Sam 135 - Nobonob Baibel

Ahi laa, Yawe binag maknu

¹ Ag Yawe binag meig! Ao, ag Yawe onig humeg! Ge, ag aun aɗi ag Yawenu maɗi nid maɗi ah daatteb ele, ag Nug binag meig!

² Ag aun aɗi ag Yawe laugppa nuhig ɗo maɗoɗnu uɗat hetteb ele, ag Nug binag meig! Ao, ag aun aɗi ag Kayak laugnu haɗap-ppa uɗat hetteb ele, ag Nug binag meig!

³ Yawe Nug ena amunu, ag Nug binag meig! Ao, Yawe onig am enanagnab amunu, ag ahi Nug onig attan humaknu ele etteg!

⁴ Ag Yawe binag mekkulagnu diig am, Nug Jakop buɗub nuhikkud daaglagnu tituanattom. Ao, Nug Israel danab ah ag nuhikkud danab ah, nuhig en okkainab bia daaglagnu tituanattom.

⁵ Da doottem, Yawe Nug ɠagattagnab daatte. Ao, Naɗi ihinig, Nug kayak laa oh eɗatta malom daatte.

⁶ Yawe Nug habppa, wanppa, yuppa, amu yu unuqagppa ele aɗi hekkunu dabmette amu, Nug hette.

⁷ Nug he, lombig wan tona daatte. Nug gu, amemɗi ele maate uɗittep. Nug he, ulah uɗitte.

⁸ Nug he, nid ⌊danab⌋ tatamnu oh, doɗ nalkad ⌊dawai⌋ tatamnu ele Isip appa mauhppig.

⁹ Yawe Nug Isip appa, nuhignu dabmettaknu kobol danab haknu elele iitta, amu uɗat ɠagattagnab laala ele heum. Nug uɗat okkai amu oh he, Paro, amu nuhikkud danab ah oh ele ag amuppa uug okkainab aon daappig.

¹⁰ Yawe Nug wanppan wan laala eɗatte, ag padal meeg, amu Nug king ɠagattag ele aqom.

¹¹ Nug Amo dilag king Sihon qeum; Basan King Og qeum; Kanan dilag king oh ele aqom.

¹² Nug aqa, king amu dilag wan oh diia awa, Israel danab, ag aulag daakkunu mattom. Ao, nug ahilag wan amu ag aulag daakkunu Israel danab ah mattom.

¹³ O Yawe, danab ah wanppa daatteb, ag na onin hanhan dooglag; ii qettoɗma. Yo, na binan okkai ele amu wanppan danab ah ag hanhan doon, daulag ii atima.

¹⁴ Aɗinu anam daakku? Yawe Nug heeb, laa ag nuhig danab daatteb ele, ag nuhikkud daatteb dooglag. Ao, Nug ahilagnu oo bodoetta le mekku.

¹⁵ Hambuppuak kayak, wanppan wan oh dilag amu, ag am silwa, gol eleppa hak. Danab ag eppelagppa hadappig.

¹⁶ Ahilag kayak hambuppuak dottolkad amu, ag oɗelag ele, amge ag nai mattiglagnu elele iitta. Ao, ag amelag ele, amge ag keeke anidkkulagnu elele iitta.

¹⁷ Ge, ag daulag ele, amge ag nai dooglagnu elele iitta. Ag hik nakok laa ii aotteb.

¹⁸ Laa ag hadatteb, aria laa oh ag ahilagnu oolagppa genab dootteb ele, ag oh ag bia daaglag.

¹⁹ O Israel danab ah, ag Yawe binag meig! O Aron buɗub, ag Yawe binag meig!

²⁰ O Lewi buɗub, ag Yawe binag meig! Ge, ag laa oh ag Yawenu ebehilag oh bodoetta le mette, ag Nug binag meig!

²¹ Yawe Nug Sion appa daatte. Ag Sion daatteb amu, ag Nug binag meig! Ao, Nug Jerusalem daatte. Ag Nug binag meig! Ag Yawe binag meig!