Sam 132 - Nobonob Baibel

Yawenu mettid lagnu binag maknu nai

Sam imuam ahi laa Jerusalem taknu ugakka ettaknu.

¹ O Yawe, Na Dawit dabmettan, nug uug kuɗum mawomnu ele dabmekkutnu oɗ medattem.

² Dawitnu amu, nug keeke laa hekkunu Yawe noobppa nuhig nai ɠagattag qetta aum. Ao, nug Laa Ɠagattag Okkai Ele, Jakop Nug binag meum ele amu, nug Nug amegppa keeke laanu genabnab hekkunu nai ana qakkom. Nug inam aakku Kayak amegppa aum.

³ “Da aabppa ii gopa. Da niiak abenppa ii niipa.

⁴ Da heppi, amel ii nema. Da amel amuheb ii niipa.

⁵ Da anam ii heppi ukkeb ukkeb, da aben laa, da appa Yawenu mettid lag hekkulnu anttoya, da eɗuen lakka ukken niikkul. Ao, da Laa Ɠagattag Okkai Ele, Jakop Nug binag meum ele amu, da nuhig lag daakkunu aben anttoya, da eɗuen lakka ukken niikkul.” Dawit nug anam aum.

⁶ Antte! Ig Eprata appa daatta amu, ig Tituanak Nainu Kunupnu nai laa doomut. Ao, ig doota, ig mattit gota, Kiriat Jearim guguittak appa anidmut.

⁷ Anidta ig ikka ikka nug amegppa amut. “Ahappeg, ig Yawe daatte, ig aben amuppa gota daatu! Ao, ig Nug noobppa dup nota binag metata daatu!” aot amut.

⁸ Am ig amut. “O Yawe, na ahan, lag bau nahip imuppa uɗin daakkutnu oɗ medattem; na amu nahip Tituanak Nainu Kunup, kunup amuam nahip ɠagattag okkainab ippunigtte amu, na kunup amu ele aguppa daakkut.

⁹ O Yawe, na mana mettak danab ehanadppeppe, ag kobol genab tutukkuib hekkulagnu oɗ medattem. Ao, nahipad danab ah ag nahipnu oo metta ii uuak kobol dim lamidtteb ele, ag gamag ahak doon, ahi ettaglagnu unuqidttem.” Ig anam amut.

¹⁰ O Yawe, na Dawit, nahip maɗi nid, na nuhignu dabmak anuqak aona, na king, nahipad danab ah dilagnu goɗen gokkaɗakppa tituanme amu, na nug ii uuidmananu oɗ medattem.

¹¹ Dawitnu amu, Yawe Nug keeke laa genabnab hekkunu nai ɠagattag qetta aum. Nug Dawit amegppa aum amu, Nug hekkunu nai ɠagattag qetta anak amu tuqa ii aoma, hanhan daakku. Nug inam iikku aum. “Da heppi, na buɗunppan laa nug nahip sia kingppa daakku.

¹² Na buɗunppan ag nug tituana nai qakkak dahil imu dim lamidnana, ag ɗo da ag ippunadttem ele amu, ag tutukku dim lamidkkulag dayeb amu, na buɗunad oolagppanu laala ag ahilag haen anen anenppa ag Israel dilag king hanhan bena daaglag,” awa aum.

¹³ Aɗinu ⌊Yawe Nug anam aum⌋? Nug Sion tituanom. Nug appa daakkunu oo daatte.

¹⁴ Nug aum. “Aab amuam da aguppa hanhan daakkul. Ao, da aben amuppa daakkulnu ool daatte amunu, da appa daakkul.

¹⁵ Da Jerusalem danab ah itadppi, ag ee keeke elelenab ele daaglag. Ao, danab ah daɗek appa daatteb amu, da ee madakkul.

¹⁶ Da mana mettak danab Jerusalem appa daatteb ele ehanadppi, ag padal ii memana. Ao, da heppi, danab ah ag dahilnu oo metta ii uuak kobol dim lamidna, Jerusalem appa daatteb amu, ag gamag ahak doon, ag ahi ettaglag.

¹⁷ Jerusalem appa da heppi, Dawit buɗubppan laa ɠagattag ba daakku. Ao, da laa nug king daakkunu goɗen gokkaɗakppa tituanmi ele, da heppi, nug danab ah dahilad dilag amahlak daakku.

¹⁸ Da heppi, nuhig kekeɗ ag uɗa nak naunab aoglag. Ge, kekeɗ ag anam daaglag, amge king da tituankkul, nug binag okkainab ele daakku.” Yawe Nug anam aum.