Sam 108 - Nobonob Baibel

Kekeɗ ag danab laa eɗidmananu unuqittak laa

Imuam Dawitnu sam. Am ahi Laa.

¹ O Kayak, da ool ⌊na binan mekkulnu⌋ ɠagattag daatte. Ge, da ool anam haknu ɠagattag daatte; Da ahi laala, ag na binan metteb ele da meul ohppa edakkul.

² Da attem. “Harp, laia ele ⌊aa danab daaloplob, da ahilahnu; ‘Aa musik hekkulahnu⌋ aa ahai hibaitteɗ!’ ” awe alom. Ao, da buttuanab ahen, aam ii bak haenppa musik haknu keeke ahi laala hadappi ukkeb, aam bekku.

³ O Yawe, da danab ah oh noolagppa na amenppa, “Ena heme,” akkul. Yo, da wan imuppan wan anen anen ohppan danab ah oolagppa, nahip humittak ahi ettaladkkul.

⁴ Da amu hekkulnu diig am inam. Keeke laa elabnab habppa tak daakku dayeb amu, keeke amuam keeke okkainab, amge nahip oo mauhaknab kobol am keeke amu eɗidtte. Ao, keeke laa ikki ta, hab yaakku dayeb amu, keeke amuam keeke okkainab, amge oo metta ii uuak kobol nahip am amu eɗidtte.

⁵ O Kayak, na heppe, danab ah oh ag na ohnab eɗattak daattem anidkkulagnu oɗ medattem. Yo, danab ah aben ohppa ag nahip binag amahlak oppiaawak ele anidkkulagnu unuqidttem.

⁶ Ig, na ihinignu oot mauhtte ele amu, ig kekeɗ eppelagppa ii daamtanu, na nahip ɠagattag okkai amuppa ig ehanigppe, qagaiettakppa ii daamtanu oɗ medattem.

⁷ ⌊O danab ah⌋ Kayak Nug nuhig mettid lag amuppa dayaya, nug aum. “Da Sekem danab eɗatten, da melemel mein, Sekem wan oppatppi, maha maha neeb, ⌊da dahilad danab ah madakkul.⌋ Ao, da oolnu noak Sukot oppatppi, maha maha neeb, ⌊da dahilad danab ah madakkul.⌋

⁸ Gileat danab ah am dahilad, Manase danab ah, ag ele am dahilad. Epraim danab ah ag da ikkil guittak aomanu aen hat dahil daatteb, amu Juda danab ah ag am dahil king qakun, ⌊danab ah da am king daattem dooglagnu⌋ daatteb.

⁹ Moap danab ah, ag dahil maɗi nid maɗi ah ele daatteb, amu Edom danab ah ag da waalppa daaglag. Da Pilistia danab eɗatte, gamag ahakppa ekkul.” Kayak anam awa atte.

¹⁰ ⌊Kayak anam atte, Amge da Dawit, dahilnu amu⌋, aun nug da ehaniɗeb ⌊Edom appa⌋ aab okkai ɠagattag aɗ ele amu aokkul? Ao, aun nug heeb, da Edom eɗidkkul?

¹¹ O Kayak, naib na amu hekkutnu elele, amge na ig uuigme. Ig Israel ig ban daup laippuppa tappat banppa gottem amu, na ig ele gemu ii daattem.

¹² Danab ah dilag ehanittak am meu iitta. Na ehanigppe, ig kekeɗ eɗadkkunignu oɗ medattem.

¹³ O Kayak, na ig ehanigppe, ig keeke okkai okkai hekkunig. Ao, na ig ehanigppe amu, ig kekeɗ ihinkad tappaladta, oɗoɗadkkunig.