Sam 106 - Nobonob Baibel

Yawe Nug nuhikkud danab ah dilagnu enanag hette

¹ Ag Yawe binag meig! Ao, ag Nug amegppa, “Ena heme,” aon aig! Aɗinu? Yawe Nug enaib dayaya, enaib ele hette. Laa amu, nuhig oo mauhaknab kobol hanhan alet daatte.

² Auntai laa nug Yawenu kobol danab hekkunu elele iitta, nug amunu mehuqkkunu elele? Auntai laa nuhignu humittak elelenab hekkunu elele?

³ Danab ag nai doya mala hettoɗia epeɗia elele mettak kobol dim lamidtteb ele, ag itittak ena aoppig daatteb. Ao, laa ag hanhan genab tutukku hak kobol ele dim lamitteb amu, ag itittak ena aoppig daatteb.

⁴ O Yawe, na nahipad danab ah dilagnu na ii helom bia me, na ehanadnana, dahilnu dabmekkutnu oɗ medattem. Na ag padal ii memananu ehanadnana, da ele ehaniɗppe padal ii mepanu unuqidttem.

⁵ Da amunu oɗ medattemnu diig laa am, laa na tituanadme ele, na ehanadppe, ag keeke ele elele daappeg, da ag oolagppa ele anam daakkulnu ool daatte. Diig laa am nahip danab ah ag gamag ahak dooppeg, da, ag ele oonig gamag ahakkunu ool hette. Amu diig laa am danab ah nahipadnab daatteb amu, ag na binan mebeppeg, da ag ele binan mekkunignu ool niitte.

⁶ O Yawe, ig mamenkad aɗi ag hipunin heppig; ig ele aakku hemut. Ao, ig eheɗ hemut! Ig hak nau hetat oimut!

⁷ Ig mamenkad aɗi ag Isip appa daanna, ag kobol danab hekkunu elele iitta na heme amu, ag amunu ii dabmeppig. Haen kuɗum na oo mauhaknab kobol doon dim lamidna ehanadme, amge ag na amu hemenu daulag atiom. Ag Le Kokoɗppa appa na waatppa daaglagnu uun, na oɗen tappaeg neum.

⁸ Ig alankad ag anam heppig, amge Yawe Nug ag padal memananu ehanadkkunu matu aum amunu, nug anam heum. Nug amu heumnu diig laa am, Nug Nug onignu dabmak anuqak awa, danab ah ag nuhignu nai eheɗ mattinna, “Yawe Nug keeke hekkunu aum, amge Nug ii heum,” amananu heum. Laa am, Nug ɠagattag nuhig attemu ele danab ah ippunadkkunu heum.

⁹ Nug he, ib man qaɗaiettak Le Kokoɗppa beum. Nug he, yu unuqagppa wan qaɗaiettak, atu taɗakppa qaɗaiettak daatte bia dayom; amu amuppa Israel danab ah omalattom.

¹⁰ Nug ag padal memananu ehanatte, kekeɗ eppelagppa ii daappig. Ao, Nug ag kekeɗ eppelagppa dayaknu qagaiettakppanu eɗua uhuqak heum.

¹¹ Israel ag le amu mataɗna malaeg, aakku le eɗua abenppa doa, ahilkad kekeɗ tonattom; laippu laa bau ii dayom.

¹² Yawe Nug anam he dimppa, nuhig danab ah ag Nug nuhig nai hekkunu anan qakkom, ag amunu oolagppa genab doona, ag humittak ahi edappig.

¹³ Amge ag pahanab Nug aɗi heum, ag amunu daulag atiom! Ag ulum nai mattaglagnu Nug ameg ii meppig!

¹⁴ Atu taɗakppa amu, ag teppu lanaknu baalag huanaknab ukkom. Ao, ag wan meu waknu nakokib elele, appa ag Kayak ma anttak medappig.

¹⁵ Ag anam ma anttak medappig amunu, Nug ag aɗinu oɗ meppig mattom, amge Nug ag oɗe nau laa, danab kuɗum aqe mauhtteb ele, Nug amu ele me neum.

¹⁶ Danab ah ag aab haen tutu dayaknu kalappigppa daappig amu, ag Mosesnu amelag qe oolag elele ii dayom. Ao, ag Aron, nug Yawenu mana mettak danab, Yawenu tituana mettak dayom amu, ag nuhignu ele anam dooppig.

¹⁷ Danab ah ag anam heeg, wan oɗe aahe, Datan ooppa noum. Ao, wan oɗe aaha, Abiram, laikkud nug dim lamidppig ele oh boumattom.

¹⁸ Anam amu, aa lailti laa aab ewatta hatte nauhppig. Ao, aab dittiak am nau hak danab amu ewattom.

¹⁹ Israel danab ah ag Horep qaukoppa makau gaiɗ dottog heppig. Ag golppa dottog heppig amu, nuhignu dup nona binag meppig.

²⁰ Ag Kayak, Nug binag amahlak oppiaawak ele, ag Nug noobppa dup nona binag mekkulagnu uuna, ag makau dawai gikkiɗah latte ele, ag amu dottog laa heppig amu, ag dottog amu noobppa dup nona binag meppig!

²¹ Ag Kayak, Nug ehanatte, ag padal ii meppig ele, ag nuhignu daulag atiom. Ao, ⌊ag ehanadkkunu⌋ Nug keeke okkai okkai Isip appa heum, amge ag nuhignu daulag atiom.

²² Nug kobol danab hekkunu elele iitta Ham wanppa heum amu, ag daulag atiom. Ao, Nug Le Kokoɗ appa keeke laala, danab ah anttegeg, ag ebehilag oh bodoetta le mette amu, ag Nug amu hattomnu daulag atiom.

²³ Ag Kayak, nuhig hak amu ele daulag atiom amunu, Nug ag hatteb nauhkkulagnu aum. Nug anam aum, amge Yawenu oppoɗi bak aha heeb, danab ag nauhmananu, Moses, Yawe tituanom amu, nug Yawe, danab ah ele gamalagppa hibaitta dayom. Nug anam dayeye, Yawe Nug ag ii hatte nauhppig.

²⁴ Israel danab ah ag Kanan noaknu uuppig. Ag Yawe ag ehanadkkunu nai anan qakkom ele, ag nai amu oolagppa genab ii dooppig.

²⁵ Ag wan amuppa nokkulagnu elele, amge ag peh ahilkadppa daan, naittuɗ meppig. Ag pehppa daanna, naittuɗ menana, Yawe oɗe doon hekkulagnu uuppig.

²⁶ Ag anam heeg, Yawe Nug eppeg huma, nuhig nai hekkunu ɠagattag qetta ana, Nug heeb, ag atu taɗakppa mauhkkulagnu,

²⁷ Nug heeb, ag wanppan wan laalappa mauhkkulagnu, Nug heeb, ahilkad kekeɗ ag heppeg, ag buɗulkad wan laalappa tamtam gona daaglagnu aum.

²⁸ Aakku ig alankad ag Peor appa Bal toppa dup nona binag meppig. Ao, ag doɗ manan kayak hambuppuak, kayak amu ag bau iitta, ag teppu amu ag madappig amu, ig alankad ag teppu amu lappig.

²⁹ Ag hak nau heeg, Yawe Nug ahilagnu oppoɗi be, oɗe nau danab kuɗum aqe mauhtteb ele, ahilagppa naɗi meum.

³⁰ Amge Pinias nug aha, nug danab ah ele laa, aa hipunin miagib hepiɗ amu, nug aqate mauheh, oɗe danab kuɗum aqe mauhtteb ele amu laa ii aqom.

³¹ Pinias nug anam he, Yawe Nug nuhig neekkakppa Pinias nug am genab tutukku hak danab anttom; amu anttak amuam hanhan anamib daakku.

³² Meriba appa ele, Israel danab ah ag heeg, Yawe oo nauhom, diig amunu Moses nug Yawe oɗe tappe ne, Yawe Nug bu mettom.

³³ Aɗinu? Meriba appa amu, danab ah ag Kayak oɗe tappaeg ne, Moses nug oo nauhe, nug nukka doyomnu nai, Yawe Nug akkunu aum iitta, nug nuhig nai amu ag amelagppa aum. ⌊Nug amu heum, amu diig amunu Kayak bu mettom.⌋

³⁴ Yawe Nug Israel ag danab ag aabaab Kanan wanppa daappig hadappeg nauhkkulagnu, haknunab nai aum, amge ag anam ii heppig.

³⁵ Ag anam ii heppig. Iitta! Ag danab ah Kayak ii dim lamidtteb ele, ag amu dilag ele ewau matulak awak hena, ag digmena, danab ah amu dilag kobol nau amu heppig.

³⁶ Ag dottolkad eppelagppa hadappig noolagppa dup nona binalag menana, ag doɗ pelemppa teum daatte bia nauhna autna aoppig.

³⁷ Ag bekkalkad, aɗelkad ele aqan, manan ouɗi nau madappig.

³⁸ Ag danab ah eheɗ laa ii heppig ele aqappig. Amuam ag bekkalkad, aɗelkad ele. Ag amu hena diin, Kanannu dottolkad hattak amu, ag manan, kayak hambuppuak amu madappig. Ag amu hekkulagnu aqak heegeg, Kayaknu neekkakppa wan am dubuttid naunab ele dayom. Nug ooppa uuaknab doyom.

³⁹ Ahilag hak nau amuppa, ag Kayaknu neekkakppa, ag oolagppa dubuttid tak ele daappig. Ag dottog hattak dilagnu dup nona binalag meppig, amuppa ag Yawe amegppa laa nug gappai awom bia heppig.

⁴⁰ Ag anam heppig, diig amunu Yawe Nug danab ah nuhikkudnu oo huana nauhom. Ag nuhikkudnab, amge ag hipunin anam aakku heeg, Nug ahilagnu ooppa uuaknab doyom.

⁴¹ Nug wanppan wan laalappan danab ah ag Kayak ii dim lamidtteb ele ehanatte, ag Israel eɗatteg, Israel ag aabaab danab Kayak ii dim lamidtteb ele eppelagppa daappig. Ao, Nug kekeɗ ahilkad ehanatte, ag gumadppig.

⁴² Kekeɗ ahilkad ag gumadnana, ag aɗi hekkulagnu appig, ag amuib heppig. Ao, kekeɗ ahilkad ag ɠagattagnab amunu, ag heeg, ag waalagppa daaeg, eheɗ hadappig.

⁴³ Yawe Nug ag haen kuɗum ehanatte, ag kekeɗ eppelagppa ii daappig, amge ag tuɗid ele nuhig nai tappaeg neum. Ag hipunin heegeg, Kayak he, ag nauhna daappig.

⁴⁴ Ag nauhna daappig, amge ag uug nau doon daanna, haen amuppa ag Nug unuqitteg, haen amuppa ele, Yawe Nug ahilagnu dabmeum.

⁴⁵ Nug ahilagnu dabmak anuqak doyaya, Nug he, ag Nug ele nug tituana nai qakkak heppig, Nug amu dabmetta ehanattom. Nug ag dabmadatta, Nug nuhig oo mauhaknab kobol dim lamittatta, ag tuɗid, uugppa daamnanu uua ehanattom.

⁴⁶ Nug he, laa ag ag aɗualatteg, ag eppelagppa daappig amu, ag ahilagnu oolag gai-iitta doon, oolag mattan, ehanadppig.

⁴⁷ O Yawe, ihinig Kayak, ig na, na onin am oppiaawak ele, ig na amenppa, “Ena heme,” akkunignu, ge, ig gamag ahak okkai doot, na onin humagnignu, na ehanigppe, ig padal mematanu unuqidttem. Ao, na ehanigppe, ig qagaiettakppa ii daapput, wanppan wan laalappanu qagmeigppe, ig ihinig wanppa daagnignu oɗ medattem.

⁴⁸ Ag Yawe, Nug ig Israel, ihinig Kayak, Nug gemu daatte, butti aɗi ele hanhan anam daakku amu, ag Nug binag meig! Danab ah oh ag, “Genab, anam dayaɗ!” aig! Ag Yawe binag meig!