Sam 109 - Nobonob Baibel

Laa uugppa daatte ele amu, nuhig nai

Imuam Dawitnu sam; Dawit nug danab kwaia gumattenu yom.

^1-2 O Kayak, nau hak danab, danab ag hambuppuak henan daatteb ele, ag dahilnu nai nau atteb. Ao, ag dahilnu hambuppuak nai maditteb Am anam amunu, na oɗen qamutna daamnanu oɗ medattem. ⌊Na heppe, hambuppuak nai ahilag miag atiak daakkunu na oɗ medattem.⌋ O Kayak naib da na binan mettem.

³ Ag da taliliɗna daanna, ag dahilnu nau ninig ele doon, ag nai nau atteb. Ag diig laa iitta, ag da hamu niɗaglagnu banel uɗitteb.

⁴ Da ahilagnu, “Da lailad,” doyen ehanadmi, amge ag nai nauppa da yaaiɗtteb. Ag anam hetteb, amge da unuqittak ii uuttem!

⁵ Da ag ena hadattem, amge ag eɗun, da eheɗ heɗatteb. Da ahilagnu ool mauhtte, amge ag eɗun, dahilnu nau ninig ele dootteb.

⁶ ⌊Da nai imu kekeɗ dahil tonadkkunu Yawe amegppa ami.⌋ “Na nau hak danab otippe, nug kekeɗ dahil epeɗidkkunu oɗ medattem. Ao, na uuidppe, naippa yaaittak danab laa nug hettoɗiakppa mekkunu unuqidttem.

⁷ Haen danab nau amu hette hettoɗiakppa hibaitta dayebeb, na heppe, ag nug eheɗ heum anidkkulagnu oɗ medattem. Nuhig unuqittaknu, ‘Am hipunin laa aakku,’ dabmekkutnu unuqidttem.

⁸ Na uuidppe, nug bau haen elab daamanu oɗ medattem. Na heppe, laa nug ikki danab daakkunu uɗat nuhig awa daakkunu unuqidttem.

⁹ Na heppe, nug mauheb, bekkod ag mamelag iitta, wau nug qab meeb daaglagnu oɗ medattem.

¹⁰ Na heppe, nid naunau nuhikkud ag mauhnoak oinna, laa keekenu unuqadnana oiglagnu oɗ medattem. Na heppe, kekeɗ ag ahilkad lag heppeg nauhppeg, ag ag lamadppeg, ag umanab wana oinna daaglagnu unuqidttem.

¹¹ Na men doɗo lon hak danab uuadppeg, ag keeke oh nug aɗatte ele aɗidkkulagnu oɗ medattem. Na heppe, danab laa, ag aab diig iitta, ag nug aɗi keeke ele, ag amu oh yab aoglagnu unuqidttem.

¹² Na heppe, laa ag oo mauhaknab kobol nuhignu ii hemananu oɗ medattem. Na heppe, nug mauheb, laa ag nug bekkod dilagnu oo gai-iitta doya oo matta ehanittak kobol ii hemananu unuqidttem.

¹³ Da na heppe, nug buɗub ag mauhna malaglagnu oɗ medattem. Ag mauhppeg, ag dimulagppa menuak laippu laa doppeg, danab ah amu, ag oolagppa danab amu buɗub laippu laa bau ii daamanu unuqidttem.

¹⁴ O Yawe, na nug mamekkud aɗi dilag hipuninnu dabmena, na nug anignu hipunin ii uhuqna medakkutnu oɗ medattem.

¹⁵ O Yawe, na nau hak danab amu heppe, nug wanppa ii daamanu, na hanhan nug alakkud, anig ele dilag hipuninnu dabmekkutnu oɗ medattem.

¹⁶ Aɗinu na anam hekkutnu ool daatte? Amuam nug oo mauhaknab kobol nakok laa ii dim lamittom. Nug danab ah uug waappa daappig, daɗek danab ah, amu danab ah ag oo doyak okkainab dooppig ele, nug ahilag mauhak haen iittappa mauhkkulagnu he mauhppig.

¹⁷ Nug laa dilagnu, ag eheɗ laa awaknu anak waappa daaglagnu akkunu oo mauhom amunu, na nug eheɗ laa awaknu anak waappa daakkunu akkutnu oɗ medattem. Nug laa itattak ena medakkunu uuom amunu, na nug itittak ena ii medakkutnu unuqidttem.

¹⁸ Danab ah ag hanhan lamen tagatteb bia, nug danab ah hanhan eheɗ laa awaknu anak waappa daaglagnu attom. Danab laa ag le oug hanhan latteb, ag ee ahilag hanhan olip goɗenppa bappaidtteb amu, danab nau amu, nug laanu eheɗ laa awaknu anak waappa daakkunu maditte, mattiak nuhig amuam anambia dayom.

¹⁹ Na heppe, eheɗ laa awaknu anak waappa dayaknu nai kekeɗ dahil lamen bia tonakkunu oɗ medattem. Ao, matagiɗ hanhan tagittak daatte bia, eheɗ laa awaknu anak waappa dayaknu nai am, nuhigppa hanhan daakkunu unuqidttem.

²⁰ Danab ag nai nauppa yaaiɗtteb amu, Yawe Nug ag nob anam madakkunu ool daatte. Ao, laa ag dahilnu nai nau maditteb amu, Nug anam hekkunu ool daatte.

²¹ Amge, O Naɗi Yawe, danab ah ag na oninnu dabmak anuqak aoglagnu, na dahilnu ena hekkutnu oɗ medattem! Na oo mauhaknab kobol dim lamidttem amunu, na amu dabmenana ehaniɗppe, da qagaiettakppa ii daapanu unuqidttem.

²² Da am daɗek, keekenu tutu mak dayeye, da oolppa guittak naɗi ele doottem amunu, na anam hekkutnu oɗ medattem.

²³ Tueb aam noono, keeke itotog iitta me, danab nug keeke amunu itotog aamppa anttom, amu tueb ii daatte; da amubia daattem. Da am tap-lokus laa, danab laa nug nuhig lamenppanu maute ukkom bia daattem.

²⁴ Da ee ohnu kud huana mein daaiyi, gatel bodoetta dagteum. Ao, da beɗul hiɗa, ebehil teum.

²⁵ Danab ah ag dahilnu, ‘Keeke hamunab,’ dootteb. Haen ag da aniɗna amu, ag ikkilag matuɗnana, ⌊‘Nug aakku mauhkku hette,’ atteb⌋.

²⁶ O Yawe, dahil Kayak, na da ehaniɗkkutnu oɗ medattem! Na nahip oo mauhaknab kobol dabmenana ehaniɗppe, da padal ii mepanu unuqidttem.

²⁷ Na heppe, dahilad kekeɗ ag inam doyeg! Naib da ehaniɗttem. Ge, O Yawe, naib anam hettem.

²⁸ Ag da eheɗ laa awaknu anak waappa daakkulnu atteb, amge na da itiɗkkut. Ag deɗ laala da banel uɗiglag, amge ag uɗa nak aoglag. Anam amunu, da nahip maɗi nid, da gamal ahakku.

²⁹ Danab nug lamen tagatte, amubia uɗa nak nau guittak ele am dahilad kekeɗ tonatteb daaglag. Ao, danab nug ulahnu lamen mette, amubia dahilad kekeɗ ag uɗa nak aoglag.”

³⁰ Amge da, “Ena heme,” okkainab Yawe amegppa akkul. Ao, da Nug danab ah dilag qagmak naɗippa binag mekkul.

³¹ Da anam hekkulnu diig am, laa ag daɗek danab mauhkkunu aegeg, Yawe Nug daɗek danab laa heqoppa hibaitta dayaya, padal memananu ehanadtte.