Sam 116 - Nobonob Baibel

Yawe Nug danab laa ehanittom amunu, danab amu nug Yawe binag mette

¹ Yawe Nug nai dahil dootte. Ge, Nug unuqittak oo doyak ele dahil dootte amunu, da nuhignu ool mauhtte.

² Nug unuqittak dahil doya ehaniɗom amunu, haen da bau daattem imuppa, da Nugib unuqidkkul.

³ Hikan danab nug doɗ aokkunu pelem me daatte, amubia mauhak nug pelem meum dayeye, da aolen daami. Yo, mauhaknu guittak dahilppa ba dayom. Ge, da uug kuɗum, oo doyak kuɗum ele doomi.

⁴ Da anam dayeye doyen, amu da Yawe onigppa ein ami. “O Yawe, na da ehaniɗppe, da bau daye, ii mauhpanu oɗ medattem.” Da anam unuqidmi.

⁵ Yawe Nug oo bodoette enanag maɗoɗ ele hak kobol dim lamidtte. Nug am keeke genab tutukkuib hette. Ihinig Kayak, Nug haen oh ihinignu oo bodoetta le mette.

⁶ Yawe Nug laa ag gai-iitta daatteb ehanadtte. Haen da uug kuɗum kukuatte daaiyi amu, Yawe Nug da ehaniɗe, da padal ii memi.

⁷ Nug anam he, da dakka da amelppa, da dahilnu inam ami. “Yawe Nug nahip-ppa ena heum amunu, na baula maɗoɗ daye!” Da anam ami.

⁸ O Yawe, na ena heiɗme. Aɗinu da anam attem? Na da ehaniɗe, da ii mauhmi. Na da ehaniɗe, da ii gaattem. Na da ehaniɗe, da ii nein qettem.

⁹ ⌊Yawe Nug da ehaniɗe, da ii mauhmi amunu,⌋ da Nug noobppa danab bauklel daatteb, da ag oolagppa daattem.

^10-11 Da Yawenu oolppa genab doomi, amunu da nai inam ami. “O Yawe, da uug nau kuɗum anidttem,” awe ami. Yo, da oo uug nau qak doyeye, da nai inam ami. “Danab oh ag hambuppuak danabib daatteb,” awe ami.

¹² Da aɗitai keeke laa Yawe Nug dahilnu ena heumnu nob ena medakkulnu laa iitta.

¹³ Amge da Nug ehaniɗomnu, “Ena heme,” Yawe amegppa akkulnu amu, da laippu dayaknu ofa, amu wain gokkaɗaknu ofa ele hein, Nug medakkul. Da Yawe unuqidkkul.

¹⁴ Da keeke Yawe amegppa genabnab hekkulnu nai ain qakkami amu, da hekkul. Da danab ah nuhikkud oh noolagppa hekkul.

¹⁵ Yawe Nug danab ah nuhikkud ag nuhignu oo metta ii uuak kobol dim lamidtteb ele, Nug amu dilagnu oo mauhtte. Ag mauhegeg, Nug keeke hamu, keeke nakokib iinab dootte.

¹⁶ O Yawe, imuam genabnab, da am nahip maɗi nid laa. Ao, da am nahip maɗi nid. Da am ah laa nahip uɗat heum ele amu, da nug bekka. Na da keeke nau hippaliɗeg daami, na amuppan uhuqiɗe, ena daattem.

¹⁷ O Yawe, da na noomppa ena heme anaknu ofa hein medakkul. Ao, da Yawe unuqidkkul.

¹⁸ Da keeke Yawe amegppa genabnab hekkulnu nai ain qakkami amu, da hekkul. Da danab ah nuhikkud oh noolagppa hekkul.

¹⁹ Da geha Yawe laugnu haɗap-ppa, hekkul. Ao, da Jerusalem gamagppa hekkul. Ag Yawe binag meig!