Sam 12 - Nobonob Baibel

Yawe Nug laa ehanittak mettaknu unuqittak

Imuam Dawitnu sam; Dawit nug danab kwaia gumattenu yom. Danab laa nug musik haknu keeke muɗi 8 ele qeebeb, laa ag sam imu ahi ettaglagnu daatte.

¹ O Yawe, genab tutukku hak danab ah ag iitta meppig bia amunu, na ig ehanigkkutnu oɗ medattem! Ao, laa nug neekka, wanppa danab, o ah laa nug oo metta ii uuak kobol dim lamidtte ii anidma amunu, na ig ehanigkkutnu unuqidttem!

² Am danab ah oh ag lailkad mudippan ele ag nug bubuittak hetteb. Ao, ag nug amegppa mattiak hetteb, amge ag oo eeɗaknu ittag nai maditteb.

³ Yawe, na heppe, ag oo eeɗaknu ittag nai anak hetteb amu, ag amu uuglagnu oɗ medattem. Na heppe, ag dada nau haknu mattiak uuglagnu unuqidttem.

⁴ Ag atteb. “Ig nai mattiak ihinigppa laa eɗadkkunig. Ao, ig aɗi nai am akkunigib. Auntai laa heeb ig ii uumta,” aon attem.

⁵ Amu Yawe Nug atte. “Danab ah ag laa gai-iitta daaegeg, ag ag eheɗ hadatteb amu, da anadttem. Ao, daɗek ele ag aeqagatteb amu, da doottem. Anam daatte amunu, gemu amu, da ehanadppi qagaiettakppa ii daamnanu ahakkul. Ao, laa ag gai-iitta daatteb, daɗek daatteb ele amu, laa ag ahilagnu nai nau mattin, nau hattaglagnu dabmetteb ele amu, da gai-iitta daatteb, daɗek daatteb ele ehanadppi, ag uug amuppa ii daamna,” awa atte.

⁶ Yawe Nug aɗi atte amu, amuam danab laa nug silwa babaitta epeɗia awak, silwa enanag, dubuttid nakok laa iitta ele daakkunu nug haen eblaih aɗit ele anam he, enanagnab bette, am anam daatte. Ao, Yawenu nai am dubuttid nakok laa amuppa iinab daatte amu, Yawenu mattiak am ena eleleib, silwa dubuttid iittanab ele anamnab aakku daatte.

^7-8 Haen danab ah oh bia ag kobol uɗig wak elenu ena dootteb amu, nau hak danab ag mauhnoak oin, beɗuppa tak kobol hetteb. O Yawe, na ig nau anidmatanu na ehanigppe, ig ena daagnignu oɗ medattem. Ge! O Yawe, na heppe, geha nau hak danab ah amu ag ihinignu aɗitai laa ii hemananu unuqidttem.