Yawe, nahip hak ena, da amunu diig dookkulnu elele iitta; da eɗiltte.

⁷ Da nahip Ouɗi uuitte oole gokkulnu elele iitta. Ge! Da na noomppanu awaitten, laih gokkulnu elele iitta.

⁸ Da hab attan tekkul dayeb amu, na appa daattem. Ao, da mauhak abenlagppa nokkul amu, na appa ele daattem.

⁹ Am da buttuanab ahe, ai laa bia hagagaɗe, yu mayappanab gokkul dayeb amu, na appa daattem.

¹⁰ Ao, da anam golomlob amu, na appa ele daanna, ulum meɗalom. Ge, da anam golomlob amu, na eppen naɗiap-ppa da ehaniɗlom.

¹¹ Am da gatatu appi lokkumiɗlotai. Ao, da amahlak taliliɗak daatte amu, da appi, gatatu mailotai.

¹² Anam amge da aben gatatunab ele amuppa daakkul dayeb, da na aniɗmananu lokkumkkulnu elele iitta. Na amunppa amahlak anidttem, na tuqan amubia anidttem. Nahip-ppa amu, gatatu, amahlak ele am oh laippu daatte.

¹³ Na da meul oh, ouɗil ele heme. Ao, da anil ooppa daaiyi, na da heiɗme.

¹⁴ Na da elelenab, danab nug nahip uɗat amu antta, nug dabmak huanak aotte, na anam heiɗme amunu, da amunu na binan mettem. Kobol na heme am enanag. Da amunu doye aute aottem.

^15-16 Da anil ooppa daye, meul medette, ebehil ba ɠagattag medette aniɗme. Ao, da anai ooppa, laanu neekkakppa da beɗul am danab beɗu iitta bia haenppa, haen amuppa da meul elele medette aniɗme. Da anil ooppa ii digmemi, haen amuppa na deɗ oh, da bau daakkulnu dabmeme ele amu, na amu oh nahip bukppa yaame.

^17-18 O Kayak, nahip dabmak dahilnu amu, da amunu enanagnab doottem. Dabmak amuam kuɗumnab! Da ebqelomlob amu, ihinu ebqak amu eɗittak daalo. Da niioya ahattem amu, na eleib daattep. Na da ii uuiɗttem.

¹⁹ O Kayak, na nau hak danab hadappe nauhkkulagnu ool hette! Ge, ag danab ag laa aqatteb ele, ag da uuiɗna, laih ukkeg!

²⁰ O Kayak, danab ag laa aqatteb ele, ag nahipnu nai nau digdig atteb. Ao, nahipad kekeɗ ag nau henan, ag na onin diin, nai nau ele ouaqadna maditteb.

²¹ O Yawe, da laa ag nahipnu nau ninig ele dootteb amu, da ahilagnu ele nau ninig ele doottem. Ao, da laa ag na kekeɗ medatteb amu, da ahilagnu ena iinab doottem.

²² Am genab, da ahilagnu nau ninig ele doye autenab aottem. Nahip kekeɗ am dahil kekeɗ.

²³ O Kayak, na da oolppa neegna, aɗi oolppa daatte anidkkutnu ool daatte. Ao, na dahil dabmakppa neegna, aɗi appa daatte amu anidkkutnu ool hette.

²⁴ Na appa neegna anidna, aɗi keekenu na oot ii hette amu ippuniɗkkutnu oɗ medattem. Ao, na da ib bauklel dayakppa gotte, na ib amuppa anuqna gona, omaiɗkkutnu oɗ medattem.