Sam 107 - Nobonob Baibel

Kayak Nug enaib hettenu binag mak

¹ Ag Yawe amegppa, “Ena heme,” aon aig! Aɗinu? Yawe Nug enaib dayaya, enaib ele hette. Laa amu, nuhig oo mauhaknab kobol hanhan alet daatte.

² Heppeg, danab ah laala ag Yawe Nug ag qagaiettakppanu eɗua uhuqak ha mattom amu, danab ah amu ag laa amelagppa anam appeg doyeg! Ao, laa Yawe Nug ag kekeɗ eppelagppa dayaknu qagaiettakppanu eɗua uhuqak ha mattom amu, ag amunu mattieg!

³ Nug danab ah wan laala ohppanu eɗua aɗalatta uɗiom amu, ag laa amelagppa anam appeg doyeg! Ao, Nug laa ag laih kaɗag uɗitteppanu, qaban uɗitteppanu, yawalti uɗitteppanu, yau uɗitteppanu ele aɗalatta qagmaattom amu, ag amunu mattieg!

⁴ Danab ah laala ag atu taɗak nau, ag appa yawaina oinna, ag aab okkai laa amuppa daaglagnu laa ii anidppig.

⁵ Ag enug aqe, le baalag diie, ag mauhkkulagnu heppig.

⁶ Ag anam uugppa daanna, ag, “O Yawe, na ig ehanigkkutnu oɗ medattem!” unuqitteg, Nug ag ehanatte, qagaiettakppa ii daappig.

⁷ Ag anam unuqitteg, Nug ib tutukku laappa anuqa ugakka omalatte, ag aab okkai laa, ag amuppa daaglagnu elele amu, ag amuppa teppig.

⁸ Heppeg, ag Yawe amegppa nuhig oo mauhaknab kobolnu, “Ena heme,” aig! Ao, ag Nug keeke ena ena oh danab nuhikkud dilag hettenu ele anam aig!

⁹ Aɗinu? Nug danab ah ag lenu baalag diitte, le matte, ag elele latteb. Ao, Nug danab ah enug aqatte amu ee matte, ag ee ena laeg, oolag aɗatte.

¹⁰ Danab ah laala ag aben gatatu naunab nau ele amuppa daappig. Ao, ag am maniguittakppa, sen ɠagattag aenppa hattak, ag amuppa hippalatteg daan, guittak ele dooppig.

¹¹ Ag Kayak waappa daaglagnu uun, ag nuhig nai tappaeg neum. Ag Kayak Attannab Laa Oh Eɗattak, ag nuhig ulum nainu ena iinab doon uuppig amunu, ag hippalakppa daappig.

¹² Ag amu hena, ag eheɗ heppig anidkkulagnu amu, Yawe Nug he, ag laa waappa daan, uɗat nau ɠagattag ele henan daappig. Ag uɗat ɠagattag heeg, ebehilag gai-iitta me, nena qeppig. Auntai laa ag ehanadkkunu laa ii dayom.

¹³ Ag anam uugppa daanna, ag, “O Yawe, na ig ehanigkkutnu oɗ medattem!” unuqitteg, Nug ag ehanatte, padal ii meppig.

¹⁴ Nug ag maniguittak gatatu naunab nau eleppanu diia, omalatte uɗippig. Nug sen ahilkad oh pakkualattom.

¹⁵ Heppeg, ag Yawe amegppa nuhig oo mauhaknab kobolnu, “Ena heme,” aig! Ao, ag Nug keeke ena ena oh danab nuhikkud dilag hettenu ele anam aig!

¹⁶ Aɗinu? Nug ahilag maniguittaknu aɗnu od brasppa heppig amu loppaɗe neum. Nug od manak qaknu keeke aenppa hak makkulatte neppig.

¹⁷ Danab ah laala ag Kayak dab-ii-menan ii dim lamidna, ag Yawe Nai aum amu tappaeg ne, ag Nug dimedappig Ag hipunin henan, ag uug aoppig.

¹⁸ Ag baalag eenu ii he, oolagppa uuaknab doon, mauhkkulagnuib daappig.

¹⁹ Ag anam uugppa daanna, ag, “O Yawe, na ig ehanigkkutnu oɗ medattem!” unuqitteg, Nug ag ehanatte, padal ii meppig.

²⁰ Ag unuqitteg, Nug a, ag ena daappig. Nug ag mauhak ib oɗeppanu eɗua diia doum.

²¹ Heppeg, ag Yawe amegppa nuhig oo mauhaknab kobolnu, “Ena heme,” aig! Ao, ag Nug keeke ena ena oh danab nuhikkud dilag hettenu ele anam aig!

²² Ag Yawe noobppa ena heme anaknu ofa hena, ag keeke ena ena Nug danab dilag hettenu ahi gamag ahak ele etteg!

²³ Laala ag uub okkaippa yu qaɗeppa goppig. Ag yu naɗippa gona, keeke daden mena, eɗun akkan uɗin dadennu meppig.

²⁴ Ag yu qaɗeppa oinna, ag Yawenu uɗat anidppig. Ge! Ag nuhig hak naɗi, ɠagattag yuppa hette amu, ag anidppig.

²⁵ Amu Yawe Nug a, ulah huana uɗia he, duban okkainab qeum.

²⁶ Duban naɗi anam he, ahilag uub attannab ta, eɗua honap noum. Duban anam qe, uub danab ag mauhkkulagnu henana, ag huananab baɗappig.

²⁷ Ahilag uub am ta nak huananab he, uubnu uɗat nid ag tutukku ii oippig. Ag danab ag le nau lawona, qiia ona, qiia doak tappan oitteb bia oippig. Ag ahilag dabmak eɗatte, ag aɗi hekkulagnu oolag ii maittom.

²⁸ Ag anam uugppa daanna, ag, “O Yawe, na ig ehanigkkutnu oɗ medattem!” unuqitteg, Nug ag ehanatte, qagaiettakppa ii daappig.

²⁹ Nug he, ulah, duban ele iitta meum. Yo, Nug he, duban bodoettom.

³⁰ Nug he, ulah duban ele iitta meum amunu, uubnu uɗat nid ag yu manin niiomnu gamag ahak okkai dooppig. Ag gamag ahak doyegeg, Yawe Nug ag diia ukka, yu oɗe ag oolag heum ele amuppa maattom.

³¹ Heppeg, ag Yawe amegppa nuhig oo mauhaknab kobolnu, “Ena heme,” aig! Ao, ag Nug keeke ena ena oh danab nuhikkud dilag hettenu ele anam aig!

³² Ag danab ah oh noolagppa Nug binag meig! Ao, ag Nug ikki danab noolagppa binag meig!

^33-34 Danab ah aben laalappa daappig ag nau heppig amunu, Yawe Nug ahilag le okkai he, eɗun atu taɗak beppig. Anam amu, ahilkad lenag eɗun wan qaɗaiettak beppig. Ge, Nug he, ahilag wan ittag ele amu eɗua, yu ba, nauhakib dayom.

³⁵ ⌊Amge Nug ele he,⌋ atu taɗak eɗue, appa le ameg kuɗum daappig. Nug he, wan qaɗaiettak eɗua, lenag kuɗum daan madmad goppig.

³⁶ Nug danab ah enug aqak ele appa daaglagnu diia ukka ehanattom. Ao, ag appa aab okkai, ag aguppa daaglagnu kalappig.

³⁷ Ge, ag dad ahilkad hattana, ag muɗi grep eppaladna, ag meulkad tuqappig.

³⁸ Nug ag itatta autanab awe, ag baelkadppa kuɗum ele daappig. Ahilkad makau ele abategeg, kuɗumnab daappig.

³⁹ ⌊Danab ah amu ag Yawe dim lamittak uun, nau heeg,⌋ ebqak ahilag honap neum. Yawe Nug he, laa ag uɗin eheɗ hattegeg, Nug he, ag uug naunab doyeg, kobol aɗi aɗi ahilagppa be, ag oo doyak okkai aoppig amunu, keeke amu oh ag onilag qeeg neum.

⁴⁰ Amu laa Nug king tiigppan danab ag dada danab daatteb dayeb, Nug he, ag uɗa nak naunab aotteb. Amuam Yawe Nug he, laa ag Nug dim lamittak uuppig ele ag gona, atu taɗak nauppa mauhnoak oippig.

⁴¹ Kayak anam heum, amge Nug daɗek danab ag uugppa daappig amu, Nug ag ehanatte, ag uugppa ii daappig, Nug ag baelkadppa he appatppig amunu, ag sipsip ameg naɗi bia daappig.

⁴² Am genab tutukku hak danab ag Yawe keeke amu he anadna, ag gamag ahak dootteb, amge nau hak danab ag oɗelag qamut-tteb.

⁴³ Amu danab doyak dabmak ena ele ag keeke amu oh Yawe hettenu dabmetteb. Ao, ag Yawenu oo mauhaknab kobolnu ele dabmettaglag!