Sam 101 - Nobonob Baibel

King nug nuhig nai ɠagattag qetta aum

Imuam Dawitnu sam.

¹ Da nahip oo mauhaknab kobolnu, nahip nai doya mala hettoɗia epeɗia elele mettak kobolnu ele ahi edakkul. O Yawe, da ahippa na binan mekkul.

² Da na noomppa nahip neekkakppa da oolppa kaliak laa iitta ele oikkulnu wagai mein hekkul. Na ganeb dahilppa uɗikkut? Da daattemppa amu, da na noomppa danab ooppa kaliak laa iitta ele daakkulnu oolppa dabmein oikkul.

³ Ao, da keeke laa na noomppa uɗig wak ele daatte doottem amu, da amu anttaknu uukkul. Kobol oh danab ag na ii dim lamidtteb ele, ag hetteb amu, da kobol amunu nau ninig ele doottem. Da kobol amu ohppanu aɗitai laa ii hepa.

⁴ Da danab ag eheɗ haknu ag tiilagppa daatte ele, da ag guguattak ii daapa. Da kobol nau ohnu awaitte daakkul.

⁵ ⌊Da am king⌋. Da heppi, aun laa nug nai nau nuhig mudippan layag onig heeb nauhkkunu atte amu, nug baula ii hema. Da laa ag dada hena laa eɗittaknu dabmak aotteb, ag dada kobol laala ele hetteb amu, da hadappi, ag kobol amu tuɗidna ii hemana.

⁶ Da danab ah ag Yawenu oo metta ii uuak kobol dim lamidtteb ele, da ag ele ihinig wanppa daagnignu ag atognoadkkul. Da heppi, laa ag Kayaknu neekkakppa oolagppa kaliak laa iitta ele amu, ag da gumiɗna daaglagnu elele daaglag.

⁷ Da laa ag nai hambuppuak maditteb ele, da heppi, ag da laulppa ii daamna. Ao, da heppi, laa nug nai hambubutte ele, nug da ulum nai ii meɗama.

⁸ Deɗ anen anen oh, da laa ag ihinig wanppa nau hetteb ele, da ag mattialatte anatten, da heppi, ag nauhkkulag. Da ag hadappi nauhna, ag Yawenu aab okkaippa ii daamna.