Sam 1 - Nobonob Baibel

Wanppa dayaknu ippu aɗit

¹ Danab aun laa nug danab laala ag nau hak danab daan oitteb ele, nug amu dilag ulum nai ii dim lamittatta, danab nug hipunin danab dilag hak ii haaha, danab nug awa awa qettak danab ele gadmak ii daatte amu, danab amu nug itittak ena awom daatte.

² Nug Yawenu ɗonu oo huana heehe, dim lamidtte. Nug ɗo amunu tuqan, amun ele dabmak unuqag awawa daatte.

³ Danab nug anam Kayak dim lamidtte ele amu, nug am ad laa le daugppa ebappig daatte, hanebppa meu owawa, uɗug ii nauhtte, nug anam bia daatte. Nug aɗi hette, am enaib bette.

⁴ Amge nau hak danab amu, ag anam iitta. Ag am ee aeg dappunkkeg ulah iwalatta diia, umanab gotte bia daatteb.

⁵ Ag amubia daatteb amunu, Yawe Nug nau hak danab naippa maatteb, ag nau aomnanu oolna, laih laa ii gomana. Ao, hipunin danab ag am genab tutukku hak danab ah oolagppa ii daamna.

⁶ ⌊Nau hak danab ag anam aakku daaglag.⌋ Aɗinu? Yawe Nug genab tutukku hak danab ah atognoadtte, amge nau hak danab ag padal mekkulag.