Sam 130 - Nobonob Baibel

Yawenu ehanittak awaknu unuqittak

Sam imuam ahi laa Jerusalem taknu ugakka ettaknu.

¹ O Yawe, da uug nau, danab nug yu ooppanab noa dayaya, uug nau dootte, da uug nau amubia doyeye, da na unuqidttem.

² O Naɗi, na da baal dookkutnu oɗ medattem. Ao, da na dahilnu na oot gai-iitta doon oot meɗan ehaniɗkkutnu unuqidppippi, na unuqittak dahil dookkutnu unuqidttem.

³ O Yawe, na ig danab, na ig ihinig hipunin nahip dabmakppa mena, aɗan dabmelom amu, ig oonigppa aun nug elele daalo? Ao, O Naɗi, aun nug na noomppa tutukku daalo? Laa iittanab iitta!

⁴ Amge na am hipunin uhuqa mekkaknu diig daattem amunu, ig danab, ig nahipnu ig ebehinig oh bodoetta le mette.

⁵ Da Yawenu ehanittak aokkulnu ool dayeye, da Nug amu hekkunu ameg mettem. Da Nug oɗeppa nai mattiom, da nai amunu oolppa genab doottem.

⁶ Danab nug tuqan aabnu aɗ attan aɗi uɗitte anittak danab daatte, nug wakkaɗeb anidkkunu oo huan daatte, amubia da Naɗi ehaniɗkkunu ool huan daatte. Yo, da ool amunu huan daatte.

⁷ O Israel danab ah, Yawe Nug danab ah dilagnu oo mauhaknab dootte. Ao, Nug danab ah qagaiettakppanu eɗua uhuqak hette amu, amuam elelenab amunu, ag Nug nuhig hak amu heeb gog tekkunu dabmenan oiyeg!

⁸ Yawe Nug nukka, Nug Israel danab ah, ahilkad hipuninnu qagaiettakppanu eɗua uhuqak ha madakku.