Rut 2 - Nobonob Baibel

¹ Aa teya daaeh, amu Betlehem appa danab laa onig Boas dayom; nug Naomi gamu Elimelek, ⌊Moap wanppa mauhom amu,⌋ nug nug ele, ahilah aab ikki laippu. Boas nug am danab okkai, nug enub ele.

Rut nug Boasnu dadppa ee awom

² Aria, anam daye, deɗ laa Moap ah Rut nug ahipa Naomi amegppa aum. “⌊I ee aoɗ lakkunihnu amu,⌋ na appe, da ukken, maɗi nid dilag gumak danab laa oɗ medappi, nug, ‘Yo,’ ab amu, da maɗi nid amu dim lamatte, bali gumu ikki ele ii aoeg daatteb amu, da aokkul,” awa aum. Nug anam a amu, Naomi nug aum. “Am ena, na gona akke!” awa aum.

³ Naomi nug anam aum amunu, Rut nug aha ukka, maɗi nid dad laappa uɗat heppig ele amu, nug ag dim lamatta, bali digma akkom. Dad amuam Boasnu, amge Rut nug amu ii doyaya, appa bali digma akkom. Boas, Elimelek ele, aa am aab ikki laippu.

⁴ Rut nug bali agekke, haen ukke amu, Boas nug Betlehem appanu aha, datta uɗia, maɗi nid humatta, ag amelagppa aum. “Yawe Nug ag ele daaglagnu ool daatte,” awa aum. A amu, ag eɗun appig. “Yawe Nug na ele itidkkunu oonig daatte,” aon appig

⁵ Ag anam aeg am, Boas nug uɗat gumak danab oɗ mettom. “Ah bau umu am adeppan?” awa oɗ mettom.

⁶ A amu, uɗat gumak danab nug aum. “Nug am Moap ah. Nug Naomi ele, aa Moap wanppanu uɗipiɗ.

⁷ Amu gemu nug uɗia, nug da oɗ meɗa aum. ‘Da maɗi nid umu dim lamatte, bali ii aoeg daatteb amu, da aokkulnu elelete?’ Nug anam oɗ meɗe, da, ‘Yo,’ ai, nug aakku dad ooppa ukka, bali digma akka, ukku agakka oitte. Anam haaha, nug haen laippu haen tutuib pehppa hik awom,” awa aum.

⁸ Uɗat gumak danab nug Boas amegppa anam a amu, Boas eɗua Rut amegppa aum. “O aɗel, da nai laa appi dookkutnu ool daatte. Na laa dilag dadppa gona, bali aib akkame. Na laih aib gome. Iitta! Dahil maɗi ah ippa daatteb amu, na ag ele dayeg!

⁹ Uɗat nid ag dad adekkuppa daanna uɗat hetteb ele amu, na anadppe, appaib ag ele daanna, dahil maɗi ah dim lamadnana, uɗat he! Da uɗat nid dahilad, ag nahipnu eheɗ laa ii hemananu matu amelagppa ami amunu, aib baɗame. Laa amu, haen na le baat diieb amu, na gona, dahilad danab ag le tappiɗppa itappig ele amu, na tappiɗ amuppa le aon la!” awa aum.

¹⁰ Boas anam a amu, Rut nug gateg qaun o, gomela, iɗu wanppa ma, nug Boas amegppa inam aum. “Da am wan laihnu ah amunu, diig aɗippa na da ena aniɗna, dahilppa kobol ena hettem?” awa oɗ mettom.

¹¹ A amu, Boas nug aum. “Na gamut mauhe, na ahipan ehanidnana, kobol ena hena uɗie, anamib gemu ele hettem; na mamen anin ele uuatna, na appan diig ele uun, na uɗie, ig ele, ig am danab ah buɗub laappanu, anukka na ig ii dooigme ele amu, na ippa uɗie, ig ele daattemnu amu, laa ag mattieg doomi.

¹² Yawe, Nug na kobol ena aɗi aɗi heme amu, Nug amu dabmaama, nob ena na medakkunu ool daatte. Na matuk nakkud ag anilag haug waappa padal mak eɗidna ena daaglagnu daatteb bia, na ippa uɗin, Yawe waappa daattem amunu, Yawe, Israel dilag Kayak, Nug nob itittak ena na medakkunu ool daatte,” awa aum.

¹³ Boas nug anam a amu, Rut nug nob ma aum. “O danab okkai dahil, na dahilnu ii helom bia me, na ehaniɗme. Na dahilnu nai bodoettak mattime amunu, da oolppa ɠagattag qettak doottem. Nahipad maɗi ah daatteb amu, ag am da eɗilak daatteb, da ag bia ii daattem, amge na kobol enanag dahilnu aakku heme,” awa aum.

¹⁴ Nug anam awowa, nug uɗat he ukke, ee lanak haen uɗie, Boas nug Rut amegppa aum. “Na dona, bret laih imu aon, wain imuppa mena la!” awa aum. Boas nug anam aum amunu, Rut nug do, Boasnu maɗi ah ele daappig. Nug anam dayeye amu, Boas nug ee aeg manik laa ele awa nug mettom. Mette la, oo dittie, big laa uue dayom.

^15-16 Amu ee lanak dimppa Rut nug aha, bali agakkunu ugekke, Boas nug maɗi nid nuhikkud amelagppa aum. “Ah umu nug oiyaya, bali ehag ele daatteb, nug amuppanab ele bali laala uueg daatteb amu, nug amu akkeb, nug uɗa nemanu aib daug batappig. Laa amu, ag bali ehakkak amu maon gokkulagnu henana, ag bali laala eeɗadna, maadppeg dayebeb, nug akkaɗ!” awa aum.

¹⁷ Boas aum amunu, Rut nug bali akka, qagme ukka, tueb me, nug akkom ele awa ukka, bali mumuɗom. Anam heehe ukke, bali aeg 10 kilogram anam awom.

¹⁸ Awa, nug mawa, aabppa ukka, nug gane awom amu, nug ahipa ippunitte anttom. Ippunitta, nug ee lanan, big uuom amu, nug amu ele ippunitta mettom.

¹⁹ Ippunitte amu, Naomi nug aum. “Gemu na adeppa uɗat henan, na ee inam aome? Na dad aunnuppa uɗat henana, ee imu akkame? Kayak Nug danab nug na dabmettom ele amu, Nug nug itidkkunu ool daatte,” awa aum. A amu, Rut nug aben, nug amuppa uɗat heum ele, nug amunu mattia, amegppa aum. “Danab da nuhig dadppa gemu uɗat hemi amu, nug onig Boas,” awa aum.

²⁰ Rut nug anam mattie, Naomi nug aum. “Yawe Nug Boas itidkkunu ool daatte,” awa aum. Awowa, nug Rut amegppa aum. “Yawe Nug ihinti danab mauhpiɗ ele amu, aa bau daapiɗ haenppa ahilahnu oo mauhaknab doya, gemu amu Nug ihinihnu ele oo mauhaknab dootte,” awa aum. Nug anam anana, nug nai tuɗitta aum. “Boas, Elimelek ele amu, aa am tiig laippu, tiig amuppanu laa ag i ehanitkkulagnu daatteb ele amu, ag oolagppanu laa am nug aakku,” awa aum.

²¹ Naomi nug anam a, Moap ah Rut nug aum. “Amuib iitta. Boas nug da amelppa inam ele aum. ‘Na dahilad maɗi ah ele oh oinna, ee aeg qagmaadppe ukkeb, ee aeg oh aon malappeg, na ele malakkut,’ awa aum.” Rut nug anam Naomi amegppa aum.

²² Anam a amu, Naomi nug ahipa Rut amegppa aum. “O nid ahin dahil, na danab laa dilag dadppa uɗat hekkutnu gokkut dayeb amu, appa nahip-ppa uug laa bekkutai amunu, Boas aum bia, nuhikkud maɗi ah ag uɗat hebeppeg, na ag ele oinna, uɗat hekkut am ena,” awa aum.

²³ Naomi nug anam aum amunu, Rut nug Boasnu maɗi ah gukkuatta oiyaya, bali aoeg iitta me, wit ele aoeg iitta me, nug ele uɗat aakku uuom. Haen nug uɗat heehe amu, nug ahipa ele oh daapiɗ.