Sam 105 - Nobonob Baibel

Yawe, amu nuhikkud danab ah ele dilag nai

¹ ⌊O Israel danab ah,⌋ ag Yawe amegppa, “Ena heme,” anana, ag Nug unuqitteg! Ao, ag appeg, wan atu ohppan danab ah ag Nug aɗi keeke heumnu doyeg!

² Ag ahi ettanna, ag Yawe binag meig! Ge, ag onig humaknu ahi ettanna, ag Nug binag meig! Ao, ag nuhig hak ena ena ohnu, ag danab ah laa oh ag amu dooglagnu ag amelagppa aig!

³ Nug onig am oppiaawak; ag Nug onignu oolag okkainab gamalag ahaɗ! Ao, laa ag Yawe anidna dim lamidkkulagnu Nug maditteb ele, ag gamalag ahaɗ!

⁴ Ag Yawenu, nuhig ɠagattag okkai elenu oolagppa genab doyeg! Ao, ag hanhan Nug anidna dim lamidkkulagnu Nug mattieg!

^5-6 O Abraham buɗub, ag Yawenu maɗi nid daatteb. Ao, O Jakop bekkod, Yawe ag nuhikkud daaglagnu tituanattom. Ag Israel aakku, ag Yawe Nug uɗat ɠagattag danab hekkun elele iitta digdig heum amu, ag amu dabmetteg! Ao, uɗat digdig danab hekkun elele iitta Nug heum; nai doya mala hettoɗia epeɗia elele mettak kobol Nug dim lamittom ele amu, ag dabmetteg!

⁷ Nug am Yawe, ihinig Kayak. Nuhig nai doya mala hettoɗia epeɗia elele mettak kobol am wan oh tualom daatte.

⁸ Yawe Nug nuhig nug tituana nai qakkak hanhan dabmette. Nug daug ii atitte. Ao, Yawe Nug ana qakkak nai nuhig hanhan daakkunu aum amu, Nug nai amu dabmette.

⁹ Amuam nug tituana nai qakkak Nug Abraham ele hepiɗ. Ao, amuam aɗi keeke Nug hekkunu Aisak amegppa nuhig nai ɠagattag qetta aum aakku.

¹⁰ Nug nai amu Aisak amegppa ɠagattag qetta ana, dimppa Nug nai amu awa, ɗo naippa ma mattia, Jakop amegppa ele nai amuib baula aum. Ao, nug tituana nai qakkak amu Nug awe, Israel ele nug tituanya nai qagapiɗ. Amu nug tituana nai qakkak amuam hanhan daakkunu babaittom.

¹¹ Nug Jakop amegppa aum. “Da Kanan wan na medakkul. Ao, da na medappi, wan amuam na aut aakku daakku,” awa aum.

¹² Yawe Nug nai imu haen Abraham buɗub ag tutuib daaegeg aum. Ao, ag aab diig danab iitta Kanan wanppa, danab ameg nakokib daappig.

¹³ Ag qati qati, mauhnoak wan anen anenppa oippig. Ge, ag wanppan ɗo maɗoɗ digdigppa anam oippig.

¹⁴ Ag anam heppig, amge Kayak Nug ⌊danab okkai⌋ laa ag eheɗ hadakkunu ib oo neum. Ao, ag memetalkad amu, ag ena daaglagnu, Kayak Nug king laala daulag batom.

¹⁵ Nug okkai danab amelagppa aum. “Ag dahilad, da goɗen gokkaɗakppa tituanadmi amu, ag amu dilagppa eheɗ laa aib heppig. Ao, ag dahil propet guittak aib madappig,” awa aum.

¹⁶ Nug enug haen naɗi Kanan wanppa meum. Ao, Nug he, danab appa ag ee lanaknu tutumak daappig.

¹⁷ Amge amu ii nak haenppa Nug he, laa nug Isip anuqa ukkom. Amuam Josep. Nug awakkud ag heeg, laa nug begbeg maɗi nid daakkunu daden mena aoppig. Danab ag nug daden mena aoppig ele ag aon Isip goppig.

¹⁸ Isip appa ag nug maniguittakppa meppig. Ao, ag nug baeg senppa qakkan, baeg heeg guittom. Ge, ag qakkaknu keeke aenppa hak nug duugppa meppig.

¹⁹ Nug anam aakku dayeye ukke, keeke nug amunu mattiom ele am meu oum. Ao, nug anam dayeye ukke, Yawe keeke aɗi bekkunu ippunitta aum amu, keeke amu aakku genab be, king nug doyom, nug am danab genab.

²⁰ Anam be, Paro nug aakku uhuqe, hamu dayom. Ao, wan amunu gumak danab, nug maniguittakppanu uhuqom.

^21-22 Josep nug Paro buɗub ippunittak madakkunu, nug kingnu ikki danab ele sul madakkunu amu, Paro nug Isip gumakkunu ehah oh Josep eppegppa meum. Ao, king nug wan amunu gumak uɗat oh Josep mette, nug gumom.

²³ Amu dimppa Josep mameg Israel nug Isip ukkom. Ao, Jakop nug Isip, ⌊Isip onig laa am Ham,⌋ nug appa laihnu uɗiak danab dayom.

²⁴ Yawe he, Israel danab ah kuɗum appatppig. Nug he, ahilag ebqak am ahilkad kekeɗ eɗadna, ɠagattag daappig.

²⁵ Isipnu amu, Yawe Nug ag uuatte, ag Israel dilagnu nau ninig ele doon, kekeɗ madappig. Nug uuatte, ag nuhikkud maɗi nid eheɗ hattaglagnu maittak aoppig.

²⁶ Nug nuhig maɗi nid Moses me, Paro toppa teum. Ao, Nug Aron, Nug nug tituanom amu, Nug nug ele me teum.

²⁷ Yawe aa ehanate, Moses Aron ele aa Kayak dabmettaknu kobol danab haknu elele iitta, Isip oolagppa hepiɗ. Ao, aa Isip appa, ⌊Isip onig laa am Ham amu,⌋ aa appa uɗat ɠagattagnab ele hepiɗ.

²⁸ Moses, Aron ele aa Yawe oɗe ii tappaeh ne, Nug he, Isip appa gatatu naɗi neum.

²⁹ Nug wan amunu le he, eɗua tiig be, kakai ag mauhppig.

³⁰ ⌊Nug he,⌋ og ag wanppa ambeeg, ag danab okkai laulkadppa niiak abenppa ele tena daappig.

³¹ Yawe Nug a, qid ameg naɗi ag Isip uɗin daappig. Ao, Nug he, peipe Isip oh tonan daappig.

³² Gu nakbia, Nug ais doɗo me neum. Amemɗi wan ohppa amemɗiom.

³³ Yawe he, ais doɗo hab waappanu na he, muɗi grep, amu ad fig ele nauhppig. Nug he, ais doɗo amu Isip wanppan ad oɗoɗadpiɗ.

³⁴ Nug a, tap-lokus kuɗumnab uɗippig. Ao, tap ag kuɗumnab uɗippig; auntai laa ebaqakkunu elele iitta.

³⁵ Ag ee bau ohnab wanppan laeg iitta meum. Ao, ag wanppa keh beppig, ag amu oh heeg nauhppig.

³⁶ Nug anam ha male, Yawe Nug nid ⌊danab⌋ tatamnu Isip dilag oh aqom. Nug baelkadppa anen anenppa nid danab tatamnu, nid amu nug anig mameg nuhigppa nid danab menuadkkulahnu digmepiɗ ele amu, Nug nid ⌊danab⌋ amu oh aqom.

³⁷ Yawe Nug nuhig danab ah enaib Isipnu diie ahan, ag silwa, gol kuɗum akkan ele gonana, Israel dilag huu okkai oh oolagppa auntai laa eheɗ laa ii oiyom.

³⁸ Isip danab ah ag Israel danab ah dilagnu baɗak okkai dooppig amunu, ag ukkaeg, Isip ag enaib dooppig.

³⁹ Yawe Nug amunppa ehanatta he, lombig ikkilagppan blanget bia tonatte goppig. Ao, tuqanppa amu Nug he, aab dittiak naɗi gatatuppa amahlom.

⁴⁰ Ag teppunu oɗ meeg, Nug ai onig kwel kuɗumnab maatte uɗippig. Nug habnu maana habppanu me ne, ag laeg, oolag aɗom.

⁴¹ Nug he, le huana menppan neum. Le amu na, atu taɗakppa le okkai laa bia ukkom.

⁴² Nug amu heumnu diig am, Nug nuhig maɗi nid Abraham amegppa keeke laa hekkunu nai anan qakkom, nai amuam qa oppiaawak ele, Nug amu dabmaama, Nug amu heum.

⁴³ Nug amu dabma, Nug nuhig danab ah Isipnu diia laih ukke, ag gamalag huana ahom. Ao, Nug nuhikkud tituanattom ele amu, Nug Isipnu diia laih ukke, ag gamalag huana ahe eppig.

⁴⁴ Nug nuhikkud danab ah, wanppan wan laala danab Nug ii dim lamidppig ele, Nug amu dilag wan amu mattom. Ao, Nug wan amu matte, ag laa ee eppaladppig amu, ag meu amu tuqappig.

⁴⁵ Yawe Nug keeke amu oh heumnu diig am, Israel danab ah ag anidna, ag nuhig oo yaak nai ɗo bia dim lamidna, nuhig ɗo ele dim lamidkkulagnu Nug heum. Ag Yawe binag meig!