Sam 10 - Nobonob Baibel

Laa nug Kayak Nug nai doya mala hettoɗia epeɗia elele mettak kobol dim lamidkkunu unuqittom

¹ O Yawe, na uma daattemnu diig appe dookkulnu oɗ medattem. Yo, uug da toniɗom daattem, haen amuppa na nakka na lokkumna daattemnu diig appe dookkulnu unuqidttem.

² Nau hak danab ag beɗuppa tak kobol nau dim lamidna, ag daɗek danab ah eheɗ hadatteb, amge Yawe Nug heeb, laa ag daɗek dilagnu keeke laa hekkulagnu lokkumakppa doonna, maittak eheɗ aotteb ele, kobol amu eɗua, ahilagppa daakkunu ool daatte.

³ Aɗinu? Nau hak danab ag eheɗ henana, en kuɗum aoglagnu dabmenana, ag amu haknu ag akka binalag metteb. Ao, ag danab baubau awaknu hik qak kobol dim lamidtteb binalag mena, ag Yawe Nug eheɗ laa awaknu anak waappa daakkunu anan, dimedatteb.

⁴ Am nau hak danab, ag dada kobol dim lamidtteb amu, ag Kayak anidna dim lamidkkulagnu Nug ii maditteb. Ag, “Kayak laa ii daatte,” anana, ag anam hetteb.

⁵ ⌊Haen Kayak ahilag ib oo ii nette amu, haen amuppa⌋ nau hak danab ag keeke oh hetteb, amuppa ag eleleib hetteb. Ag na Kayak, ag nahip bu qak ag amelag meum daatte am ag ii anidtteb. Ag ahilkad kekeɗ eheɗ nau aon aon aqadtteb.

⁶ Am ag akka anen anen ahilagnu inam atteb. “Keeke nau laa dahilppa iinab bema! Da am uug laa iitta, hanhan hamunab daakkul.” Ag anen anen anam aon atteb.

⁷ Nau hak danab ag laa dilagnu eheɗ laa awaknu anak waappa dayaknu nai anana, ag laa hambuppualadna, amu laa ag nau hak danab atteb bia ii heppeg amu, geha ag guittak mattaglagnu atteb. Ao, ahilag mattiakppa ag heeg, danab ah laa uug aoegeg, kobol nau ele betteb.

⁸ Nau hak danab ag aab naunau guguittak appa danab ah aɗualadna guittak mattaglagnu maadna daatteb. Ao, ag lokkumna daanna, danab ah ag beɗulagppa aab iitta ele uɗiegeg, ag makkuɗadtteb. Ge, ag laa ag bodoettak ele ⌊aqadna, yab hekkulagnu⌋ lokkumna maadna daatteb.

⁹ Doɗ laion ag toettan, doɗ laa bodoettak ele aqadna laadkkulagnu maadna daatteb amu, amubia nau hak danab ag danab ah ɠagattag iitta ele aɗaladkkulagnu henan daatteb. Ge, atu makkaɗak hikan danab ag uhuippa pelem mena, doɗ diin eeɗadna gotteb bia, nau hak danab ag danab ah ehanittak laa iitta ele aɗaglagnu henan daatteb.

¹⁰ Nau hak danab ag danab ah ɠagattag iitta, ag amu dilagppa wagai mena heeg daaegeg, ɠagattag iitta ele ag nena qetteb. Yo, nau hak danab ag wagai mena heeg, laa gai-iitta daatteb, ag nena qena, iitta metteb.

¹¹ Am nau hak danab ag akka ag ahilagnu, “Kayak Nug danab ah amunu ii dabmette. Nug ig ahilagppa aɗi heutut amu, Nug ii anigtte! Nug amunu aɗitai ii ama!” atteb.

¹² O Yawe, na ahan ⌊neekkadkkutnu oɗ medattem⌋. Ao, O Kayak, na danab nau bu madakkutnu unuqidttem! Ge, na danab ah bodoettak dilagnu daut atimanu ool daatte!

¹³ Amu nau hak danab ag nau hena, ag Kayak, ag Nug ihaklel qettan, ag Nug bu ii mattamanu aon atteb amge attemun? Ag aɗinu anam hetteb? Ag attem hena, ag, “Yawe Nug attemtai laa ihinignu ii ama,” dabmenan oitteb?

¹⁴ ⌊Amge,⌋ O Kayak, na hanhan laa nug layag guittak medatte, na amu anidttem amunu, na ag heppig amu, na anidna malame. ⌊Diig amunu amu,⌋ danab ah bodoettak ag nahipnu oolagppa genab dootteb. ⌊Amu diig amunu ele,⌋ na nid anilkad mamelkad mauhppig ele, na amu dilag aɗ itak daattem.

¹⁵ O Yawe, na nau hak danab, ag nau hetteb ele, na ag eppelkad makkuladkkutnu oɗ medattem! Ao, kobol nau ag hettebnu auntai laa ii madikku ele amu, na amunu bu madakkutnu unuqidttem.

¹⁶ Yawe Nug king hanhannu daatte! Ao, O Yawe, na heppe, laa ag kayak laala dilagnu dup nona binag mak kobol hetteb ele ag nahip wanppa aib daappig.

¹⁷ O Yawe, na daɗek danab ah, na ahilag oo hak amu, na amu doottem. Ao, na ag ahilag unuqittak doona, ɠagattag madattem.

¹⁸ Na nid anilkad mamelkad mauhppig, danab ah, laa eheɗ hattak waappa daatteb ele amu, na ahilagppa nai doya mala hettoɗia epeɗia elele mettak kobol dim lamidkkutnu, na anam hettem. Ge, nau hak danab ag baula heppeg, nid anig mameg iitta ele, danab ah, laa eheɗ hattak waappa daatteb ele amu, ag baula eheɗ nau baɗamnanu na anam hettem.