Sam 104 - Nobonob Baibel

Yawe Nug aɗi keeke hattom ele atognoadtte

¹ Da Yawe onig humakkul. O Yawe, dahil Kayak, na onin ɠagattag ele am okkainab. Na dagom onin ɠagattag okkai naɗi ele daattem.

² Yawe Nug danab lamen tagatte bia, Nug amahlak tagekke daatte. Nug danab sel lag taiedatte bia, Nug hab me daatte.

³ Nug bud oh eɗattak appag heum daatte. Ao, Nug bud he, nuhig oiyaknu karis daatte. Ge, Nug ulah eɗittak pahanab gotte.

⁴ Nug he, ulah am nuhig nai awa ukkak danab daatteb. Ao, Nug he, amemɗi am nuhikkud maɗi nid daatteb.

⁵ Nug wan nuhig dayaknu abenppa meum amunu, wan laih wakkunu elele iitta.

⁶ Digmakppa le, wan oh tona mala dayom. Ao, le nug qauko oh tona dayom.

⁷ Amge, O Yawe, na e, le laih ukkom. Ao, na hakkaɗ bia qalan, baat okkaippa nai mattie, le laippun laih ukkom.

⁸ Le qaukoppa nena, wan oolnu noakppa gonan daappig. Ao, le nug aben na ameppa qagmak daakkunu noum.

⁹ Anam daye, na yu daakkunu tom makkulme. Le baula wan ii tonama.

¹⁰ Yawe Nug he, le qeppuɗin bena, oolnu noakppa notteb. Ao, lenag qauko gamag gamag, bai heqoppa madmad gotteb.

¹¹ Lenag amu doɗ oh dilag le lanaknu daatteb. Ao, donki dakkuɗ ag laeg, ag le baalag diitte amu, le baag diiak amu, am iitta mette.

¹² Ai ag teɗualag lenag guguittak hattana, ad eppelkadppa daanna, ahi edatteb.

¹³ Yawe Nug gu he ne, qaukoppa leppu daatte. Nug anam heewo, wanppa keeke beegeg, danab, doɗ ele aotteb.

¹⁴ Yawe Nug makau dilag gikkiɗah he bette. Nug danab ag aon lakkulagnu ee ele he bette. Nug ehanatte, ag ee eppaeg, ee digdig danab ah ag lakkulagnu betteb.

¹⁵ Ee laa am muɗi grep meunu leppu, wain; wain amu he, danab nug gamag ahak dootte. Laa am olip ad meunu goɗen; danab ag aon beɗulag laaitteg ehanadtte. Laa am ee aeg bret haknu; ag ee aeg amu aon, bret hena lawona, ag ɠagattag aotteb.

¹⁶ Yawe Nug ad nuhikkud le elelenab madatte. Ao, Lebanon appa ad sida Nug eppalattom amu, Nug le elele madatte.

¹⁷ Ai ag appa teɗualag hetteb. Ai stok amu, ag ag laulkad ad pain attan hetteb.

¹⁸ Meeme dakkuɗ ag gikkiɗah qauko attan bette ele, ag amu latteb. Doɗ onig mennu badsa, ag men gukka waappa, ag appa ena daatteb.

¹⁹ O Yawe, na maɗ anen anen ooppa kalam anen anen doognignu, na kalam hena, hab attan meme daatte. Ao, na aam ele hee, aam hanhan notte haenppa aakku notte; am danab nug niiak haen aakku uɗiom daatte dootte, amubia notte.

²⁰ Na he, gatatu ne, tuqan aakku daatte. Tuqanppa dubuppan doɗ oh ag oitteb.

²¹ Laion bau ag ee aoglagnu oinna, ag doɗ laa qekkulagnu gukkuidna wanana, ag gaatteb. Ao, ag Kayak ehanatteb, ahilkad ee aoglagnu oitteb.

²² Haen aam bette amu, ag qinonob eɗun lokkumtteb. Ao, ag abenlagppa wana niitteb.

²³ Ag abenlagppa wana daaegeg amu, danab ah ag uɗatppa gotteb. Ag uɗat heegeg ukka, tueb ma, uudokkunu hette.

²⁴ O Yawe, na keeke digdig kuɗum hattame! Na nakka nahip doyak dabmak ena okkai amu uɗat mettan heme! Na keeke amu hattana hee, wan atu ohppa doɗ, amu keeke laa oh ele ambak daatteb.

²⁵ Uppa yu daatte, am naɗinab. Yu am naɗinab amu, yuppanu doɗ kuɗumnab, ebaqaknu iitta ag yuppa daatteb; laala ag okkai okkai, laala ag naunau.

²⁶ Uub okkai ag amuppa oitteb. Amu na doɗ okkainab laa, nug onig lewiatan, nug yuppa qiɗ haaha oikkunu heme amu, nug ele appa oitte.

²⁷ Haen doɗ amu oh ag enug aqeb, eenu mattina amu, ag na eppenppanu aakkuib ee aon lakkulagnu elele.

²⁸ Na ee mattai, ag latteb. Yo, na ag, na eppenppanu ee ena mattai laeg, ag oolag diditte.

²⁹ Haen na ii ehanadkkutnu dabmena, dimattai, ag eheɗ nau baɗatteb. Yo, na ag ouɗi ii mattai, ag mauhtteb. Ag mauhna, ag eɗun gappud metteb.

³⁰ Amge haen na nahip ouɗi ag mattae, ag hik aon bau daanna, ag ahan oitteb; ib amuppa na hee, bauklel keeke ag wanppa bau daanna oitteb.

³¹ Yawe Nug binag amahlak oppiaawak ele, amu binag amahlak oppiaawak ele amuam hanhan daakkunu ool daatte. Ao, Yawe Nug aɗi aɗi hattom amu, Nug amunu gamag ahak dookkunu ool hette.

³² Yawe Nug wan neekkitte, wan uɗaltte. Yo, Nug eppeg bahia, qauko lauɗatte, appanu kahug attan tette.

³³ ⌊Yawe Nug anam daatte amunu,⌋ da bau daattem, haen imuppa da nuhignu ahi edakkul. Yo, haen oh da bau wan imuppa dayeye, da dahil Kayak, da nuhignu ahi edakkul.

³⁴ Haen da Yawenu ool gamag ahehe, da keeke laalanu dabmak unuqag awewe daattem amu, Nug dahil dabmak amunu ena, elele dookkunu ool daatte.

³⁵ Hipunin danab ah oh, wanppa iitta mena malaglagnu ool hette! Ao, nau hak danab ah ag qettoɗna, iittanab mekkulagnu ool daatte! Dahilnu amu, da Yawe binag humakkul. Ag Yawe binag meig!