Rut 4 - Nobonob Baibel

Boas Rut awom

¹ Aria, Naomi, Rut ele aa amunu mattiya daaeheh, Boas nug ikki danab dilag qagmak aben aab nuhig odppa daatte, nug appa ta dayom. Dayeye, danab laa, nug Elimelek ele aa tiig laippunab, Rut ehanidkkunu anuqak dayom, Boas nug tatam nuhignu Rut amegppa aum ele, nug uɗiom. Uɗie, Boas nug onigppa eum. “Ne lai, inam doppe daaɗu!” awa aum. Boas nug anam a, nug do daapiɗ.

² Aa daayya, Boas nug aab amunu ikki danab eblaih laih ele laa, nug ag onilagppa ele e uɗieg, “Inam daappeg,” a, ag oh daappig.

³ Ag daanna, Boas nug danab laa, danab amu nug Elimelek ele aa tiig laippu, nug Rut ehanidkkunu anuqak dayom amu, nug nug amegppa aum. “Naomi, nug Moap wanppanu eɗua uɗiom ele, nug danab nuhig Elimelek, mauhom ele, nug danab nuhignu wan maha laa meeb, danab laa daden mekkunu oo daatte.

⁴ Nug anam hette amunu, da na amenppa, na wan amu daden melomnu laa ippa daatteb, dahilad danab dilag ikki danab imu noolagppa ele appi dookkutnu dabmein, iikku madittem. Na wan amu, danab laa eppegppa dayaknu qagaiettakppanu eɗua uhuqak henana, daden mekkutnu dabmettem dayeb amu, na appe dookkul. Amge na anam hekkutnu oot ii daatte dayeb amu, na amu ele appe dookkul. Aɗinu? Danab ag wan amu laa eppegppa dayaknu qagaiettakppanu eɗua uhuqak hekkulagnu daatteb amu, danab amu oolagppa i iikku daattep, amge amu haknu amu, na ig danab amu oh oonigppa, na anuqak daattem. Da anuqak ii daattem. Da na dimunppaib daattem,” awa aum. Boas nug anam a amu, danab laa amu nug nob ma aum. “Da wan amu laa eppegppa dayaknu qagaiettakppanu eɗua uhuqak hekkul,” awa aum.

⁵ Nug a, Boas eɗua amegppa aum. “Am ena, amge na wan amu Naomi eppegppanu daden menana, haen amuppa na Moap ah Rut, nug laa mauhomnu ah qab, nug nahip ah daakkunu ele aokkut. Aokkut amu, wan amuam Elimelek buɗub dilag daakku,” awa aum.

⁶ Boas nug anam a amu, danab laa amu, nug aum. “Ehe, anam daakku dayeb amu, da ii hepa. Aɗinu? Wan amu da buɗulad dilag ii daama. Na wan amu laa eppegppa dayaknu qagaiettakppanu eɗua uhuqak daakkunu he! Da am iitta,” awa aum.

⁷ Amu anukka Israel wanppa keeke amubia ɠagattag qaknu amu, kobol laa inam dayom. Danab laa nug wan laa tituanakppanu eɗua uhuqak heeb daakkunu, o danab laa nug wan nuhig laa meeb, laa daden mekkunu haaha, nug danab laa, nug ag genab anam heum ippunadkkunu, nug baeg gaɗa uɗa awa, danab wan eɗua, wan amu mamegnab mettom, o nug danab wan awom ele mettom. Ahilag kobol amuppa amu, danab oh keeke amu genabnab anam beum anidna dooppig.

⁸ Kobol anam dayom amunu, danab Boas ele nai madipiɗ, nug Elimelek ele tiig laippu, nug Rut ehanidkkunu anuqak dayom, nug Boas amegppa, “Na daden me!” anana, nug baeg gaɗa uɗa awa, Boas mettom.

⁹ Boas nug baeg gaɗa amu awowa, nug Israel dilag ikki danab, aria laala ele daappig amu, nug ag amelagppa aum. “Gemu ag imu oh anidna malappig, ag aakku laa aɗi heehe anttomnu mattiak danab beppig daatteb. Amuam ag da Elimelek, Kilion, Malon ele dilag keeke, Naomi eppegppa dayom amu, da amu oh daden memi anidppig.

¹⁰ Laa ele, Moap ah Rut, nug gamu Malon mauhom amu, da nug dahil ah daakkunu ele aomi. Kobol amuppa amu, Malon buɗub iitta ii mema, amu nuhig wan ele ag eppelagppa daakku. Malon onig am aab imunu bukppa iitta ii mema. Ag aakku gemu amu anidna malappig,” awa aum.

¹¹ Boas anam a amu, Israel dilag ikki danab, amu laala ele daappig, ag oh appig. “Ig aakku anidta, ig laa aɗi heehe anttomnu mattiak danab aakku daattem. Yawe Nug heeb, Rut, nug ah nahip daakku amu, nug Rahel, Lea ele, ah aɗit amu aa buɗulti am ig Israel danab ah, amu ah amu nug ah aɗit amubia ba dayebeb, na aab ikki onig Eprata, na amu dilag oolagppa, Betlehem aabppan danab ah oolagppa ele, na onin ele daakkutnu oonig daatte.

¹² Yawe Nug heeb, aa buɗulti ag Juda, Tamar bekka Peres, nug buɗub bia daaglagnu oonig daatte,” aon appig.

Boas, Rut ele buɗulti

¹³ Aria, Boas nug Rut awe oiyya, Yawe Nug he, nug nid aokkunu elele daye, nug nid danab menuom.

¹⁴ Nug nid amu menue, aabppan ah ag Naomi amegppa appig. “Ig Yawe binag metu! Nug he, na gemu ehanittak laa ele daattem. Nid amu nug Israel oolagppa okkai daakkunu oonig daatte.

¹⁵ Na kaino meppe, nid imu nug ɠagattag nitta atognoidkku. Aɗinu? Na ahipan, nug nahipnu oo mauhtte, nug menuom. Na begapad eblaih aɗit ele daan ehanidlob amu, na ahipan nug nahipnu amu eɗittak hette,” aon appig.

¹⁶ Ag anam aon aeg amu, Naomi nug nid amu nuhig daalo bia atognottom.

¹⁷ Nug anam heehe, ah ag appig. “Naomi nug nid amunu nug ooppanunab bia doyaya atognotte,” appig. Aria, ag nid onig Obet ataɗppig. Nug am Jesi mameg, amu Jesi nug Dawit mameg.

^18-22 Amu Dawit memetab anukkanu am Peres. Peres buɗub am inam. Peres bekka am Hesron. Hesron bekka am Ram. Ram bekka am Aminadap. Aminadap bekka am Nason. Nason bekka am Salmon. Salmon bekka am Boas. Boas bekka am Obet. Obet bekka am Jesi. Aria, Jesi bekka am Dawit.