Sam 129 - Nobonob Baibel

Yawe Nug heeb, Israel dilag kekeɗ ag nena qekkulagnu unuqittak

Sam imuam ahi laa Jerusalem taknu ugakka ettaknu.

¹ Israel danab ah ag gemu inam akkulagnu elele. “Ig Israel danab ah, ig digmeta, huu laippu daamut, haen amuppa ihinkad kekeɗ ag eheɗ hegattappig. Gemu ele anamib hetteb.

² Amuam genab, haen ig huu laippu daautut, ihinkad kekeɗ ag ig eheɗ hegappig, amge ag ig hegappeg nauhkkunignu elele iitta daappig.

³ Kekeɗ ag eheɗ heiɗppig, diig amunu danab wan buua heehe, wan buukkunu keeke, wan otaɗa he eɗutte, amubia da gomel am ihiud huanak ele.

⁴ Amge Yawe, Nug aɗi hette amu, Nug genab tutukkuib hette. Nau hak danab ag da muɗippa hippaliɗppig ele, Nug muɗi amu otaɗom.”

⁵ Laa oh ag Sionnu nau ninig ele dootteb amu, ag uɗa nak naɗi doon, ag banppanu eɗun ooleg!

⁶ Ao, gikkiɗah lag koɗokko uɗem ukkak ele, am amuppa ena ii bette, tutunab aakkuib dayaya qaɗaiedatte; laa oh ag Sionnu nau ninig ele dootteb, ag amubia dayeg!

⁷ Laa nug gikkiɗah makau lakkulagnu qagmette, nug lag attannu gikkiɗah tutunab amu qagma, aɗa ehagkkunu elele iitta. Ao, laa nug gikkiɗah qagmette ele, nug gikkiɗah amu aɗa ehagkkunu elele iitta. ⌊Laa oh ag Sionnu nau ninig ele dootteb, ag amubia dayeg!⌋

⁸ Amu danab ah laa ag oinna, ag laa ag Sionnu nau ninig ele dootteb, ag ag qe-eɗadna wanana, ag nai imu aib madippig. “Yawe Nug ag itittak ena madakkunu oonig hette. Ge, ig ag Yawe onigppa itittak ena madattem.” Ag anam aib appig.