Sam 115 - Nobonob Baibel

Kayak genab laippuib daatte

¹ O Yawe, danab ah ag ig Israel, ag ig binanig okkai mekkaglagnu am oonig ii daatte. Iitta! Ig genabnab danab ah laa ag binanig maknu oonig ii daatte. Amu na oo mauhaknab kobol dim lamidnana, na oo metta ii uuak kobol ele dim lamidttem amunu, diig amunu danab ah ag na binan mekkulag am tutukku.

^2-3 Ihinig Kayak Nug hab attan daya, Nug aɗi keeke hekkunu hette amu, Nug hette amunu, wanppan wan anen anen dilag danab ah ag aɗinu, “Kayak ahilag amu adekku?” aon atteb?

⁴ Ahilag kayak hambuppuak amu silwa, golppa ele hattak. Danab ag eppelagppa hadatteb.

⁵ Ahilkad kayak dottolkad ag oɗelag ele, amge ag nai mattiglagnu elele iitta. Ao, ag amelag ele, amge ag neegkkulagnu elele iitta.

⁶ Ahilkad kayak dottolkad ag daulag ele, amge ag nai dooglagnu elele iitta. Ao, ag noolag ele, amge ag uɗiqkkulagnu elele iitta.

⁷ Ahilkad kayak dottolkad ag eppelag ele, amge ag keeke aɗaglagnu elele iitta. Ao, ag baelag ele, amge ag tappan oiglagnu elele iitta. Genab, ahilkad kayak dottolkad ag baalag oɗe, oqaɗulag ele, amge ag oqotti hekkulagnu elele iitta.

⁸ Anam amu, laa oh ag dottolkad hadatteb ele, amu laala oh ag keeke amu dilagnu oolagppa genab dootteb ele ag, ag oh geha dottolkad amu bia daaglag.

⁹ O Israel danab ah, ag Yawenu oolagppa genab doyeg! Nug am ahilag ehanittak, ahilag guppiɗ ele daatte.

¹⁰ O Aron buɗub, ag Yawenu oolagppa genab doyeg! Nug am ahilag ehanittak, ahilag guppiɗ ele daatte.

¹¹ Laa oh ag Yawenu ebehilag oh bodoetta le mette, ag nuhignu oolagppa genab doyeg! Nug am ahilag ehanittak, ahilag guppiɗ ele daatte.

¹² Yawe Nug ig Israel buɗub, ihinignu dabmette; Nug genab ig itigkku. Ao, Nug Israel danab ah itadkku. Nug Aron baekkudppa ele itadkku.

¹³ Yawe Nug, Nug laa ag nuhignu ebehilag oh bodoetta le mette, ag ele itadkku. Ao, Nug ag binalag okkai ele, o binalag okkai iitta amu, Nug ag oh itadkku.

¹⁴ Yawe Nug heeb, na nid menuadppe, na begapad, aɗenad ele ag ele nid menuadkkulagnu ool daatte.

¹⁵ Yawe, Nug hab, wan ele heum amu, Nug ag itadkkunu ool daatte.

¹⁶ Hab attan ukke ukke, adekku batatte, amuam Yawenu, amge nug wan danab ah oh mattom.

¹⁷ Danab ah mauhppig, ag Yawenu ahi ettan binag ii metteb. Genab, laa ag moɗ ooppa noppig ele, ag Nug ii binag metteb.

¹⁸ Amge ig bau daattem amu, ig Yawe binag mettem. Ig gemu, hanhan ele Nug binag metu! Ag Yawe binag meig!