Sam 111 - Nobonob Baibel

Yawe binag maknu sam

¹ Ag Yawe binag meig! Da meul ohppa genab tutukku hak danab ah, am Jakop buɗub ag Kayak dim lamidtteb ele, da ag ele qagmeta, Yawe amegppa, “Ena hen mekkame,” akkul.

² Yawe Nug keeke okkainab hette. Danab ah ag nuhig uɗatnu enanagnab dootteb ele, ag nuhig haknu tutukku dabmenan oitteb.

³ Aɗi keeke Nug hette ele amu, keeke amuam binag amahlak oppiaawak ele, am keeke ɠagattag onig okkai ele. Nuhig genab tutukku hak kobol am hanhan alet daatte.

⁴ Nug kobol danab hekkunu elele iitta heum ele amu, Nug he, danab ag amu daulag atikkunu elele iitta. Yawe Nug oo bodoette enanag maɗoɗ ele hak kobol dim lamitta, Nug ihinignu oo gai-iitta doya, oo mekka, ehanigtte!

⁵ Auntai nug nuhignu ebehi oh bodoetta le mette amu, Yawe Nug laa amu ee medatte. Nug aɗi hekkunu danab laa ele nug tituanya nai qagapiɗ ele amu, nug nai amu ii obat-tte. Iitta. Nug aɗi hekkunu aum am aakku hette.

⁶ Yawe Nug danab ah nuhikkud nuhig ɠagattag ippunattom. Nug ehanatte, nuhikkud danab ag laa dilag wan, ahilag daakkunu aoppig.

⁷ Nug aɗi aɗi hette ele amu, Nug nai doya mala hettoɗia epeɗia elele mettak kobol dim lamittatta, Nug oo metta ii uuak kobol ele dim lamitta hette. Nuhig oo yaak nai ɗo bia am ig danab ah kobol tutukku dim lamidtata daagnignu ippu ippunigtte.

⁸ Nuhig ɗo am hanhan daaglag; ii baolimna. Yawe Nug oo metta ii uuak kobol, kobol tutukku ele dim lamittatta, Nug ɗo amu oh meum.

⁹ Nug nuhikkud danab ah qagaiettakppanu eɗua uhuqak ha mattom. Ao, Nug nuhig nug tituana nai qakkak nai, Nug nai amu hanhan daakkunu meum. Yawe Nug oppiaawak daatte. Danab ah ag nuhignu ebehilag oh bodoetta le mette.

¹⁰ Danab nug Yawenu ebehi oh bodoetta le mette ele amu, danab amu nug digma, doyak dabmak ena ele aokkunu hette. Ao, danab ah oh ag Yawenu oo yaak nai ɗo bia dim lamidtteb ele amu, ag diignu doyak tutukku ele. Ag Nug binag hanhan meig!