Sam 118 - Nobonob Baibel

Yawe Nug danab ehanitte, nug kekeɗ eɗattom amunu, nug Yawe amegppa, “Ena heme,” aum

¹ Ag Yawe amegppa, “Ena heme,” aon aig! Aɗinu? Yawe Nug enaib dayaya, enaib ele hette. Laa amu, nuhig oo mauhaknab kobol hanhan alet daatte.

² Israel danab ah, ag, “Yawenu oo mauhaknab kobol hanhan alet daatte,” aig!

³ Ao, Aron buɗub, ag mana mettak danab daatteb amu, ag, “Nuhig oo mauhaknab kobol hanhan alet daatte,” aig!

⁴ Ge, laa oh ag Yawenu ebehilag oh bodoetta le mette ele ag, “Nuhig oo mauhaknab kobol hanhan alet daatte,” aig!

⁵ Da uugppa daami, haen amuppa Yawe unuqitti, Yawe Nug oɗelppa awa, da ehaniɗe, qagaiettakppa ii daami.

⁶ Yawe Nug da ele daattep amunu, da ii baɗapa. Ao, ⌊Yawe Nug ag ii paɗatteb hekkulag dayeb amu⌋, danab ag dahilppa aɗi eheɗ laa hekkulagnu elele daaglag? Laa iitta.

⁷ Yawe Nug da ele daattep. Nug da ehaniɗtte. Ao, anam amu, da dahil kekeɗ eɗadkkul.

⁸ Yawe, nuhig ehanittaknu ooppa genab doyaknu am ena; danab ah laa dilag ehanittaknu ooppa genab doyaknu amu, amuam ena iitta.

⁹ Yawe, nuhig ehanittaknu ooppa genab doyaknu amu ena; king tiilagppan danab dilag ehanittaknu ooppa genab doyaknu, amuam ena iitta.

¹⁰ Wanppan wan ohnu danab ag da taliliɗppig, ⌊amge⌋ Yawe Nug da ehaniɗom amunu, da ag hattai nauhppig.

¹¹ Ao, ag da taliliɗna autna aoppig, ⌊amge⌋ Yawe da ehaniɗom amunu, da ag oh hattai nauhppig.

¹² Dahil kekeɗ ag uppuh ameg naɗi bia da taliliɗppig, ⌊amge⌋ Yawe Nug da ehaniɗom amunu, keeke qaɗaiettaknab, aab laippun ewe iitta mette, amubia da ag hattai, ag nauhna laippun mauhppig.

¹³ Kekeɗ dahil ag da duttuniɗeg, da nein qekkulnu daami, amge Yawe Nug da ehaniɗom.

¹⁴ Yawe Nug dahil ɠagattag dayaya, oo gamag ahak dahil diig ele daatte. Nug am dahil Padal ii maknu ehanittak daatte.

^15-16 Yawe Nug genab tutukku hak danab ehanatte, ag ii padal meppig amunu, ag oolag gamag okkai ahe, Yawe Nug ag ehanatte, ag kekeɗ eɗadppignu ag peh laulkadppa ag huana enan, inam atteb. “Yawe Nug keeke okkainab heum. Genab, Nug nuhig ɠagattag okkaippa ehanikke, ig ii nauhmut! Genabnab, Yawe Nug keeke okkainab heum!” aon enan atteb.

¹⁷ Da ii mauhpa. Iitta! Da bau dayeye, da Yawe, Nug dahilnu aɗi heum amu, da amunu danab ah amelagppa akkul.

¹⁸ Yawe Nug da ena daakkulnu bu ɠagattag da meɗom, amge Nug da mauhpanu ehaniɗe, da ii mauhmi.

¹⁹ Yawe, Nug genab tutukku hak kobolib hette, amu da nuhigppa gokkulnu na nuhig mettid lag od matulppe, da Yawe noobppa wain, da Nug amegppa, “Ena heme,” akkul.

²⁰ Od imuam od Yawe noobppa wanaknu od, amu genab tutukku hak danab ag od amuppa nona, Nug noobppa watteb.

²¹ O Yawe, na dahil unuqittak doon, kobol ena dahilnu hena meɗame amunu, da na amenppa, “Ena hen meɗame,” awe attem. Yo, na am dahil Padal ii maknu ehanittak daattem.

²² Men laa, lag hak danab ag men amu uuppig, amge lag mameg nug men amu awa me, lagnu men anuqak daatte.

²³ Yawe Nug men amu he, men amu anuqaknab dayeye, ig amenigppa anidta, ig enanag doot, dabmak kuɗum aomut.

²⁴ Yawe Nug gemu deɗ imu ha mekkom amunu, gemu ig oonigppa ena dootta, oonig gamag ahaɗ!

²⁵ O Yawe, ig na ehanigppe, ig padal ii mematanu oɗ medattem. Ao, O Yawe, na ehanigppe, ig ena daagnignu unuqidttem.

²⁶ Laa Yawe onigppa uɗitte amu, ig Yawe Nug itidkkunu oonig daatte. Ao, ig Yawe laugppanu, ig ag uɗitteb ele itadttem.

²⁷ Yawe Nug Kayak daatte. Nug ig nuhig amahlak mekkom. Ag oolag gamag ahebeb, mana mettak aon uɗin, qaɗabppa meig!

²⁸ O Kayak, na dahil Kayak, da na amenppa, “Ena hen mekkame,” akkul! Yo, na am dahil Kayak, da na binan mekkul.

²⁹ Ag Yawe amegppa, “Ena heme,” aon aig! Aɗinu? Yawe Nug enaib dayaya, enaib ele hette. Laa amu, nuhig oo mauhaknab kobol hanhan alet daatte.