Sam 103 - Nobonob Baibel

Kayaknu oo mauhak

Imuam Dawitnu sam.

¹ Da Yawe onig humakkul. Ao, da ool unuqag, meul oh ele, da amuppa Yawe onig oppiaawak ele humakkul.

² Da Yawe onig humeme, da Nug aɗi ena dahilppa heum, da amunu ii daul atima.

³ Nug dahil hipunin oh uhuqa meɗa, dahil oɗe ele qe iitta mette.

⁴ Yawe Nug da padal mak abennu qagaiettakppanu eɗua uhuqak ha meɗatte. Nug oo mauhaknab kobol, oo gai-iitta doya oo metta ehanittak kobol dahilnu ele dim lamidtte.

⁵ Nug da keeke ena haen oh meɗatte. Nug anam he, ai igel eɗua ɠagattag aotte, amubia da nid bau bia, ɠagattag ele eɗuen daattem.

⁶ Yawe Nug danab ah ag ɠagattag iitta oh, danab laa ag eheɗ hadatteb ele amu, Nug ahilagnu uɗat genab tutukku ha, nai doya mala hettoɗia epeɗia elele mettak kobolppa ehanadtte, amu amuppa ag ena daatteb.

⁷ Nug anukka nug ippunu Moses amegppa aum. Nug he, nuhig uɗat, nug nuhig ɠagattagppa heum amu, Israel danab ah ag amu anidppig.

⁸ Yawe Nug ihinignu oo bodoetta le mak kobol, oo bodoette enanag maɗoɗ ele hak kobol ele dim lamidtte. Nug oo paha ii nauhtte, amu nuhig oo mauhaknab kobol am amba, leta nette.

⁹ Nug nai elele ha, malatte; tuɗid ii hette. Nuhig oo nauhak amu haen elab ii daatte.

¹⁰ Haen ig hipunin hemut, hipunin amunu nob nau aakku daatte, amge Nug hipunin amunu nob, Nug amunab ii mekkom. Ge! Haen ig hipunin hemut, hipunin amunu nob nau aakku daatte, amge Nug hipunin amunu nob, Nug amunab, ihinig nob eɗua mettak bia ii mekkom.

¹¹ Aɗinu? Nug danab ag nuhignu ebehilag oh bodoetta le mette ele, Nug amu dilagnu oo mauhaknab dootte. Oo mauhaknab kobol nuhig am okkai; am lomppanu wanppa noak, okkainab amubia daatte.

¹² Laih aam bedeppanu, amu laih aam nodeppanu ukkak am umanab daatte, amubia Kayak Nug hipunin ihinig uhuqa mekke, hipunin ihinigppanu ukkanna, umanab daatteb.

¹³ Nug am nid mamelag nug nid naunau dilag oo gai-iitta doya oo matta ehanadtte, amubia Yawe Nug danab ah ag nuhignu ebehilag oh bodoetta le mette ele, Nug amu dilagnu oo gai-iitta doya oo matta ehanadtte.

¹⁴ Aɗinu? Nug ig bodoettak ihinig attemu amu dootte. Ao, laa am Nug dootte, ig am gappud aakkuib.

¹⁵ Ihinig deɗ wanppanu amu, amuam gikkiɗah bia; bala haɗag mappata mauhtte, amubia ig mauhttem.

¹⁶ Ulah nug bala iwale, iitta metteb; aben amuppa bala appa ii daappig bia daatte. ⌊Ig ele amubia daattem.⌋

¹⁷ Amge Yawe Nug danab ah ag nuhignu ebehilag oh bodoetta le mette ele dilagnu oo mauhaknab tuqa ii awawa, hanhan anamib haaha daatte. Ao, Nug ahilagnu anam oo mauhe, Nug ag alalkad dilagnu, Nug genab tutukku hak kobolnu dabmaama, dim lamidtte.

¹⁸ Nug laa ag nuhig tituanak nai doon dim lamidtteb, ag nuhig oo yaak nai ɗo bia ele dim lamidtteb amu, Nug ahilagnu anamib hette!

¹⁹ Yawe Nug he, nuhig sia king am hab aabppa daatte. Nug appa dayaya, Nug keeke oh gumadtte.

²⁰ Engel ag, ag Yawe humitteg! Ao, ag engel aun aɗi ag ɠagattag ele, ag Nug aɗi keeke hekkulagnu atte dooglagnu daulag human daan hetteb ele amu, ag Nug binag meig!

²¹ Ag hab daup nuhikkud oh, ag Yawe binag meig! Ao, laa oh ag nuhig maɗi nid daan, nuhig dabmak awakppa Nug ag aɗi hekkulagnu atte amu, ag Nug binag meig!

²² Keeke oh Nug ag hattom ele, ag Yawe binag meig! Ag aben ohppa anam heig! Dahilnu amu, da ele Yawe binag humakkul.