Sam 138 - Nobonob Baibel

Yawenu ena heme anak unuqittak

Imuam Dawitnu sam.

¹ O Yawe, da nahipnu meul ohppa, “Ena heme,” awe akkul. Da hambuppuak kayak laa oh noolagppa da na binan mak ahi edakkul.

² Na hee, na onin, nahip nai ele anuqak daattep amunu, da ool ekuɗe, nahip mettid lag nahipnu tituanak daatte, da aben amu neegppi ukkeb gomelen, da na oo mauhaknab kobol, oo metta ii uuak kobol ele dim lamidttemnu dabmein, da na amenppa, “Ena heme,” akkul.

³ Da na unuqitti, na dahil unuqittak doon, na nahip ɠagattag da meɗae, da ɠagattag ele daattem.

⁴ O Yawe, wanppan king oh ag nahip nai dooglag amunu, ag na binan mekkulag.

⁵ Yawenu binag amahlak oppiaawak ele am okkainab amunu, geha wanppan king ag nahip hak digdignu ahi ettaglag.

⁶ Yawenu binag amahalak oppiaawak ele am okkainab amunu, Nug attannab daatte me, nug danab ah ag akka onilag qeeg nette ele, Nug amu dilag dabmette. Nug amu dilag dabmette, amge Nug dada danab ah umanabnu doyadtte; ag lokkumkkulagnu elele iitta.

⁷ O Yawe, uug kuɗum dahilppa bette, amge na da atognoiɗe, da ena bau daattem. Laa ag dahilnu oo aeg bak doon, kekeɗ meɗatteb amu, na ag mautadna, nahip ɠagattagppa da ehaniɗe, da padal ii mettem.

⁸ Yawe, Nug keeke oh dahilppanu hekkunu nai ana qakkom amu, Nug anamib hekku doottem. ⌊O Yawe,⌋ nahip oo mauhaknab kobol am hanhan daatte. Ao, na uɗat oh dahilnu hee betteb ele amu, na heppe, gogppa tekkunu ool daatte.