Sam 122 - Nobonob Baibel

Jerusalem binag maknu

Imuam Dawitnu sam. Sam imuam ahi laa Jerusalem tekkunu ugakka ettaknu.

¹ Danab ah ag da amelppa, “Ahappe, ig Yawe laugppa tetu!” aeg, da ool gamag ahom.

² Ag anam appig amunu, ig uɗit, gemu ig Jerusalemnu aɗ od ooppa iikku daattem.

³ Danab Jerusalem buuppig ele amu, ag hena autna aoppig. Danab ah kuɗum iguppa qagmekkulagnu elele.

⁴ Yawenu ɗo atte bia, nuhikkud danab ah, Israel dilag huu okkai ohppanu, ag Jerusalem ippa uɗin, Yawe amegppa, “Ena hen mekkame,” akkulagnu uɗitteb.

⁵ Sia king, danab ag danab ah dilag nai doon malan, hettoɗin, epeɗin, elele medatteb ele, ag sia amuppa daatteb, sia amuam Jerusalem ippa ina daatteb. Ao, sia king amu, ag Dawit buɗub dilag sia king.

⁶ O danab ah, ag maɗoɗ Jerusalem ippa daakkunu unuqitteg! Ge, da danab ah oh ag Jerusalemnu oolag mauhtte ele, da ag ena daaglagnu ool daatte.

⁷ Amu da maɗoɗ Jerusalemnu aɗ ooppa daakkunu ool daatte. Ao, da ban danab ag nahipad aab ooppa aben aɗ ɠagattagnab eleppa daatteb amu, ag ɠagattagib daaglagnu ele ool hette.

⁸ Da baeladppa, da lailad ele Jerusalem ippa ina daatteb amu, da ahilagnu dabmak anuqak awen, da, “Jerusalem ippa maɗoɗ daakkunu ool daatte,” attem.

⁹ Yawe, ihinig Kayak, Nug laug Jerusalem ippa ina daatte amu, da lag amu ena daakkunu dabmak anuqak awen, da attem attem hepput, Jerusalem ena daakkunu dabmein, da amuib hekkul.