Sam 102 - Nobonob Baibel

Danab laa nug uug doyaya, Yawe unuqittom

Laa uug huanak tone, gai-iitta meum amunu, nug Yawe noobppa uhuqkkunu unuqittak.

¹ O Yawe, na dahil unuqittak dookkutnu oɗ medattem! Da nahipnu ebippi dookkutnu unuqidttem!

² Yo, da uug nauppa daattem haenppa amu, na da dimeɗamnanu oɗ medattem. Ao, haen da nahipnu eppi doon amu, na paha oɗelppa aokkutnu unuqidttem.

³ Aɗinu? Kahug pahanab qatia gotte bia, haen elab iitta, dahil bau dayak qettoɗkku. Da beɗul am gakkaɗaknab, aab ewa qaɗab gakkaɗtte bia daatte.

⁴ Dahil uttu taub am oɗe ele, gikkiɗah le iittanu qaɗaiedatte bia daatte amunu, da ee laa lakkulnu enug ii iwe ii lattem.

⁵ Da uug naunab doyeye mahittem, diig amunu da ebehil te daattem.

⁶ Da am atu taɗakppan hipunai, nug nukka piɗe daatte, da amubia daattem. Ao, da am hipunai laa nukkanab aab okkai laa heeg nauhomppa daatte bia daattem.

⁷ Da niikkulnu elele iitta. Da am lag koɗokkoppa ai laa nukkanab daatte bia daattem.

⁸ Dahil kekeɗ ag deɗ oh, amun, tuqan ele aon aon iutteb. Laa ag da aon aon iutteb ele, ag laa eheɗ laa awaknu anak waappa daaglagnu anana, ag da onil aon, da daattembia daaglagnu nai amuppa metteb.

⁹ Dahilad kekeɗ ag amu hettebnu diig am ⌊da naunab daattem⌋. Da uhuɗ ee dahil bia lattem. Da amel leb naana, dahil le ougppa no lattem.

¹⁰ Aɗinu da anam dayeye hettem? Na dahilnu oppoɗin huana beum. Na da awiɗna mawiɗe, dimittim gomi.

¹¹ Da bau dayak dahil am tueb itotog paha iitta mette bia hette. Da gikkiɗah qaɗaiedatte bia hettem.

¹² Amge na, O Yawe, na hanhan king daattem. Na binan, onin ele hanhan daakkuib.

¹³ Na geha ahan, Sion danab ah dilagnu oot bodoetta le meeb ehanadkkut. Na amu hekkutnu diig am, gemu aakku na haen amu mena bappaidme daatte. Ao, na ehanadkkutnu gemu aakku anam hekkutnu nai ana tituanme.

¹⁴ Amu nahip maɗi nid ag Jerusalemnu men aɗ, men lag ele ohnu mennu oolag mauhtte. Ao, ag Jerusalemnu, am keeke okkai dabmetteb, amge ag ele nuhig ibppan gappudnu ele oolag doye dabmetteb.

¹⁵ Danab ah wanppan wan anen anen ohppanu amu, ag Yawenu ebehilag oh bodoetta le mekku. Ao, wanppan king oh ag binag amahlak oppiaawak ele nuhig anidna, ag ebehilag oh bodoetta le mekku.

¹⁶ Aɗinu? Yawe Nug Sion baula buukku. Nug nuhig binag amahlak oppiaawak ele uɗikku.

¹⁷ Nug laa ag keeke iittanab iitta ele amu, Nug ahilag unuqittak dookku. Ao, Nug ahilag unuqittak ii dimettama. ⌊Nug ag ehanadkku.⌋

¹⁸ ⌊Nug ag ehanadkku amu,⌋ heppeg, gemun danab laa ag danab ah dimppa dokkulag, ag ehanittak amunu ebqekkulagnu, ag amu yeeg! Ao, danab ah dimppa menuadkkulag amu, ag amu ebqena, ag Yawe binag mekkulagnu yeeg!

^19-20 Aɗinu? Yawe Nug danab ah ag maniguittakppa daan aeqagatteb, Nug amu dilag aeqakkak dookkunu, Nug laa ag mauhkkulagnu daatteb uhuqadkkunu, Nug hab attan daatte abenppa dayaya, neekkeb nekku. Yo, Nug hab attan dayaya, wan anidkku. ⌊Nug amu ha, Nug ehanadkku.⌋

²¹ Yawe Nug anam hekku amunu, Sion appa danab ah ag Nug onig mehuqkkulag. Ao, Jerusalem appa ag Nug binag mekkulag.

²² Danab ah kuɗum ag uɗin, ao, ɗo maɗoɗ ohppan danab ah ag uɗin tamanin, ag Yawe noobppa dup nona binag mebeppeg, haen amuppa ag anam hekkulag.

²³ ⌊Da dabmemi,⌋ Yawe Nug ɠagattag dahil, bau dayak dahil imuagppa aɗila awom. Nug he, dahil bau dayak tutuib meum.

²⁴ Anam amu, da Yawe unuqitte ami. “O dahil Kayak, na hanhan bauklel daattem, na oot meɗan, da danabnab daappi, dahil bauklel ii aomnanu oɗ medattem.

²⁵ Keeke oh digmak haenppa, na wan heme. Ao, na eppenppa hab ele heme.

²⁶ Na hatame, amge aa iitta mekkulah. Ao, aa am iitta mekkulah, amge na amu hanhan daakkutib. Ge, aa geha lamen alag mette bia, alag meya, iitta mekkulah. Na geha danab nug lamen baolitte, amubia na hab wan ele baoliatppe, laa daaglah. Gemu daattep amu, aa iitta mekkulah.

²⁷ Amge O Yawe, na amu, na ii baolittem. Ele amu, nahip dayak am ii iitta mette.

²⁸ Nahipad maɗi nid bekkalkad aɗelkad ele ag geha na noomppa ɠagattag daaglag. Ao, ag buɗulkad amu, ag geha na noomppa hanhan daaglag,” awe ami.