Sam 119 - Nobonob Baibel

Yawenu ɗo

¹ Aun aɗi ag Yawenu neekkakppa ag oolagppa kaliak laa iitta ele, ag Yawenu kobol oh elele dim lamidtteb ele, danab amunu ag aakku itittak ena aoppig daatteb.

² Genab, aun aɗi ag Yawenu ɗo, kobol ele ɠagattag aɗan dim lamidtteb, ag Nug anidna dim lamidkkulagnu meulag ohppa Nug maditteb ele amu, ag itittak ena aoppig daatteb.

³ Laa ag anam hetteb amu, ag eheɗ ii hetteb. Iitta. Ag am Yawe ippu dim lamidtteb.

⁴ O Yawe, na nahip oo yaak nai ɗo bia oh ig mekkan, na ig ɗo amu oh dim lamidkkunignuib ele nai ɠagattagppa ig amenigppa mattime.

⁵ O Yawe, da haen oh nahip ɗo dim lamidkkulnu ool okkai daatte. Ao, da amu hekkulnu ool okkainab daatte. Da keeke laa hekkulnu ool hette ele amu, da amunu ool nakokib hette.

⁶ Da ool ɗo nahip dim lamidkkulnu ɠagattag dayeb, da ele nahip ɗonu dabmein hekkul dayeb amu, da uɗa nak ii aopa.

⁷ Nahip ɗo am genab tutukkuib. Da nahip ɗo amu doyeye, da ool oppiaawak eleppa na binan humakkul.

⁸ Da nahip ɗo dim lamidkkul. ⌊Da dahil dabmak dim lamidkkul dayeb amu, da padal mekkul⌋ amunu, gadon na da iinab uuiɗmananu oɗ medattem.

Yawenu ɗo dim lamittaknu nai

⁹ O Yawe, danab ah bau ag attem hena, ag oolag oppiak ele na noomppa daaglag? Ag nahip nai dim lamidkkulag, ib amuppaib ag oppiak ele daaglag.

¹⁰ O Yawe, da nahip dabmak dookkulnu meul ohppa dabmettem. Na heppe, da ɗo nahip dim lamittaknu ib amu apiɗidpanu oɗ medattem.

¹¹ Da nahip-ppa hipunin qak hepa, da nahip nai da oolppa mein, dabmak dahilppa ele memi.

¹² O Yawe, danab ah oh ag na binan mekkulag am tutukkuib. Na nahip ɗo nai ippuniɗkkutnu ool okkai daye, oɗ medattem.

¹³ Nahip ɗonu ig amenigppa ame amu, da laa dilagppa mehuqttem.

¹⁴ Laa nug enub kuɗum ele, nug nuhig keekenu oo gamag ahatte, amubia da nahip ɗo nai dim lamidkkulnu, da ool huana gamag ahatte.

¹⁵ Da nahip oo yaak nai ɗo bianu dabmak unuqag awen daattem. Ao, da na ib attem tappan gottem ele amu, da amunu ele dabmettem.

¹⁶ Da nahip ɗonu enanagnab doottem. Da nahip nai ii daul atima.

Danab nug Yawenu ɗonu gamag ahak doottenu nai

¹⁷ Da am nahip maɗi nid. Na dahilnu oot bodoettebeb ehaniɗkkut amu, da bau dayeye, da nahip nai dim lamidkkul.

¹⁸ Da nahip ɗoppa ena hak genabnabnu ib anidkkulnu, da na heppe, da anidkkulnu oɗ medattem.

¹⁹ Da wanppa daattem amu, da aab diig danab iitta daattem. Na heppe, da nahip ɗo dookkulnu ool daatte!

²⁰ Da hanhan nahip ɗo dookkulnu ool huana heehe, oolppa amunu guittak bia doottem.

²¹ Beɗuppa tak danab ag ɗo nahip ii dim lamidtteb, ag eheɗ laa awaknu anak waappa daatteb amu, na ag daulag batattem.

²² Da nahip ɗo dim lamitten daattem amunu, na heppe, danab ah ag dahilnu, “Keeke hamunab,” doon heppeg, da uɗal nemanu oɗ medattem.

²³ Danab okkai ag qagmena, dahilnu nai nau ninig ele atteb, amge da, da nahip maɗi nid amu, da nahip ɗo daatte, da amunu dabmak unuqag awewe daakkul.

²⁴ Da nahip ɗonu enanagnab doottem. Ɗo amu ag dahil ulum mettak danab bia daatteb.

Danab nug Yawenu ɗo dim lamidkkunu oo ɠagattagnab qedattenu nai

²⁵ Da gappudppa dayeye, oolppa elele iittanab iitta doottem. Na ame bia amu, na ehaniɗna heppe, da eɗue, ena daakkulnu oɗ medattem.

²⁶ Da attem attem daattemnu ai, na da oɗelppa aome. Na da ɗo nahip ippuniɗkkutnu oɗ medattem.

²⁷ Da nahip kobol danab hekkunu elele iitta, da amunu dabmak unuqag awewe daakkulnu amu, na ehaniɗna heppe, da nahip oo yaak nai ɗo bia, da nai amunu meu dooppi ool maidkkunu oɗ medattem.

²⁸ Da oo doyak awen, bahi yaak doottem. Na ame bia, na eɗun ɠagattag iukkutnu unuqidttem.

²⁹ Da hambuppuak nai madipanu na ehaniɗppeppe, da ii madipanu oɗ medattem. Na dahilnu oo bodoette enanag maɗoɗ ele hak kobol dim lamidna, nahip ɗo ippuniɗppe dookkulnu unuqidttem.

³⁰ Da doyak diig genabib dim lamidkkulnu ippu aakkuib tituanmi. Da nahip ɗo waappa daakkulnu ool okkai daye, amuib hekkulnu dabmak ɠagattag aomi.

³¹ O Yawe, da nahip ɗo ɠagattag aɗattem. Danab ah ag da uɗa nak meɗamnanu oɗ medattem!

³² Na ⌊nahip ɗoppa⌋ diignu doyak tutukku dahil tuɗitte, okkai mette amunu, da nahip ɗo, gamag ahak ele dim lamidkkul.

Danab nug Yawe dabmak medakkunu unuqidttenu nai

³³ O Yawe, na nahip ɗonu diig ippuniɗppe dookkulnu oɗ medattem. Na anam heppe, da deɗ ohppa genabnab genab dim lamidkkul.

³⁴ Da nahip ɗo dim lamidkkulnu, da meul ohppa anam hekkulnu amu, na ɗo nahipnu diignu doyak tutukku meɗakkutnu oɗ medattem.

³⁵ Na heppe, nahip ɗo da ib adeppa adeppa gokkulnu ippuniɗtte amu, da amuppaib gokkulnu oɗ medattem. Aɗinu? Da ib amunu enanagnab doottem.

³⁶ Da keeke nau laalanu ool ittag qeebeb aokkul am nau. Da nahip ɗo doyen dim lamidkkul, amuam ena amunu, na da ɗo nahip dim lamidkkulnu ehah meɗakkutnu oɗ medattem.

³⁷ Na ɠagattag iuppe, da keeke nau oh dimattei! Na heppe, da nahip naippa dayen oikkulnu oɗ medattem.

³⁸ Danab ag nahipnu ebehilag oh bodoetta le mette ele, na ag ena hadakkutnu nai qagattem. Amu na nahip nai qakkak dahilnu heme amu, na nai amu dim lamidna, na da, nahip maɗi nid, na dahilppa ena anam hekkutnu oɗ medattem.

³⁹ Nahip ɗo am ena amunu, na da ehaniɗppe, uɗa nak nau guittak ele, da amunu dookkulnu uug okkainab doottem amu, uug amu dahilppa ii uɗimanu oɗ medattem.

⁴⁰ Antte! Da nahip oo yaak nai ɗo bia oh dim lamidkkulnu ool huana hette. Na genab tutukku hak kobol aakkuib dim lamidttem amunu, na ehaniɗna heppe, da eɗue ena daakkulnu oɗ medattem.

Danab nug Yawenu ɗonu ooppa genab doottenu nai

⁴¹ O Yawe, na heppe, nahip oo mauhaknab kobol dahilppa uɗia daakkunu oɗ medattem. Ao, na da ehaniɗppe, da padal ii mepanu nai anan qakkame amu, na amu hekkutnu unuqidttem.

⁴² Na anam heppe, da nahip nainu oolppa genab doottem amunu, da laa ag da eheɗ aon aon iutteb amu, da nai nob madakkulnu elele daakkul.

⁴³ Da nahip ɗo dim lamidkkul dayeb amu, da elele hekkul. Elele haknu ib laa iitta amunu, na doyak diig genabibnu nai dahilppanu aɗilmananu oɗ medattem.

⁴⁴ Da nahip ɗo dim lamittetteib dayeye, hanhan anamib hekkul.

⁴⁵ Da nahip oo yaak nai ɗo bia oh genab dim lamidkkulnuib dabmettem amunu, da hipunin waappa ii daapa.

⁴⁶ Da nahip ɗonu king amelagppa abippi, ag heppeg, da uɗal ii nema.

⁴⁷ Da nahip ɗo oh dim lamidkkulnu enanagnab doottem! Da nahip ɗonu ool mauhtte!

⁴⁸ Da, da nahip ɗonu ool mauhtte amu, da ɗo amu oh binag mettem. Da nahip ɗonu dabmak unuqag awewe daattem.

Danab nug Yawenu ɗo am nug ehanidkkunu ooppa genab doottenu nai

⁴⁹ Na da, da am nahip maɗi nid amu, na da ehaniɗkkutnu ame amunu, da ena baknu dabmak aɗa oiyak aɗe daye, na nahip nai amu daut atimanu oɗ medattem.

⁵⁰ Na heppe, da bau daakkulnu na nai anan qakkame amunu, haen da uugppa daattem amu, nai nahip amu he, da oo mak doottem.

⁵¹ Beɗuppa tak danab ag awa awa qettak nai dahilnu atteb, amge da nahip ɗo dim lamittaknu ii uuttem.

⁵² O Yawe, da nahip ɗo ig anukka mekkame amu, da dabmette aute aottem. Ɗo amu oh da oo mak meɗatteb.

⁵³ Nau hak danab ag nahip ɗo dim lamittaknu uutteb. Ag amu hetteb, kobol ahilag amuam he, da ool huana nauhtte.

⁵⁴ Da adeppa adeppa daattem amu, appa da nahip ɗonu ahi edattem.

⁵⁵ O Yawe, tuqan amu da, na am aun, da amu dabmein aute aottem, amu diig amunu da nahip ɗo dim lamidttem.

⁵⁶ Dahil hak am anam aakku daatte. Da nahip oo yaak nai ɗo bia, da amu dim lamidttem.

Danab nug Yawenu ɗo dim lamidkkunu meu ohppa hettenu nai

⁵⁷ O Yawe, keeke ena oh da eppelppa daakkunu elele amu, na nakka keeke amu oh abenlag aon dayeye, na da ele daattep amunu, da ena, elele daattem! Da nahip ɗo dim lamidkkulnu nai ainne qagattem.

⁵⁸ Da meul ohppa ele nahip itittak enanu ool hette. Ao, na oo bodoette enanag maɗoɗ ele hak kobol dim lamidna hena meɗakkutnu ame amu, na amu hekkutnu oɗ medattem.

⁵⁹ Da attem hein oittemnu dabmemi. Ao, da nahip ɗo dim lamidkkulnu ool eɗuom.

⁶⁰ Nahip ɗo, da aɗi keeke hekkulnu atte amu, da pahanab dim lamitte hekkul. Da ameg mein daappi ukkeb haknu amu, da amu ii hepa.

⁶¹ Nau hak danab ag da muɗippa hippaliɗna, eeɗilppeg hipuninppa nolomtai, amge da anam ii hepa. Da nahip ɗonu ii daul atima.

⁶² Da nahip ɗo tutukkunu ena heme akkulnu amu, da tuqan tugmag ahattem.

⁶³ Aun laa nug nahipnu ebehi oh bodoetta le mette, nug am da layal. Ao, aun laa nug nahip oo yaak nai ɗo bia, nug nai amu dim lamidtte, nug am da layal.

⁶⁴ O Yawe, na wan danab ah oh dilagnu oo mauhaknab doottem. Na nahip ɗo ippuniɗkkutnu ool daatte.

Yawenu ɗo am keeke ena, en okkai eɗittak

⁶⁵ O Yawe, na da, da am nahip maɗi nid amu, na dahilnu ena hekkutnu ame. Na anam hekkutnu ool daatte.

⁶⁶ Da nahip ɗo ag da aɗi hekkulnu ippuniɗtteb oolppa genab doottem amunu, na doyak, ena haknu dabmak ena ele ippuniɗkkutnu oɗ medattem.

⁶⁷ Da eheɗ hein, guittak ii aomi haenppa amu, da ib tutukku apiɗitten oimi, amge na bu meɗai, gemu amu da nahip nai dim lamidttem.

⁶⁸ Na enaib daanna, enaib hettem. Na aɗi keeke hettem amu, na ena hettem. Na da nahip ɗo ippuniɗkkutnu oɗ medattem.

⁶⁹ Am beɗup tak danab ag dahilnu hambuppueg, laa ag dahilnu nau dootteb, amge da meul ohppa nahip oo yaak nai ɗo bia, da nai amu dim lamidttem.

⁷⁰ Beɗup tak danab ag danab ah laa makkuɗadna, guittak mattaglagnu mauhnoak henan, uug ii dootteb, amge da nahip ɗonu enanagnab doottem.

⁷¹ Da nahip ɗo doye aute awen dabmedakkulnu amu, guittak na meɗame, guittak amuam ehaniɗom; dahilnu am ena.

⁷² Da men doɗo huanak ele daalom, amuam nakok enatai, amge da nahip ɗo aɗattem amu, amuam enanagnab. Da nahip ɗonu ool huanak hette.

Yawenu ɗo am hanhan nai doya mala hettoɗia epeɗia elele mettak kobolib ɠagattag ebatte

⁷³ Na da heiɗme. Ao, na eppen da heiɗom. Na da ehaniɗna heppe, da ɗo nahipnu diignu doyak tutukku doyen dim lamidkkulnu oɗ medattem.

⁷⁴ Da na aɗi hekkutnu ame amu, na amu hekkutnu oolppa genab doottem amunu, da na dahilnu, na ame bia, na ena heiɗppe, laa oh ag nahipnu ebehilag oh bodoetta le mette ele ag amu anidna, ag oolag gamag ahakkunu ool daatte.

⁷⁵ O Yawe, da imu doottem. Na laa bu medakkutnu henana, na genab tutukku hak kobol dim lamidna hettem. Anam bia amu, na oo metta ii uuak kobol dim lamidna, na da bu meɗame.

⁷⁶ Gemu amu, nai na da, nahip maɗi nid, na dahilnu anana, ɠagattag qettana ame amu, na nai amu amebia, nahip oo mauhaknab kobol am da oo mak da meɗakkutnu ool daatte.

⁷⁷ Da nahip ɗonu enanagnab doottem amunu, da bau daakkulnu, na dahilnu oot bodoetta, le mekkunu oɗ medattem.

⁷⁸ Beɗuppa tak danab, ag dahilnu hambuppuak nai diig iittappa madippig amunu, ag uɗa nak nau aon oiglagnu oɗ medattem, amge da nahip oo yaak nai ɗo bia, da nai amunu dabmak unuqag awewe daakkul.

⁷⁹ ⌊Na da ehaniɗppe da nahip nai pehettak dim lamidppi,⌋ laa ag nahipnu ebehilag oh bodoetta le mette, ag nahip ɗonu diignu doyak tutukku ele, ag da aniɗnana, nahipnu dabmak aoglagnu oɗ medattem.

⁸⁰ Da uɗa nak ii doopanu amu, da nahip ɗo dim lamidppi, nahip neekkakppa da oolppa kaliak laa ii daamanu ool daatte.

Yawe heeb, danab laa nug qagaiettakppa ii daamanu unuqittak

⁸¹ Da gai-iittanab daaiyi, na da ehaniɗppe padal ii mepanu ool naɗinab daatte. Na da ehaniɗppe, da ii padal mepanu ame amu, da na anam hekkutnu oolppa genab doottem.

⁸² Da na haen elab iikku amen mein daattem; na ame bia, na ehaniɗppe padal ii mepanu tuɗid ele amen mein daattem. Da anam beɗul mein dayeye, da beɗul bahi yaatte. Da attem. “Haen gane laa ukkeb, na heppe, da oo mak aokkul?” awe attem.

⁸³ Genab, da am doɗ gaɗa wain inaknu aab kahppa daya nauhtte bia daattem, amge diig amunu da nahip ɗonu daul ii atitte.

⁸⁴ Da, da am nahip maɗi nid, da na amen mein daattem; amu haen gane laa ele ukkeb, da anamib na amen mein daakkul? Haen gane laa ukkeb, na laa, ag da eheɗ heiɗkkulagnu hetteb, na ag bu madakkut.

⁸⁵ Nahip ɗo ag anam ii hemananu atte, amge beɗup tak danab ag moɗ uma noak, da amuppa noin qekkulnu buuadppig.

⁸⁶ Danab ah ag nahip haknunab anak ohnu am genab elele dooglagnu elele. Ao, am anam amge hipunin hak danab ag diig iittappa da heiɗkkulagnu hetteb amunu, na da atognoiɗkkutnu oɗ medattem.

⁸⁷ Amu genab ag da niɗaeg, da mauhkkulnu daami; amge da nahip oo yaak nai ɗo bia, da nai amu dim lamittaknu ii uumi.

⁸⁸ Na danab ah dilagnu oo mauhaknab doottem amunu, da nahip ɗo dim lamidkkulnu na dahilnu oo mauhaknab doon heppe, da ii mauhpanu oɗ medattem.

Danab laa nug Yawenu ɗonu ooppa genab dookkunu elelenu nai

⁸⁹ O Yawe, nahip nai amu ii gog tema. Nug hab attan alet anam hanhan daakkuib.

⁹⁰ Na danab ah menuak laippu bau dotteb anen anen ahilagnu oo metta ii uuak kobol dim lamidna hena, hanhan anamib hekkut. Na wan heme amu, nug alet anam daatte.

⁹¹ Keeke oh am nahip maɗi nid daatteb amunu, nahip ɗo gemu ⌊nai imu yaak haenppa⌋ ele iikku daatte.

⁹² Da nahip ɗonu enanagnab ii doolom amu, da uug dahilppa dayebeb mauhlom.

⁹³ Na nahip oo yaak nai ɗo bia, na nai amu da ippuniɗna heehe, da beɗul ena dayak aomi amunu, da nahip nai amu ii daul atima.

⁹⁴ Da am nahip. Na da ehaniɗppe ii padal mepanu oɗ medattem! Aɗinu? Da nahip oo yaak nai ɗo bia, da nai amu atognoin dim lamidmi.

⁹⁵ Nau hak danab ag da iuglagnu meiɗna daatteb, amge da nahip ɗonu atognoin dabmekkul.

⁹⁶ Wanppa amu, keeke laa enaib ii daatte. Keeke ohppa am kaliak laa daatte, amge nahip ɗo am kaliak laa iitta.

Danab laa nug Yawenu ɗonu oo mauhttenu nai

⁹⁷ O ⌊Yawe⌋, da nahip ɗonu oo mauhak naɗi doottem! Da deɗ oh amun tuqan ele da nahip ɗonu dabmak unuqag awewe daattem.

⁹⁸ Nahip ɗo hanhan da gukkuiɗak daatte amunu, ɗo amu he, dahil doyak dabmak ena ele, am dahil kekeɗ dilag doyak dabmak ena ele eɗidtte.

⁹⁹ Da hanhan nahip ɗonu dabmak unuqag awewe daattem amunu, dahil doyak dabmak ena ele am ippunittak danab dilag eɗidtte.

¹⁰⁰ Da nahip oo yaak nai ɗo bia, da nai amu dim lamitten oittem amunu, da diignu doyak tutukku dahil am okkai, danab kaino dilag eɗidtte.

¹⁰¹ Da nahip nai dim lamidkkulnu elele daakkulnu, da ib eheɗ laappa oiyaknu uuen, appa ii oittem.

¹⁰² Na nakka da ippuniɗme amunu, da nahip ɗo dim lamittaknu ii uumi.

¹⁰³ Danab laa nug keeke ubuhi ele lakkunu oo huana hette, amubia da nahip nainu ool huananab hette. Uppuh leppu am ubuhi elenab, amge nahip nai am ubuhi huanaknab ele.

¹⁰⁴ Nahip oo yaak nai ɗo bia, nai amu diignu doyak tutukku da meɗatte, diig amunu da ib eheɗ ohnu, am nau ninig ele doottem.

Yawenu ɗo am amahlak megatte

¹⁰⁵ Nahip nai amu hul bia oikkulnu amahlak meɗatte. Yo, am amahlak bia da ib ippuniɗkkunu daatte.

¹⁰⁶ Da nahip ɗo, ag genab tutukkuib amu, da ɗo amu dim lamidkkulnu nai ɠagattag qetten ami. Da amu ain, da amuib hekkulnu baula ɠagattag ami.

¹⁰⁷ O Yawe, da guittak naunab doottem. Na da ehaniɗppe, bau daakkulnu ame amu, na anam hekkutnu oɗ medattem.

¹⁰⁸ O Yawe, da, “Ena heme,” anak na medakkul hettem amu, na aokkutnu oɗ medattem. Ao, na nahip ɗo da ippuniɗkkutnu unuqidttem.

¹⁰⁹ Kekeɗ ag da hanhan iuglagnu hetteb, amge da nahip ɗonu ii daul atima.

¹¹⁰ Nau hak danab ag ahilag pelem dahilnu bappaidppig, amge da nahip oo yaak nai ɗo bia, da nai amu dim lamittaknu ii uuttem.

¹¹¹ Nahip ɗo am dahil en hanhannu daatte. Nahip ɗo am gamag ahak da meɗatte.

¹¹² Da nahip ɗo meul ohppa, hanhan alet ele dim lamidppi ukkeb, gog tak haenppa batakkulnu dabmak awe, ɠagattag aɗattem.

Danab nug Yawenu ɗo dim lamidtte, nug ɠagattag daakkunu nai

¹¹³ Danab ag na dim lamidkkulagnu dabmak laippu iitta amu, da amu dilagnu nau ninig ele doottem, amge nahip ɗonu da ool mauhtte.

¹¹⁴ O Yawe, na am dahil padal mak eɗitta ena dayaknu ehanittak, na dahil guppiɗ ele daattem. Da nahip nainu dabmein, ena daakkulnu dabmak aɗe oittem.

¹¹⁵ Da dahil Kayaknu ɗo dim lamidkkulnu amu, laa ag nau hetteb ele, ag dahilnu awaidna ukkeg!

¹¹⁶ O Yawe, da bau daakkulnu, na nai ɠagattag qettan, da ehaniɗkkutnu ame, na anam hekkutnu oɗ medattem. Na ehaniɗppe, da bau daakkulnu amu, da dabmak amu aɗe oittem, amu na heppe, anamib bekkunu unuqidttem.

¹¹⁷ Da eheɗ laa eppegppa ii daapanu, da ena daakkulnu, da nahip ɗo hanhan dabmeinna oikkulnu amu, da na ehaniɗkkutnu oɗ medattem.

¹¹⁸ Laa ag nahip ɗo ii dim lamidtteb amu, na ag geɗadttem. Aɗinu? Ag hambuppuaknu oolagppa genab doyegeg, hambuppuak amu he, ag ib eheɗppa gotteb.

¹¹⁹ Na laa nug kinipan akke gotte bia, na nau hak danab dilagnu oot ii hette amunu; da nahip ɗonu ool mauhe dim lamidttem.

¹²⁰ Da nahipnu ebehil oh eheɗ bodoetta le meeme, da beɗul hahaɗtte. Da nahip ɗo tippalen eheɗ heppi, na bu meɗamnanu baɗattem.

Danab laa nug Yawenu nai dim lamidttenu nai

¹²¹ Da nai doya mala hettoɗia epeɗia elele mettak kobol, genab tutukku hak kobol ele dim lamaten hemi. Na uuiɗppe, laa da eheɗ heiɗtteb ele ag eɗilna aɗailppeg, ag eppelagppa daapanu oɗ medattem.

¹²² Da am nahip maɗi nid. Na ehaniɗppe, da ena daakkulnu oɗ medattem. Na heppe, beɗuppa tak danab ag da ii eɗilna, ii gumiɗmananu unuqidttem.

¹²³ Da na ehaniɗppe, da padal ii mepanu na amen haen elab mein dayeye, gemu ele amen mettem. Ao, na genab tutukku hak kobolib hena, na da ehaniɗppe, da padal ii mepanu nai anan qakkame, amu na amu hekkutnu da na amen haen elab mein dayeye, gemu ele amen mein daattem.

¹²⁴ Da am nahip maɗi nid. Na dahilnu attem attem hekkutnu amu, na nahip oo mauhaknab kobol dabmena, na amuib dahilppa hena, na nahip ɗo ele da ippuniɗkkutnu oɗ medattem.

¹²⁵ Da am nahip maɗi nid. Da nahip ɗo oh diilag pehettak dookkulnu, na diignu doyak tutukku da meɗakkutnu oɗ medattem.

¹²⁶ O Yawe, na keeke laa hekkutnu haen aakku doum daatte. Danab ah ag nahip ɗo loppaɗtteb.

¹²⁷ Da golnu am nakok ena doottem. Ao, da gol ena dubuttid iitta elenu amu, da nakok ena doottem. Amge da nahip ɗonu amu, da enanagnab doyen, da amunu ool mauhtte.

¹²⁸ Da nahip oo yaak nai ɗo bia ohnu amu, da ag tutukkuib daatteb oolppa genab doottem. Ao, da nahip ɗo, nahip oo yaak nai ɗo bia ohnu anam doottem amunu, da ib eheɗnu nau ninig ele doottem.

Danab nug Yawenu ɗo dim lamidkkunu oo hettenu nai

¹²⁹ Ɗo nai nahip amu enanagnab, diig amunu amu, da ɗo amu dim lamidttem.

¹³⁰ Nahip nai amu, danab ah ag doon, oolag maitte, am ag amahlak madatte. Ao, nahip nai danab ag doyak ii awak ele, am amu dilag diignu doyak tutukku madatte.

¹³¹ Da genab nahip ɗo doolomnu ool huanaknab daye ⌊amu hekkulnu uɗat okkainab⌋ hettem amunu, da danab uɗat huana haaha, hik qette bia heinne daattem.

¹³² Na laa ag nahipnu oolag mauhe, na oot ag madattem, amubia na dahilnu dabmena, dahilnu oot gai-iitta doon oot meɗan ehaniɗkkutnu oɗ medattem.

¹³³ Na nahip nai ippuniɗnana, amuppa na oiyak dahil ulum mettan heppe, hipunin da ii gumiɗmanu oɗ medattem.

¹³⁴ Da nahip ɗo dim lamidkkulnu, na danab ag da eheɗ heiɗkkulagnu hetteb eppelagppa dayaknu qagaiettakppanu eɗua uhuqak hena meɗappe, ag da ii heiɗppeg nauhpanu oɗ medattem.

¹³⁵ Da nahip maɗi nid, na da ele daagnihnu, na oot dahilnu ena daakkunu, na nahip ɗo ippuniɗkkutnu oɗ medattem.

¹³⁶ Danab ah ag nahip ɗo ii dim lamidtteb amunu, da gaai gaai, amel leb huana nette.

Yawenu ɗo am nai doya mala hettoɗia epeɗia elele mettak kobol haen oh ippunigtte

¹³⁷ O Yawe, na am genab tutukkuib daattem, nahip ɗo am tutukkuib.

¹³⁸ Nahip ɗo am genab tutukkuib daatteb. Ao, danab nug nahip ɗonu genab elele dookkunu elele.

¹³⁹ Dahil kekeɗ ag oolag eɗueb, na dim lamidkkulagnu uɗat hekkulnu yag-nab-bak doye, hei ukke, da ebehil bodoettom. Aɗinu? Dahilad kekeɗ ag nahip nai dimettan, ii dim lamidtteb.

¹⁴⁰ Nahip nai am oppiaawaknab ele. Da, nahip maɗi nid, da nahip nainu ool mauhtte.

¹⁴¹ Am danab ah ag dahilnu, da am keeke hamu doonna, ag da aon aon iutteb, amge da nahip oo yaak nai ɗo bia ii daul atitte.

¹⁴² Na hanhan genab tutukkuib daattem, anamib daakkut; nahip ɗo am genabib.

¹⁴³ Uug digdig, uug nau digdig ele, uug amu dahilppa beppig, amge nahip haknunab anak am he, da enanagnab doottem.

¹⁴⁴ Nahip ɗo am gemu tutukkuib daatte, hanhan anamib daakku. Am da bau daakkulnu amu, na da ehaniɗppe, da diignu doyak tutukku aokkulnu ool daatte.

Danab laa nug Yawe ehanitteb, qagaiettakppa ii daamanu unuqittak

¹⁴⁵ O Yawe, da meul ohppa na unuqidttem. Da nahip ɗo dim lamidkkulnu amu, na da oɗelppa aokkutnu oɗ medattem.

¹⁴⁶ Da nahipnu ettem. Am da nahip ɗo dim lamidkkulnu amu, na ehaniɗppe, da padal ii mepanu unuqidttem.

¹⁴⁷ Da aam ii beebe, tatam da ahen ehaniɗkkutnu unuqidttem. Na da ehaniɗkkutnu ame amunu, da amu bekkunu dabmak aɗe oittem.

¹⁴⁸ Am nahip nai na ame amu, da amu dabmedakkulnu, da tuqan ahe daattem.

¹⁴⁹ O Yawe, na oo mauhaknab kobol dim lamidttem amunu, na dahil ewak dookkutnu oɗ medattem. Ao, na nai doya mala hettoɗia epeɗia elele mettak kobol dim lamidttem amunu, na heppe, da bau daakkulnu unuqidttem.

¹⁵⁰ Danab ah eheɗ laa hekkulagnu lokkumakppa doonna, maittak eheɗ aotteb ele, ag da gukkiɗna daatteb, amge ag nahip ɗonu awaidna oitteb.

¹⁵¹ O Yawe, ag da gukkuiɗak daatteb, amge na, na ele da gukkuiɗak daattem, amu nahip ɗo oh am genabib.

¹⁵² Anukkanab, da nid bau dayeye, da dakka da nahip ɗo ihuhuittette, da nahip ɗo am hanhan daakku anidmi.

Ehanittak awaknu unuqittak

¹⁵³ Da nahip ɗo daul ii atiom amunu, na da uug mawewe daattem imu neegna ehaniɗppe, da qagaiettakppa ii daapanu oɗ medattem.

¹⁵⁴ Danab ah ag da eheɗ nau hemi anan, da mauhkkulnu atteb, amge na heppe, ag hambuppuak madittebnu miag atikkunu, na da qagaiettakppanu eɗua uhuqak hena meɗakkutnu oɗ medattem. Ao, na da bau daakkulnu nai ame amu, na amu hekkutnu unuqidttem.

¹⁵⁵ Nau hak danab ag nahip ɗo dooglagnu ii hetteb amunu, na ag padal memananu iinab ehanadttem.

¹⁵⁶ O Yawe, na am oot bodoetta, le ma auta autanab aotte. Ao, na hanhan nai doya mala hettoɗia epeɗia elele mettak kobol dim lamidttem. Amu nahip kobol amu ippunigtte bia, na heppe, da bau daakkulnu oɗ medattem.

¹⁵⁷ Dahil kekeɗ kuɗum ag da eheɗ heiɗtteb, amge da nahip ɗo nakok laa ii tappai nette.

¹⁵⁸ Danab ah ag na aɗi attem, ag amunu oolagppa genab ii dootteb, ag nahip nai ii dim lamidtteb amunu, danab ah amunu da oolppa uuaknab doottem.

¹⁵⁹ O Yawe, na da nahip oo yaak nai ɗo bia, na da nai amunu ool mauhtte anidkkutnu oɗ medattem. Na danab ah dilagnu oo mauhaknab doottem amunu, na dahilnu oo mauhaknab doon heppe, da ii mauhpanu unuqidttem.

¹⁶⁰ Nahip nai oh amu genabib. Ge, nahip ɗo oh am genab tutukkuib, ag hanhan, alet daaglag.

Danab nug Yawenu ɗo dim lamidkkunu oo huana hettenu nai

¹⁶¹ Ikki danab ag diig iittappa eheɗ heiɗtteb ⌊amge amuam keeke okkai iitta⌋. Da ebehil oh nahip nainu bodoetta le mette ⌊amuam keeke okkai.⌋

¹⁶² Laa nug en naɗinab awa, gamag ahak dootte, amubia da nahip nainu gamag ahak doottem.

¹⁶³ Hambuppuak nai, hambuppuak kobol elenu amu, da nau ninig ele doyeye, oolppa uuaknab doottem amge nahip ɗonu da ool mauhtte.

¹⁶⁴ Nahip ɗo oh am nai doya mala hettoɗia epeɗia elele mettak kobol dim lamidtteb amunu, da deɗ anen anenppa haen kuɗum na binan humattem.

¹⁶⁵ Laa ag nahip ɗonu oolag mauhtte ele, ag oolag maɗoɗ okkai ele daanna, ag ii nena qetteb.

¹⁶⁶ O Yawe, ⌊haen da uugppa dayeye⌋ na ehaniɗppe padal ii mepanu, da na amen mein dayeye, da nahip ɗo dim lamidttem.

¹⁶⁷ Da nahip ɗonu ool huana mauhehe, da ɗo amu dim lamidttem.

¹⁶⁸ Da keeke oh hettem amu, na doottem amunu, da nahip oo yaak nai ɗo bia, amu nahip ɗo ele dim lamidttem.

Ehanittak awaknu unuqittak laa

¹⁶⁹ O Yawe, na dahil unuqittak dookkutnu oɗ medattem. Ao, na diignu doyak tutukku meɗakkutnu ame amu, na amu hekkutnu unuqidttem.

¹⁷⁰ Na dahil unuqittak dookkutnu oɗ medattem. Na ehaniɗppe, da qagaiettakppa ii daapanu nai ame amu, na anam hekkutnu unuqidttem.

¹⁷¹ Na nahip ɗo da ippuniɗttem amunu, da na binan naɗi humattem.

¹⁷² Nahip ɗo oh am genab tutukkuib amunu, da nahip nai binag mekkul.

¹⁷³ Da nahip oo yaak nai ɗo bia oh dim lamidkkulnu amu, da ib amu tituanmi amunu, na ehaniɗkkutnu babaittak daakkunu oɗ medattem.

¹⁷⁴ O Yawe, na da ehaniɗppe, da ii padal mepanu ool naɗi daatte. Da nahip ɗonu enanagnab doottem.

¹⁷⁵ Da na binan humakkulnu na ehaniɗppe, da bau daappi, nahip ɗo amu ehanittak meɗaglagnu oɗ medattem.

¹⁷⁶ O Yawe, da sipsip laa qettoɗom bia, da yawaiye oimi, amge da nahip ɗonu ii daul atitte amunu, na uɗin, na da, nahip maɗi nid, na da mattiɗna awiɗkkutnu oɗ medattem.