Rut 1 - Nobonob Baibel

Elimelek baekkudppa ele Moap goppig

^1-2 Haen epeɗiak danab ag Israel danab ah gumadppig, haen amu ooppa deɗ laa enug haen okkai laa Juda wanppa beum. Enug haen amuppa amu Juda danab laa, Betlehem aabppanu amu, nug aha, wan laa onig Moap, appa maɗ laala dayowa, eɗua uɗikkunu dabmaama ukkom. Danab amu, nug onig Elimelek; nug wau, bekoɗ ele oh diie goppig. Nug wau onig am Naomi, amu nug bekoɗ onilah am Malon, Kilion ele. Ahilag aab ikki onig amu Eprata. Ag Juda wanppa, Betlehem aabppanu. Amu ag ahan, Moap gona, appa daanna,

³ Naomi gamu Elimelek nug mauhom. Mauhe, Naomi bekoɗ ele ag akka daappig.

⁴ Daanna, nid danab aɗit amu aa Moap ah diipiɗ. Ah aɗit amu onilah am Orpa, Rut ele. Aa ah aɗit amu diieh, ag oh daaeg ukke, maɗ 10 anam uue,

⁵ Malon, Kilion ele, aa ele mauhpiɗ amunu, Naomi nug gamu iitta, bekoɗ ele iitta, nukkaib dayom.

Naomi, Rut ele eɗuya, Israel wanppa gopiɗ

⁶ Aria, Naomi nug anam Moap wanppa dayaya, nug, “Yawe Nug danab ah nuhikkud, Israel wanppa daatteb, Nug he, enug haen iitta me, Nug ag ehanatta, ee madatte,” nai amu nug doyom amunu nug, nug ahipoɗ ele ag eɗun, Juda wanppa gokkulagnu bappaidppig.

⁷ Ag bappaidna malona amu, ag ahan, Moap wan uun, Juda wanppa gokkulagnu, ag ib Juda gotte ele amu, ag ib amu aon goppig.

⁸ Ag ib aon gonana, Naomi nug baeg ya, hibaitta dayaya, ahipoɗ amelahppa inam aum. “Aa eɗuya gopeɗ, aa anilti ele dayeg! Aa dahilnu, amu aa gamulti dilahnu ele enanag hepiɗ, amubia Yawe Nug ahilahppa oo mauhaknab dookkunu ool daatte.

⁹ Yawe Nug heeb, aa danab bau diiya, anen anen laulahppa, uug iitta, ena daaglahnu ool daatte,” awa aum. Nug anam awowa, nug ootuqate, aa naɗi gaapiɗ.

¹⁰ Gaayya, aa inam apiɗ. “Iitta! I na ele oh, na laipad gumadta gopput, ag ele daagnig,” aoya apiɗ.

¹¹ Anam apiɗ, amge Naomi nug aa amelahppa aum. “Iitta! Aa eɗuya, aabppa ukkeɗ! Aa da dim lamiɗya gokklahnu attep, amge aa attem dabmeyaya anam attep? Da nid danab laa, aa gamulti daaglahnu menuatkkulnu elelete?

¹² Anam daatte amunu, O dahilaɗ, aa eɗuya, aabppa ukkeɗ! Aɗinu? Da am kaino, da danab laa ii aopa. Da danab laa aokkulnu dab-ii-mettem, amge da anam dabmelomlob; ge, da gemu tuqan imunab danab aoppi oilopnu dabmelomlob, da nid aɗit menuatppi,

¹³ aa nid aɗit amu amelah melopte? Aa danab laa iite diiatlop? O dahilaɗ, anam am iitta. Yawe Nug da uug meɗom, uug amu aa ele tonata daatte amunu, da uug okkainab, ahilah uug eɗittak doottem,” awa aum.

¹⁴ Naomi nug anam a, Orpa, Rut ele aa aakku baula gaapiɗ. Gayoya amu, Orpa nug ahipa ootuqittowa, eɗua ukkom, amge Rut nug eɗua gokkunu uua autanab awom.

¹⁵ Rut nug anam he, Naomi nug aum. “Antte! Na makkep nug eɗua, nug laikkud, nuhig kayak ele gumatta gotte amunu, na eɗun wappe, na nug ele oh ukkeɗ!” awa aum.

¹⁶ Naomi nug anam aum, amge Rut nug aum. “Na da uuitten, eɗue gokkulnu aib duttuniɗme! Aɗinu? Na adeppa goppe amu, da ele oh gokkunih. Na adeppa daappe amu, da ele daagnih. Danab ah na laipad daatteb, ag am dahilad daaglag. Nahip Kayak, Nug am dahil Kayak daakku.

¹⁷ Na adeppa mauhppe, appa da ele mauhppi, boumiɗkkulag. Keeke laa wan imuppanu dayak ihinih ii otaɗma; mauhak aakkuib otaɗitkku. Da aɗi keeke dayak ihinih ii otaɗmanu nai ami amu, da heppi, meu ii beeb, Yawe Nug bu okkainab meɗakkunu ool daatte,” awa aum.

¹⁸ Rut nug anam a, Naomi aakku doyom, Rut nug nug ele oh gokkulahnu nuhig dabmak ɠagattag eppe dayom amunu, nug Rut eɗua, appag diigppa gokkunu baula mattiak uuom.

¹⁹ Naomi, Rut ele aa anam mattiya maloya, aa oh aakku gopiɗ. Aa goya, Juda wanppa teya goya, Betlehem aabppa tepiɗ. Teeh amu, Betlehem danab ah ag ottainna, ah ag appig. “Imuam Naomite?” aon appig.

²⁰ Aeg amu, Naomi nug aum. “Dahilnu ag Naomi aib appig. Laa Nukka Ɠagattag Oh Ele Nug he, da uug naunab doottem amunu, dahilnu ag Mara aon aig!

²¹ Da aab imu uue gomi haenppa amu, da keeke laan tutu mak iitta, amge Yawe Nug he, da eɗuen uɗien, tutunab daattem. Amu aɗinu ag dahilnu, Naomi, aon atteb? Yawe Nug uug okkai da meɗom. Ao, Laa Nukka Ɠagattag Oh Ele Nug uug naɗi da meɗom.” Naomi anam awa aum.

²² Anam amu, Naomi nug Moap wanppanu eɗua uɗia, Juda wanppa Betlehem aabppa beum. Nug ahipa Rut ele, nug am Moap ah, aa oh Betlehem aabppa bali okulak haenppa tepiɗ.